۲۹-میزان اۉزبېک تیلی ملی کونی (افغانستانده اۉزبېک تیلینینگ اورنی) عنوانیده، اسلام امیرلیگی بعضی رسمیلری، اۉزبېکستان دیپلماتلری، بیلیم یورت استادلری، فرهنگ سیورلر، خاتین-قیزلر و یشاوچیلرنینگ قیزغین حضوری بیلن کابلده نشانلندی.
بو احتفال، ۲۵-میزان، جمعه کونی، اۉزبېک خلقی بعضی ضیالیلرینینگ تشبثی بیلن اۉتکزیلدی.
اوشبو احتفالده اشتراک اېتگن بیلیم یورت استادی کریمالله اویغاغ، افغانستانده اۉزبېک تیلی رواجی اوچون برچه تامانلمه سعی-حرکت بولیب، بیرهملر اۉتکزیلیشی بیلن تیل توزهلمهیدی، بلکه اۉزبېک تیلینی یوکسهلیشی اوچون عایلهلرده اۉزبېکچه گپلنیب و اۉزبېک تیلیده یازیلگن کتابلرنی اوقیش و بالهلر بیلن اۉزبېک تیلیده گپلش ضرورلیگینی تأکیدلهدی.
اونگه کوره، تیل رواجی اوچون بیلیملر اکادمیهسیده اۉزبېک تیلی اوچون علیحده مرکز شکللنیشی کېرهک.
حاضرگی کونده، اۉزبېک خلقی عایلهلرده بو تیلیده گپلمهیپتی، بو حالت دوامی اۉزبېک تیلی انقراضی گه سبب بولهدی، دیېدی، بیلیم یورت استادی کریمالله اویغاغ.
اوشبو مراسمده افغانستان ژورنالیستلر اویوشمهسی باشلیغی حجتالله مجددی، افغانستانده اۉزبېک تیلی رواجلنیشی و قۉللب-قوتلنیشی اوچون مملکت یېتکرمهلریده بو تیلده نشرات بیریلیشینی مهم دیه تأکیدلهدی.
او، اسلام امیرلیگی عملدارلریدن، بوتون یېتکرمهلرده بو تیلده نشرات بیریلیشی توغریسیده جدی دقت قیلیشلرینی سورهدی.
شو بیلن بیرگه، احتفال تشکیلاتچیسی و بیلیم یورت استادی عبدالحنان قیلیچ ارسلان، افغانستانده اۉزبېک تیلینینگ اورنی آتیده بولگن بو مراسم، اۉزبېک ضیالیلری و فرهنگ سیورلری تامانیدن اۉتکزیلگنینی بیلدیریب و اۉزبېک خلقی گه عاید کییم-کیچیک، تورلی طعاملر و کتابلر نمایش گه قوییلگنینی معلوم قیلدی.
اوشبو احتفالده قطعنامه صادر قیلینیب اۉزبېک تیلی برچه تامانلمه قۉللب-قوتلنیشی، مملکت مقیاسیده اینیقسه افغانستانده اۉزبېک خلقی یشهیدیگن حدودلرده بیرینچی صنفدن ۱۲-صنف گچه سبق اوقیتیلیشی، افغانستان رادیو-ملی تلویزیونیدهگی اۉزبېک تیلیده بولگن نشرات وقتی آشیریلیشی، افغانستان اۉزبېکلری و اۉزبېکستان آرهسیده فرهنگی مناسبت مستحکملنیشی اوچون اقدام قیلیش و پایتخت کابلده اۉزبېک تیلی اوچون تدقیقاتی مرکز قوریلیشیگه تأکیدلندی.
شونینگدیک، مراسم یکونیده بیرقطار ژورنالیستلر، مدنی فعاللر گه تندیس تقدیم اېتیلدی.
افغانستانده اۉزبېک تیلی ملی کونی سابق حکومت وقتیده تن آلیندی و ۲۹-میزان اۉزبېک تیلی ملی کونی اولهراق افغانستان تقویمیده کیریتیلدی.
