کابل بوگون اوچ پارتلش گه شاهد بولدی. کابل پولیس قومندانلیگی سوزلاوچیسی فردوس فرامرز نینگ ایتیشیچه، بیرینچی پارتلش بوگون (چهارشنبه ۲۲- دلو) ایرته‌لب ساعت ۸:۱۲ اطرافیده پغمان تومنی گه تیگیشلی قلعه عبدالعلی منطقه‌سیده امنیتی کوچلرنینگ بیر رنجر موتریده یوزبیرگن. اونگه کوره، بو پارتلش نینگ تلفاتی یوق ایکن.
فرامرز نینگ کوپه‌یتیریشیچه، ایکینچی پارتلش ایرته‌لب ساعت ۸:۳۸ اطرافیده کابل شهری نینگ ۲- ناحیه‌سیگه تیگیشلی قوای مرکز منطقه‌سیده یوزبیرگن. بو پارتلش فورتینر تیپلی بیر موترنی نشان گه آلگن. کابل پولیس قومندانلیگی سوزلاوچیسی گه کوره، مذکور پارتلش ده ۴ کیشی یره‌لنگن.
اوچینچی پارتلش ایسه ایرته‌لب ساعت ۸:۵۵ اطرافیده بره‌کی تورت یولی نینگ یقیین‌لیگیده لندکروزر تیپلی بیر موتر نی نشانگه آلگن. کابل پولیسی قومندانلیگی سوزلاوچیسی فردوس فرامرز نینگ ایتیشیچه، بو پارتلش ده ایکی کیشی هلاک و باشقه بیر کیشی یره‌لنگن. او بو حادثه‌لر حقیده آرتیق تفصیلات بیرمه‌گن.
بیراق حادثه شاهدلری نینگ ایتیش‌لریچه، اوچینچی پارتلش ده ۳ کیشی هلاک بولگن. شونده‌ی بیرحالده، ایچکی ایشلر وزیری محمدمسعود اندرابی کابل شهری نینگ ۵- خوفسیزلیک حوزه قومندانی محمدزی کوچی هلاک ایتیلگنیدن کیین مذکور حوزه گه باریب اوچینچی پارتلش ده جناب کوچی بیر قوروقچیسی بیلن هلاک ایتیلگنی نی تصدیقله‌گن.
شونینگدیک جمهورلیک ریاست بیرینچی اورین‌باسری امرالله صالح فیسبوک صحیفه‌سیده جناب کوچی نینگ هلاک ایتیلگنی نی تصدیق‌لبب و اونینگ انتقامی نی آلیش اوچون سوزبیرگن. جناب صالح بو حادثه نی طالبان گروهی گه نسبت بیرگن.
بوگونگی پارتلش‌لر مسئولیتی نی حاضرگچه بیرار گروه یا-ده شخص بوینیگه آلمه‌گن.
