مین هنگامه جمشیدی، حقوق بولیمیدن فارغ بولگن من و حاضرده آنلاین بیلیم یورتلردن بیریده ایشلهی من. مین صنعی هوش/ذکاوت بیلن تنیشوویم بیر نیچه ییل آلدینگه باریب تقیلهدی. بو مین تحصیلی بورسیه آلیش اوچون عریضه بیرگن وقتیم ایدی. اوشبو بورسیه گه قبول بولیشنینگ شرطلریدن بیری عریضه بیروچیلردن توصیه خط تیارلش ایدی. اوشبو توصیه خطینی یازیش اوچون مین دوستیمدن یاردم سورهدیم. شو دوستیم مینگه صنعی هوشنینگ فایدهلنوچیلر اوچون تقدیم ایتهدیگن قولیلیکلری و امتیازلرینی ایتیب بیردی.
او مینگه اوشبو پلتفرمهدن فایدهلنیش و تنیشیش اوچون لینکنی یوباردی. باشلنیشده مین بو پلتفرمه بیلن کوپ تنیش ایمس ایدیم و حتا اوشبو ایلغار تکنالوژیگه نسبتن ایجابی قرهش هم شکللنمهگن ایدی، بیراق صنعی هوشدن بیر نیچه مرته فایدهلنگنیمده، مین ینگی بیر حادثه بیلن – جوده تیز و کوچلی بیر قدرت بیلن یوزلشدیم.
صنعی هوش بیلن تنیشوویم شو ییرده باشلندی. توصیه خطینی یازیش ضرورتی مینی ایلغار و انسانیت تاریخیده کم اوچرهیدیگن تکنالوژی بیلن تنیشتیردی. اوشبو تنیشو حیاتیمنینگ ینگی بیر بابینی باشلشیگه سبب بولدی. کونسهیین بو تکنالوژی بیلن تنیشوویم آرتیب بارماقده و تورلی دستورلرده اوندن فایدهلنه من. صنعی هوش فایدهلنوچیلر اوچون یرهتگن قولیلیکلر و امتیازلرنی ینهده یخشی توشونیب بارهیپمن. البته، امتیازلر بیلن بیرگه، صنعی هوشنی معیاریدن آشیریب و ترتیبسیز ایشلهتیش نتیجهسیده یوزهگه کیلهدیگن معمالر و سلبی عاقبتلر هم موجود، و بو حقیقتنی انکار ایتیب بولمهیدی. یاش فایدهلنوچیلر اوشبو حقیقتنی حساب گه آلیشلری کیرهک.
گرچی صنعی هوش بیلن تنیشوویم توصیه خطینی یازیش ضرورتیدن باشلنسه-ده، وقت اوتیشی بیلن بو تکنالوژیدن فایدهلنیش حیاتیمنینگ بیر قسمی گه ایلنگن. حاضرده مین اوشبو تکنالوژیدن کینگ کولمده فایدهلنهمن. بو تکنالوژی مین اوچون دایمی یاردمچی و یوریقچی بولیب خذمت قیلهدیگن همکار گه ایلنگن.
مین اوشبو پلتفرمهدن ایش و کسبی یونهلیشده فایدهلنیشگه حرکت قیلهمن. شونی هم حساب گه آلیش کیرهک کی، بعضاً صنعی هوشنی حددن تشقری ایشلهتیش و برچه ایشلرنی اوشبو تکنالوژی گه یوکلش انساننینگ ایجادی قابلیتی و تنقیدی روحینی سوسهیتیرهدی، اینیقسه بوگونگی کونده کینگ کولمده اوشبو تکنالوژیدن فایدهلنهیاتگن یاش اولاد اوچون. بو ایسه یاشلرنینگ استعدادی و ایجادی صلاحیتینینگ رواجلنیشگه سلبی تأثیر کورسهتیشی ممکن.
شو سببلی، یاش اولاد و اوشبو تکنالوژینی ینگی ایشلتهدیگن فایدهلنوچیلر صنعی هوشدن فایدهلنیش اصولی و مقصدلریگه ایریشیش درجهده اعتبار قرهتیشلری کیرهک، عکسحالده، سلبی تأثیریگه دوچ کیلیشلری ممکن. یاشلر صنعی هوشدن توغری مقصدلر اوچون و ترتیبلی اصولده فایدهلنیشلری ممکن.
اوشبو تکنالوژی، اینیقسه تیل اورگنهیاتگنلر اوچون جوده کتته قولیلیکلر یرهتدی. هر کیم اوزی قیزیققن تیلنی اوشبو تکنالوژیدن فایدهلنیب، قیسقه وقت ایچیده تیزراق و انیقراق اورگهنیشی ممکن؛ لیکن شونی اونیتمسلیک کیرهک کی، صنعی هوشنینگ برچه معلوماتلریگه تولیق ایشانیب بولمهیدی. صنعی هوشدن فقط تنلب، احتیاطکارلیک بیلن فایدهلنیش لازم. ایجادی قابلیت و تنقیدی فکرلشنی اونیتمسلیک کیرهک. افسوس کی بعضاً طلبهلر اوز علمی و تدقیقات فعالیتلرینی اوشبو پلتفرمه گه یوکلهیدیلر، بو ایسه خواطر گه سبب بولهدیگن حالت دیر.
