سونگی اوچ دههده، اوروش، جمعیت کوپهیگنی، طبیعی منبعلرنی سقلش توغریسیده دقیق برنامهلر یوقلیگی و اقتصادی قیینچیلیکلر سبب، مملکتنینگ تورلی منطقهلری جملهدن کاپیسا ولایتینینگ نجراب تومنیده اورمانلر، یوقالیش خوفی آستیده قرار تاپگن. نجراب تومنی یشاوچیلری حیات خرهجتلری و یاقیلغی مادهلرنی تامینلش مقصد معیارسیز شکلده درختلرنی کیسیشگه مجبور بولگنلری سبب، بو حدودنینگ یشیللیک و یشش محیط کیلهجگی توغریسیده خواطرلنگنلر.
نجراب تومنی «درهی افغانیه» منطقه یشاوچیسی محمدصابر نجرابینینگ سلاموطندار گه ایتیشیچه: «بو ییرده جلغوزه، توت، یانغاق، جیده، سپیدار و بید درختلری بار. اونینگ یاغاچلریدن یاقیلغی ماده و بیران باشقه نرسه اوچون فایدهلنیلهدی. اونینگ آلدی آلینمهگنی صورتده، اورمانلر اورتهدن کیتهدی و یشش محیط زیان کورهدی. اوتگن قیش موسومیده یاغاچ قیمتی یوقاری کیتدی و کابل دن موترلر کیلیب، کاپیسا و نجراب دهگی اورمانلرنی ساتیب آلدیلر که درختلرنینگ کوپراق کیسیلیشیگه سبب بولدی.»
بیزلرنینگ فیسبوک صحیفهمیزگه باش اورینگ!
پروان بیلیم یورتی ایکینچیلیک فاکولتهسی باشلیغی حکیمالله امینینینگ ایتیشیچه، اورمانلرنینگ معیارسیز شکلده کیسیلیشی یشش محیطگه زیان ییتیشتیریشی یانیده، اکوسیستمنی تهدید قیلهدی و محلی حیوانلر بیلن قوشلرنینگ یشش جایلرینینگ اورتهدن کیتیشیگه سبب بولهدی. او بو توغریده ییچیم یوللرنی تکلیف بیرهدی: «دولت اورمانلر اهمیتیگه نسبت اهالی نی آگاهلنتیریش اوچون ورکشاپلر و سیمینارلرنی اوتکزیش گه مکلف دیر. اورمانلر هوا صفتینی سقلش گه علاوه، توپراقنی کوچلنتیریب و اقتصادی نقطهی نظریدن هم یوقاری ارزشگه ایگه دیر. درختلرنینگ کیسیلیشی اورنیده، منطقهنینگ اقلیمی وضعیتگه ماس بولگن طبی اوسیملیکلر ایکیلیشی و کوچت ایکیلیشی توغریسیده سرمایه یاتقیزیلیشی کیرهک.»
کاپیسا ایکینچیلیک، چاورهچیلیک و سووغاریش ریاستی مسئوللرینینگ ایتیشلریچه، جاری ییلده اورمانلرنی قیته قوریش و ایکینچیلیک رواجلنیشی اوچون بیر قطار لایحهلر قولگه آلینگن. کاپیسا ایکینچیلیک، سووغاریش و چاروهچیلیک باشلیغی محمدرحیم نعمانینینگ ایتیشیچه: «کاپیسا ده قریب ۱۵ مینگ هکتار طبیعی اورمان بار. اونینگ سقلنیشی و قیته قوریلیشی اوچون بو ییل ۴۰ مینگدن آرتیق کوچت (اوف او) موسسهسی آرقهلی و بیش مینگدن آرتیق کوچت ایسه ایکینچیلیک ریاستی آرقهلی ایکیلگن. اونینگ یانیده، آگاهیلیک بیریش جلسهلر هم اوتکزیلیب و اورمانلر کیسیلیشی آلدی آلینیشی اوچون قوریقچی استخدام بولگن که حقوقلری اهالی تامانیدن توللنهدی.»
بیزلرنینگ «ایکس» ترماغی ده هم تعقیب قیلینگ!
بولرگه علاوه، کاپیسا ایکینچیلیک ریاستینینگ سعیوحرکتی یانیده، اوشبو ولایت یشش محیطنی سقلش ریاستی اورمانلرنی سقلش و قیته قوریش اوچون بیر قطار برنامهلرنینگ عملگه آشیریلیشیدن خبر بیرگن. کاپیسا یشش محیطنی سقلش ریاستینینگ عامه آگاهیلیک و علاقهلر بوییچه عمومی مدیری فیضآقا مصلحنینگ ایتیشیچه: «اهالی قشاقلیک و کمبغللیک سبب اورمانلرنی کیسیشگه یوز کیلتیرگن؛ بیراق بو پروسه آلدی آلینیشی اوچون یاقیلغی مادهلر توغریسیده بدیل لایحهلر تیکشیریلماقده. اهالینینگ اقتصادی قیینچیلیگدن ۴۰ فایزی اورمانلر آرقهلی یینگیللشهدی. بو ییل تاغلی منطقهلرده ۴۰دن آرتیق جلغوزه و کوپینچه پسته کوچتلری ایکیلگن. اونینگ یانیده ایکینچیلیک ریاستی باشقه ۳۲۰ مینگ کوچتنی ترقهتیشی ممکن.»
یشش محیط بوییچه ایش بیلرمانلرنینگ اورغولشیچه، اورمانلرنی سقلش، درختلر ایکیلیشی، طبی اوسکونهلر ییتیشتیریلیشی، زراعتی ییرلر کوچهیشی و طبیعی منبعلرنی سقلش، سوونی تامینلش و اکوسیستمنی سقلش اوچون کیرهک و اهالینینگ همراهلیگی و مسئولیت آلیشی، بو سعیوحرکتلر موفقیتلیگیده اونملی رول اوینهیدی.
