سرپل یشاوچیسی بولمیش ۲۳ یاشر آغامحمد، حاضرگچه نیچه ساعت ایچیده حیاتینی اوزگرتیرگن لحظهنی، تیترهگن سیسی بیلن قصه قیلهدی. آتهسی و عایلهنینگ یگانه سرپرستی بولگن نکرالدین، ۳۵ کون آلدین ۹ کیشیلیک عایلهسینینگ قیش موسومی نیازلرینی تامینلش مقصد، شالی ییغیش اوچون بغلان ولایتیگه کیتگن ایکن؛ لیکن قیتیش کونی تنگی تاشقرغان ده زلزله و تاش قولهشی یوز بیرگن که بو واقعه، اوشبو یولدن اوتهدیگن یولاوچیلردن قطارینینگ اولیب و یرهلنیشیگه سبب بولگن.
آغامحمدنینگ ایتیشیچه، زلزله یوز بیرگنیده مدرسه ده بولیب و وضعیتدن خبرسیز ایکن. اوقیتووچیلریدن بیری تنگی تاشقرغان ده یوز بیرگن واقعهده آتهسینینگ یرهلنگنی و بلخ ولایتی کسلخانهسیگه انتقال بیریلگنیدن خبر بیرگن. «نیمه گپ بولگنیدن خبریمیز یوق ایدی؛ یوز بیرگن زلزلهده آتهمنینگ تنگی تاشقرغان ده یرهلنگنیدن خبر بیردیلر. کسلخانه گه بارگنیمیزده آتهم یرهلنگن ایدی.»
نکرالدیننینگ یرهلنگنی، عایلهسینینگ بیلگنیدن کوپراق ایکن. معاینه بولگنیدن کیین تنهسینینگ چپ تامانی بوتونلی قاره بولگنی و قبرغهسیدن اوچ تهسینینگ سینگنی بیللی بولگن. آغامحمدگه کوره، آتهسینینگ کسلخانه گه انتقال بیریلگنیدن اوچ کون اوتگچ، اونینگ دوالنه آلمسلیکلرینی و دوالنیش مقصد کابل گه انتقال بیریلیشینی ایتگنلر؛ بیراق اوشه پیتلرده، نکرالدین اوغلینینگ کوزلری برابریده جان بیرگن.
آتهسینینگ وفات قیلیشی چاغیده بستری یانیده بولگن آغامحمدنینگ ایتیشیچه: «آتهمنینگ نفس آلمسلیگینی کورگنیمده وارخطا بولدیم؛ ضعف قیلدیم و هیچ کیم اونینگ وفات قیلهدی دیب توشینمس ایدی. شفاکارلر اونچه جدی قیینچیلیک ایمس دیگن ایدی؛ بیراق بیردن همه نرسه یکونلندی.»
زلزلهدن جبرلنگن اوشبو کیشی، شفاکارلر آرقهلی انیق شکلده تشخیص یوقلیگیدن شکایت قیلیب و ایتیشیچه، آتهسینینگ وضعیتی درست شکلده تشخیص بولگنیده، تقدیرلرینینگ اوزگریشی ممکن بولهردی. «کسللر شفاکارلرنینگ بیلمسلیگی قربانسی بولمهسین؛ دوالنیش امکانیتیگه ایگه بولمهگنلریده، باشده ایتسینلر. کسل بیلن عایلهسینینگ کونلر امید آرهسیده سقلمهسینلر.»
آتهسینینگ وفات قیلگنی بیلن بیرگه، بیر عایلهنینگ اصلی ستونی ییقیلیب و مسئولیتنینگ آغیر یوکی آغامحمد شانهلریگه توشگن. «آتهم بیزلرگه همه نرسه ایدی؛ حاضر مدرسه درسلری و اوی قیینچیلیکلریدن برچهسی مینی شانهم گه توشیب قالگن. حیات مینی اوچون بیردن قیین بولیب قالدی.»
نکرالدیننینگ عایلهسی حاضرگچه سرپل حادثهلرگه قرشی کورهش ریاستی آرقهلی یالغیز ۲۰ مینگ افغانی یاردم قولگه کیلتیرگن که بو پول، حتا آتهسینینگ کومیلیش مراسمی خرهجتیگه ییترلی بولمهگن. «بو پول هیچ بیر قیینچیلیگیمیزنی حل قیلمهیدی. جبرلنگن عایلهلر نیازی اساسیده و درست شکلده یاردم بیریلیشینی ایستهیمیز.»
آغامحمد قصه قیلیشی جریانیده، نیچه مرته آتهسینینگ سونگی کونلرده یشهگن خاطرهلریگه اشاره قیلگن که بو کیشی، دایم عایلهسیدن احوال آلیب و کوپراق کیچیک بالهسینی ساغینگن ایکن. «آنهم گه زنگ اورهر ایدی و تلیفوننی انصارالله و محمد گه تلیفوننی بیر دیهر ایدی. اولرنی جوده سیویدی. آتهمنینگ آخرگی سوزلری بولگنینی هیچ توشینمس ایدیم.»
آغامحمد، حاضر اچیق حقیقت بیلن روپهره بولگن؛ سرپرستسیز عایله، کوپینچه قرض، کیلهجکنینگ نابیللی بولگنی و حیات قیینچیلیکلری هر کونی فکریده تکرار بولهدی. شوندهی بیرحالده، ینه هم درس و ایش یولیدن، آتهسیدن قالگن مسئولیتلرنینگ بوینیگه تاشیشنی بیان قیلهدی.
