سلاموطندارنینگ ۲۸ یاش (۱۴ قیز و ۱۴ اوغیل) بیلن صحبتی شونی کورستهدی کی، بو یاشلر اجتماعی ترماقلرده تیکین شکلده ترقهتیلگن ویدیولردن فایدهلنیب، اوزلرینینگ شخصی، تعلیمی و مهارت کونیکمهلرینی رواجلنتیریش گه اولگورگن.
گزارش معلوماتلریگه کوره، ۹ نفر برنامه یازیش، اکسس، نتورک و گرافیک دیزاینری کبی کمپیوتری نرمافزارلر تعلیمی، ۶ نفر چیت ایل تیللری و ۴ نفر ایسه ویدیونی ایدیت قیلیش و مهارت موضوعلرینی ایشلب چیقریش بولیمیده اوزلری اوچون ایش امکانیتینی یرهتگنلر.
اوشبو یاشلرنینگ ایتیشیچه، دیجیتال تعلیملرینی ایکی، اوچ، تورت و آلتی آیلیک باسقیچلرده یوتیوب، فیسبوک، اینستاگرام، تلگرام و واتساپ کبی اجتماعی ترماقلر آرقهلی اورگهنیشگن.
ارزانلیگی، عنعنهوی تعلیم مرکزلریگه کیره آلمسلیک و تعلیمنینگ هر وقتده، هر جایده آلالمسلیک، یاشلرنینگ بیپول دیجیتالی تعلیم گه قیزیقیشی، اوشبو یاشلرنینگ اجتماعی ترماقلردهگی ویدیولردن فایدهلنیش اساسی عاملی دییلگن.
غزنی یشاوچیسی ۲۲ یاشر احمدضیا تابش و کابللیک ۲۵ یاشر ذکیه مسلم ذهاد، آنلاین تعلیمی ویدیولردن فایدهلنیب چیت ایل تیللرینی اورگنیش گه موفق بولگنلرینی ایتهدی.
احمدضیا تابش شوندهی دییدی: «قریب تورت آی یوتیوب آرقهلی آنلاین تورک تیلینی اوقیدیم و جوده یم اونیملی ایدی، برچهمیز گه بیللی اویده امکانیت بار و بیلیم یورت فضاسینی اویده تشکیل ایتیش ممکن، شونینگ اوچون آنلاین شکلده اوقیش گه دوام بیریشنی ایستهی من.»
کابل یشاوچیسی ذکیه مسلم ذهاد گه کوره: «یوتیوب و واتساپده نشر قیلینگن ویدیولرنی تیکین شکلده ایزلهی من، کوپینچه تیل اورگنگن من.»
کابل یشاوچیسی ۲۳ یاشر سارا احمدینینگ ایتیشیچه، آنلاین ویدیولر آرقهلی کمپیوتر و گرافیک دیزاین بوییچه آلتی آیلیک بیپول دیجیتالی تعلیم کورسینی اورگنگن. «دیجیتال مکانده بیپول تعلیم آلگن من. تعلیم اساساً گرافیک دیزاین، انگلیس تیلی و رقملی مارکیتینگ ساحهلریگه قرهتیلگن ایدی. تعلیملر منتظم روشده دوام ایتگن. مین ۱۴۰۲ ییل باشیدن آنلاین اوقیشنی باشلهدیم.»
کابل یشاوچیسی و اقتصاد فاکولتهسینی بیتتیرگن ۲۴ یاشر سمیعالدین عزیزی، اوچ آی آنلاین تعلیم کورسینی تلگرام و واتساپ آرقهلی اوقیگن، دیجیتال مارکیتینگ مهارتلری، ساتیش و مجاز بیلن قندهی یاندهشیشنی اورگنگنینی بیلدیرهدی.
او شوندهی دییدی: «مین تیکین شکلده دیجیتال فضاسیدن تعلیم آلدیم، کوپراق مارکیتینگ، آنلاین ساتیش، محتوا ایشلب چیقریش، ساغلیق مصلحت بیریش و مجاز بیلن قندهی علاقه قوریش ساحهلریده تعلیم کوردیم.»
