کابل شهرینینگ کوچهلریدن بیریده قدیمی بیر اویده، حیات کیچیرهدی و اوزینی تانیگنیدن بویان دنیا اونینگ اوچون قرانغولیک و یارغولیک آرهسیده تیبرانماقده. قووانچ و امید بیلن توله بیر سیماده، آرزولریگه ییتیشیش سری سعیوحرکت قیلماقده.
۲۶ یاشیده بولگن عبدالله عزیزی اوچون هر بیر آدیم بیر کورهش؛ بیراق بو کورهش خاطرجمعلیک و صبر بیلن تولگن بیر یول دیر. او بوتون وجودی بیلن دنیا گه ایشانهدی، حتا کوزلری همه نرسهنی درست کوره آلمسهده. عبدالله توغیلگنیدن بیری کوریش قیینچیلیگی بیلن کورهشیب کیلماقده. «کاش درست کوره آلسه ایدیم دیب آرزو قیلهمن. مین اوزیمنی باشقهلر بیلن مقایسه قیلمهیمن، اوزیمنی اوزیم بیلن مقایسه قیلهمن. مثلا کوریش امکانیتیگه مکمل شکلده ایگه بولگن بو عبدالله قندهی بولهر ایدی.»
بیزلرنینگ «ایکس» ترماغی ده هم تعقیب قیلینگ!
عبداللهنینگ حیاتی آزراق کوریش امکانیتیگه ایگه بولیشی بیلن بیتمهیدی؛ بلکیم قشاقلیک تحصیل قیلیش آرزوسیگه ییتیشیشی برابریده توختهگن. او ایکی ییل کیتمه-کییت بیلیم یورتگه یول تاپیش سیناوی (کانکور) ده، کابل بیلیم یورتینینگ دری و پشتو تیل و ادبیات بولیملری گه یول تاپگن؛ لیکن کمبغللیک سبب بیلیم یورتگه باره آلمهگن. «باشده کتاب ساتیب آلیش کیرهک و بیر قطار کیشی بو بولیمده ایشلهیدی که کوزدن عاجز بولگن کیشیلر گه سیسلی کتاب توزتهدیلر و پول آلهدیلر. یعنی مینی اونچه امکانیتیم یوق ایدی. اوندن باشقه یول کرایهسی هم بار ایدی. مین حیات کیچیرهگن منطقه، بیلیم یورتدن کوپ اوزاق.»
عبدالله چیکلاولرینی اوزاقلشتیریش اوچون تکنالوژیگه قیزیققن. او، حاضر اداره و مدیریت بولیمیده تحصیل قیلیش یانیده، بیر کونی وبسایت دیزاینری بولیش مقصد، انترنتی فضالریده وبسایت دیزاینلشنی اورگنماقچین. «وبسایت دیزاین قیلیشگه کوپ قیزیققنمین و وبسایت دیزاینلشنینگ اورگهنیشنی ۱۴۰۲-ییلده باشلهب و حاضرگچه دوام بیرگنمین. هر نرسهنی که اورگنسم، تگرام چینلیمیز بار، سیسلی شکلده او ییرگه یوباریب و باشقه کوزدن عاجز کیشیلر اختیاریگه قرار بیرهمن.»
حیات، آزراق کوریش امکانیتیگه ایگه بولگن کیشیلر اوچون تحصیلی، ایش و مستقللیک قیینچیلیکلری بیلن روپهره دیر. جمعیتدهگی ناتوغری یاندهشوولر، قیینچیلیکلردن باشقه بیری دیر که اوشبو یشاوچیلر اونینگ بیلن روپهره بولهدیلر. عبدالله بو توغریده ایتیشیچه: «یولده بیر اریق بار ایکن او ییردن اوتماقچین ایدیم. کیین بیر-ایکی کیشی توخته، اریقدن اوتیش اوچون یاردم بیرهمیز دیدیلر؛ اریقدن اوتگنیمدن کیین فکرم بولدی که مبایلم یوق. او پیت یاشیم کیچیک ایدی و اوشه ییرده اولتیریب و ییغلهدیم. خلاصه مینی کوپ اذیت قیلگنلر.»
سایهلر آرهسیده، عبدالله اوچون عصا بیر یولداش، یول کورستووچی و چراغ بولهدی که شجاعت و ایشانچ بیلن قدم قوییب و یولیگه دوام بیرسه. «بعضی جایلرده، عصا گه نیازیم بولهدی؛ مثلا سرکدن اوتماقده یا-ده هوا قرانغو بولگنیده عصانی آلهمن.»
بیزلرنینگ فیسبوک صحیفهمیزگه باش اورینگ!
عبدالله هر قندهی چیکلاولر بیلن روپهره بولسهده، بو قیینچیلیکلر بیلن مبارزه قیلیب و حیاتگه دوام بیرماقده، بیراق دایم یورهگینینگ بیر چیکهسیده کوریش حسرتی بار. او بیر کونی کوزینینگ نوری قیتیشینی آرزو قیلهدی، لیکن اونینگ اوچون اینگ مهم نرسه توریشگه اراده، دوام بیریشگه قاطعیت و ایشانچ دیر. «اقتصادی و مالی وضعیتیم یخشی بولسه ایدی، کوریش امکانیتیمنی قولگه کیلتیریش اوچون آخرین سعیوحرکتیمنی قیلهر ایدیم. کوزیمنینگ نوری قیتیشی اوچون هیچ بیر حرکتدن واز کیچمهیمن.»
عبدالله روپهره بولگن قیینچیلیکلرنینگ کوپلیگیگه قرهمهی، حیاتیگه ینگی معنا بیریشگه حرکت قیلماقده و مستحکم اراده بیلن اوزینینگ آرزو قیلگن دنیاسینی یرهتماقده.
