آمریکا آق سرایی نینگ اعلام قیلیشیچه، بو مملکت ینگی جمهوررئیسی جوبایدن، آمریکا سابق جمهوررئیسی دونالد ترامپ آرقه‌لی امضالنگن تینچلیک کیلیشوونامه‌سینی قیته تیکشیره‌دی.
آق سرای سوزلاوچیسی نینگ ایتیشیچه، آمریکا طالبان تامانیدن «زوروانلیک نی کمه‌یتیریش و باشقه ترورچیلیک گروه‌لر بیلن علاقه‌لرنی کیسیش» خصوصیده بولگن وعده‌لرینی عمل گه آشیریشی توغریسیده ایشانچ قولگه کیلتیریش نی ایسته‌یدی.
شونینگدیک آمریکا ملی خوفسیزلیک مصلحتچیسی، بو حقده افغانستان ملی خوفسیزلیک مصلحتچیسی بیلن اوچره‌شگن.
بوگون (شنبه ۴- دلو) مملکت ملی خوفسیزلیک کینگش مصلحتچیسی حمدالله محب بیر توییت آرقه‌لی، آمریکا ملی خوفسیزلیک مصلحتچیسی جیک سالیوان بیلن تلیفونی صحبت اوتکزگنیدن خبر بیرگن.
آمریکا و طالبان گروهی آره‌سیده تینچلیک کیلیشوونامه امضالنگنیدن کیین، مذکور گروه جنگریلری چیت‌ایللیک و آمریکالیک کوچلرگه هجوم قیلمه‌گن، بیراق افغانستان امنیتی کوچلری گه قرشی هجوم، شهرلرده ماین پارتله‌تیش و ریجه‌لنگن ترورلرنی کوپه‌یتیرگن.
آمریکا ملی خوفسیزلیک مصلحتچیسی مملکت ملی خوفسیزلیک مصلحتچیسی بیلن اوتکزگن صحبتی ده، طالبان بیرگن وعده‌لریگه قنچه‌لیک عمل قیلگن‌لری اوچون مذکور کیلیشوونامه نینگ تیکشیریلیشدن خبر بیرگن.
آمریکا ملی خوفسیزلیک کینگشی سوزلاوچیسی ایملی هورن نینگ ایتیشیچه، جناب سالیوان مذکور سوزلشووده افغانستان ده دایمی آتیش کیسین تأمین ایتیلیشی اوچون، آمریکا مذکور مملکت تینچلیک پروسه‌سیدن حمایت قیلیشی نی بیلدیرگن.
جناب هورن گه کوره، آمریکا ملی خوفسیزلیک کینگش مصلحتچیسی افغانستان عیاللر و قیزلری نینگ یوتوق‌لرینی سقله‌نیشی اوستیگه اورغوله‌گن.
بوندن آلدین آمریکا تشقی ایشلر وزیرلیگی اوچون بایدن نینگ پیشنهادی گزینه‌سی آنتونی بلینکن نینگ ایتیشیچه، آمریکا و طالبان گروهی آره‌سیده امضالنگن کیلیشوونامه نی تیکشیریش‌لری ممکن.