ایچکی ایشلر وزیرلیگی نینگ اعلام قیلیشیچه، ییرلر و شهر قوریش وزیرلیگی نینگ ایکی ییریک رسمی و ۱۰ ایشلاوچیسی فساد و وظیفه‌لریدن ناقانونی فایده‌لنیش عیبلاوی بیلن قولگه آلینگن.
ایچکی ایشلر وزیرلیگی سوزلاوچیسی طارق آرین بیر توییت آرقه‌لی بو موضوع نی بیان قیلگن. اونگه کوره، مذکور کیشیلر بوگون (شنبه ۲- حوت) توشدن آلدین ایچکی ایشلر وزیرلیگی نینگ آغیر جرم‌لرگه قرشی کوره‌ش پولیسی آرقه‌لی قولگه آلینگن.
ایچکی ایشلر وزیرلیگی نینگ سوزلاوچیسی گه کوره، ییرلر و شهر قوریش وزیرلیگی نینگ اداری و مالی عمومی رئیسی، تدارکات عمومی رئیسی و شونینگدیک باشقه ۱۰ ایشلاوچیسی قولگه آلینگن. جناب آرین نینگ ایتیشیچه، قولگه آلینگن کیشیلر بو وزیرلیک نینگ قراردادلریدن میلیون‌لرچه افغانی پول نی تالان ایتیش گه عیب‌لنگن.
شونده‌ی بیرحالده، ییرلر و شهر قوریش وزیرلیگیدن بیر منبع آتی فاش ایتیلیشی نی ایستمه‌ی سلام‌وطندارگه ایتیشیچه، ایچکی ایشلر وزیرلیگی نینگ آغیر جرم‌لرگه قرشی کوره‌ش ریاست ایشلاوچی‌لری، ییرلر و شهر قوریش وزیرلیگی نینگ مالی و اداری عمومی رئیسی عبدالرحمان عزیزی شامل مذکور وزیرلیک نینگ ۱۰ ایشلاوچیسی نی ۱۲۰ میلیون افغانی پول نی تالان ایتیش گه عیبلب قولگه آلگن. شونینگدیک منبع نینگ کوپه‌یتیریشیچه، مذکور کیشیلر بوگون ییرلر و شهر قوریش وزیرلیگیدن اوشلب آلینگن.
