اوزبیکستان، افغانستان شرقیده زلزلهدن جبرلنگنلرگه یاردم بیریش مقصد، اوشبو مملکتگه ۲۶۵ تُن آزیق-آوقت و دارو یوبارگنینی معلوم قیلگن.
اوزبیکستان تشقی ایشلر وزیرلیگی، اوتگن کون کیچ قورون (۱۵-سنبله، شنبه)، بیر بیانیه آرقهلی یازیشیچه، مذکور یاردم ترمذ یوک مرکزیده توپلهنیب و ۱۴ ته یوک موتری آرقهلی بلخ ده حیرتان بندریگه انتقال بیریلگن.
بیانیهده کیلیشیچه، اوزبیکستاننینگ انسانسیورلیک یاردملری بیر مراسم آرقهلی اسلام امیرلیگی رسمیلریگه تاپشیریلگن. بلخ ده محلی رسمیلرنینگ ایتیشلریچه، بو یاردملر زلزله طفیلی کوپینچه زیان کورگن ولایتلرگه انتقال بیریلیشی ممکن.
اوزبیکستان رسمیلریگه کوره، اوشبو یاردملر یوباریلیشی بشری قیین وضعیتده افغانستان اهالیسیدن حمایت قیلیش اوچون مذکور مملکت سعیوحرکتلرینینگ بیر بولیمی دیر.
افغانستان شرقیده یوز بیرگن اولیملی زلزله نتیجهسیده جبرلنگنلر کیشیلرگه، قوشنی و منطقه مملکتلردن قطاری یاردم بیرگن.
بیرلشگن ملتلر تشکیلاتی ادارهلرینینگ اعلام قیلیشیچه، افغانستان شرقیدهگی زلزلهدن جبرلنگنلرگه یاردم بیریش اوچون بودجه کملیگی بیلن روپهرهلر.
توقیزینچی سنبله، یکشنبه کیچه، افغانستان شرقیده اولیملی زلزله یوز بیرگن و سونگی رقملر اساسیده، کمیده ایکی مینگ ۲۰۵ کیشی اولیب و مینگلب کیشی یرهلنگن.
