بیرلشگن ملتلر تشکیلاتی بالهلرنی قوللب-قوتلاوچی صندیغی (یونیسف)، نینگ اعلام قیلیشیچه، افغانستاننینگ اوزاق منطقهلریدهگی عایلهلر و بالهلردن کوپ قطاری، «چیدهب بولمهگن و کوپ قیین» بیر قیشنی اوتکزماقده.
یونیسف، بوگون (۲۱-فبروری/ ۲-حوت، شنبه)، افغانستاننینگ اوزاق بولیملریده بالهلردن کوپ قطارینینگ جدی توییب آوقتلنمسلیک بیلن روپهره دیب معلوم قیلگن.
نورستان گه سفر قیلگن یونیسفنینگ علاقهلر بولیمی باشلیغی دانیل تیمه گه کوره: «اوشبو اوزاق منطقهلرده تیریکچیلیک قیلهدیگن عایلهلردن کوپ قطاری گه حیات، امان قالیش اوچون بیر کورهش دیر.»
تیمهنینگ ایتیشیچه، نورستان یشاوچیلری کوپراق ییترلی آوقتدن فایدهلنه آلمهی و بو وضعیت ساووق طفیلی کسللیکلر جملهدن سینهبغل برابریده اولرنینگ جبرلنیشیگه سبب بولگن.
یونیسف علاقهلر بولیمی باشلیغینینگ کوپهیتیریشیچه، بالهلرنی سینهبغل کسللیگیگه چلینمسلیگی اوچون اولرگه ایسیق کییملر و کمپل ترقهتیلهدی. شونینگدیک نقدی یاردملر کورسهتیلیشی بیلن عایلهلر طبیعی واقعهلر برابریده اوزلریگه مستحکمراق باشپنه قوریش و نیازلری بولگن یاقیلغی مادهلرنی ساتیب آلیش امکانیتیگه ایگه بولیشلری ممکن.
دانیل تیمه، نورستان ده یونیسفنینگ یاردم بیرووچی گروهلری فعالیتی توغریسیده ایتیشیچه: «گروهلریمیز آوقت ترقهتهدیلر. عایلهلر آوقتلر اهمیتی توغریسیده تعلیم کورهدیلر. توییب آوقتلنمهیدیگن بالهلر تانیلیب و مخصوص دوالنیش آوقتدن فایدهلنیش بیلن اولر دوالنیش آستیده قرار تاپهدیلر.»
شونینگدیک اونینگ اورغولشیچه، یونیسفنینگ یاردم بیرووچی فعالیتلری دوامی همده بالهلر و عایلهلرگه یاردم بیریش اوچون کوپینچه حمایتگه نیاز دیر.
بیرلشگن ملتلر تشکیلاتینینگ معلوماتی اساسیده، یاردم بیرووچی نهادلر بودجه کملیگی بیلن روپهره بولگنی بیرحالده، جاری میلادی ییلده ۲۱ میلیون ۹۰۰ مینگ افغانستانلیک جملهدن ۱۲ میلیوندن آرتیق باله انسانسیورلیک یاردملرگه محتاج دیر.
