بدخشان محلی مسوول‌لری نینگ ایتیش‌لریچه، اوشبو ولایت نینگ مایمی تومنی طالبان قولیگه سقوط قیلگن.
مایمی تومنی نینگ ولسوالی کامبیز قربانی، اوشبو تومن نی طالبان نظارتی‌گه اوتگنینی تصدیق‌لگن.
شونینگدیک، امنیتی منبع‌لردن بیری نینگ سلام‌وطندارگه ایتیشیچه، مایمی تومنی نینگ پولیس قومندانی، خوفسیزلیک مدیری ئ جنایت‌لرگه قرشی کوره‌ش مدیری شامل امنیتی کوچلردن بیرقطار طالبان تامانیدن اولدیریلگن.
منبع نینگ کوپه‌یتیریشیچه، حاضرده هم امنیتی کوچلر و طالبان آره‌سیده آتیشمه‌نی دوامی بار.
عین‌حالده، بدخشان ولایتی کینگش اعضاسی احمد جاوید مجددی نینگ ایتیشیچه، مایمی تومنی نینگ پولیس قومندانی و خوفسیزلیک مدیری طالبان هجومی سبب، هلاک ایتیلگن.
بدخشان پولیس قومندانلیگی سوزلاوچیسی ثناالله روحانی، امنیتی کوچلر تلفاتی‌نی تصدیق‌لگن، بیراق اوشبو تومن نینگ پولیس قومندانی هلاک ایتیلگنینی رد قیلگن.
بدخشان ولایتی نینگ مایمی تومنی نیچه پیت آلدین طالبان قمراویگه قرار تاپگن ایدی.
