ملی مصالحه کینگشی نینگ بیرینچی اورین باسری و مارشال عبدالرشید دوستم رهبرلیگی‌گه بولگن ملی اسلامی جنبش حزبی نینگ ییریک عضوی عنایت‌الله بابر فرهمند نینگ ایتیشیچه، اوشبو حزب مرکزی کینگش اورین باسری پیرم‌قل ضیایی «هدف‌لی ترور» آرقه‌لی اولدیریلگن.
بوگون “دوشنبه” ملی مصالحه کینگشی اورین باسری نینگ فیسبوک صحیفه‌سیده یازیشیچه، پیرم‌قل ضیایی طالبان بیلن صورت تاپگن اوروش‌دن قیتیب رستاق تومنی نینگ تینچ منطقه‌سیده بارگنیدن سونگ، ۱۰۰ دن آرتیق عسکری بیلن موتر دن پیاده بولگن و انه‌شو پیت‌ده تلفونی‌گه زنگ کیلگن و صحبت قیله‌دیگن چاغده رهبرلیک ایتیلگن بیر راکت باشی‌گه تیککن.
جناب فرهمند نینگ کوپه‌‌یتیریشیچه، بو واقعه‌ده جناب ضیایی نینگ قوروقچی‌لریدن ایکی ته‌سی یره‌لنگن و باشقه هیچ‌کیم گه زیان ییتیشمه‌گن. اونینگ ایتیشیچه، بو موضوع نی جدی شکلده تیکشیریش کشفی و استخباراتی نهادلر مسوولیتی دیر.
تخار سابق جهاد قومندانلریدن بولمیش پیرم‌قل ضیایی اوتگن کونی تخار ولایتی نینگ رستاق تومنی‌نی قلعه گرداب قیشلاغیده هلاک ایتیلدی. اوتگن “یکشنبه” کونی تخار پولیس قومندانلیگی سوزلاوچیسی خلیل اسیر نینگ میدیالرگه ایتیشیچه، جناب ضیایی طالبان جنگریلری بیلن صورت تاپگن آتیشمه‌ده هلاک ایتیلگن.
بو واقعه مسوولیتی‌نی طالبان گروهی بوینیگه آلگن. طالبان سوزلاوچیسی ذبیح‌الله مجاهد نینگ توییتر صحیفه‌سیده یازیشیچه، اوشبو گروه تامانیدن جایلشتیریلگن ماین نینگ پارتله‌گنی سبب، پیرم‌قل ضیایی هلاک ایتیلگن. جناب مجاهد نینگ ادعا قیلیشیچه، بو واقعه‌ده جناب ضیایی نینگ قوروقچی‌لریدن ۴ ته‌سی هلاک ایتیلگن.