کابللیک ۲۷ یاشر سونیل بیات گه کوره، یوتیوب و فیسبوکده ترقهلگن ویدیولردن فایدهلنیب، خبر یازیش همده ویدیو ایدیت قیلیش کبی مهارتلرنی اورگنگن. اونینگ ایتیشیچه: «اوشبو دورده محتوا ایشلب چیقریش، اجتماعی ترماقلرنی باشقریش و شونینگدیک ییتکرمه مهارتلرینی اورگهنیشگه اولگوردیم. بونی یانیده، بعضی ویدیولرنی ایزلردیم، یوتیوب و فیسوکده ایزلهگن ویدیولردن کوپ نرسهلرنی اورگندیم.»
اجتماعی ترماقلرده تعلیم آنلاین ویدیولرنی اورگهنیش اوچون تنلهگن یاشلرنینگ ایتیشیچه، دیجیتالی تعلیم، مکتب و بیلیم یورت فضاسینی اوییده یرهتیش امکانینی بیرگن؛ بیراق بو اورگهنیشلر صفتلی انترنت و موبایل همده کمپیوتر کبی مناسب امکانیتلر یوقلیگی کبی قیینچیلیکلر بیلن بیرگه بولگن.
کابلدن ژورنالیزم فاکولتهسی طلبهسی ۲۴ یاشر عبدالواحد و پروانلیک ۲۰ یاشر یلدا اصیل تیموری، دیجیتالی تعلیم قیینچیلیکلری حقیده ایریم قیینچیلیک بیلن دوچ بولگنلرینی ایتیشهدی.
عبدالواحد شوندهی دییدی: «اساسی قیینچیلیک انترنت قیمتلیگی، اورگهنیشگه قیزیقهدیگنلر اوچون مناسب لبتاپ یوقلیگی و انترنت ضعیفلیگی – بعضی جایلرده هیچ ایش بیرمهیدی.»
یلدا گه کوره: «اساسی مشکل کمپیوتر و انترنت یوقلیگی ایدی. اوللری اورگهنیشنی موبایل تلفون آرقهلی ایزلر ایدیم، جودهیم قیین ایدی؛ انترنت ضعیفلیگی طفیلی ویدیولرنی یخشی ایزلهی آلمهی یا کی دانلود قیله آلمسدیم.»
تکنالوژی بوییچه بیلرمان بدرالله دانشنینگ ایتیشیچه، اجتماعی ترماقلرنینگ انیق منبع و صفتی گه قرهب اورگهنیش ممکن. او شوندهی دییدی: «اورگهنیش وقت و جایگه قرهمهیدی و فایدهلنووچیلر احتیاج و قنچه اورگهنیشلری امکانیتینی بیرهدی. بو اورگهنیشلر انیق منبع، موضوع صفتی و تعلیم ستندردلریگه تینگلیگیگه باغلیق. پلتفرم یخشی تنلنسه، آنلاین اورگهنیش آدملرنینگ اساسی احتیاجلرینی حل قیله آلهدی.»
شو بیلن بیرگه، مخابرات و تکنالوژی معلومات وزیرلیگی مسئوللری، سونگی تورت ییل ایچیده انترنت و قونغیراق قیمتینی پس توشیریشده ایریم یوتوقلر گه ایگه بولگنلرینی معلوم قیلیشهدی.
مخابرات و تکنالوژی معلومات وزیرلیگی سوزلاوچیسی عنایتالله الکوزی سلاموطندار بیلن صحبتده شوندهی دییدی: «بیز افغانستانده قونغیراق و انترنت نرخلرینی پسهیتیریش گه موفق بولدیک. اجتماعی ترماقلر و علاقه ترماقلری صفتی اوچون مهم و اساسی یونهلیشلردن بیری افغانستانده فریکونسی ایدی. بیز میلادی ۲۰۲۴-ییلده اوچ خیل باندده ۴۸ ته فریکونسینی علاقه ترماقلریگه اجاره گه بیریش گه موفق بولدیک. علاقه ترماقلری هم بو ساحهده تخمیناً ۹۸ میلیون دالر مقداریده سرمایه کیریتدی و شو آرقهلی بیز افغانستان بویلب خذمتلرنی 4G درجهسیگه کوتریشیمیز ممکن بولدی.»
بیلرمانلر فکریچه، دیجیتالی تعلیم – حضوری تعلیم گه مهم مقابل صفتیده موجود قیینچیلیکلر گه قرهمی یاشلرنی کوچهیتیریش و اولرنینگ کونیکمهلرینی رواجلنتیریشده مهم رول اوینهیدی.
