ترکمن عیاللردن قطاری عبدالرووف ناملی ۹ یاشر باله نینگ قوییب یوباریلمه‌گنی حقیده محلی مسئوللرنینگ کوچ‌سیزلیککه عیب‌لب، بلخ حاکمی دفتری نینگ ایشیگی نی باغله‌گنلر. مذکور باله کمیده ۴۷ کون آلدین ناتانیش قوراللیلر آرقه‌لی مزارشریف شهری نینگ ۴- ناحیه‌سیدن اوغیرلندی.
اعتراضچی‌لرنینگ آگاه‌لنیتریشیچه، ۹ یاشر عبدالرووف آدم اوغیرلاوچیلرنینگ قولیدن قوییب یوباریلگونگه قدر، بلخ حاکمی دفتری نینگ آچیلیشی گه رخصت بیرمه‌یدیلر.
۹ یاشر عبدالرووف نینگ آنه‌سی کسل‌لیک بستریدن ناراضلیک نمایش گه قتنه‌شیب و باله‌سی نینگ قوییب یوباریلیشی اوچون التماس قیلگن.
شونینگدیک مذکور باله نینگ آته‌سی اوغلی نینگ اوزاقلیگی نی دردی دن هوش‌سیز بولگن. اعتراضچی‌لرنینگ ایتیش‌لریچه، ۹ کوندن بویان بلخ حاکمی دفتری نینگ برابریده تحصن خیمه قوریب و مملکت سوداگرلیک بندرلرینی باغله‌گنلر؛ بیراق بو ایش‌لری حاضرگچه نتیجه بیرمه‌گن.
نماینده‌لر کینگشی ده بلخ نماینده‌سی گل رحمان همدرد، ۹ یاشر عبدالرووف نینگ قوییب یوباریلیشی خصوصیده بلخ محلی مسئوللری نینگ کوچ‌سیزلیگیدن تنقید قیلگن. بیراق بلخ محلی مسئولری بو توغریده خبرچیلرنینگ سوراق‌لریگه جواب بیریش اوچون حاضر ایمس دیر.
افغانستان ترکمن‌لری نینگ ملی حرکت تشکیلاتی، آدم اوغیرلاوچیلیک کوپه‌یگنیدن شکایت قیلیب ایتیشیچه، یالغیز اوتگن بیر یریم ییل جریانیده ۱۷ ترکمن اوغیرلنگن.
