کوز موسومینینگ کوچلی شماللریده لرزهگه کیله یاتگن سمنگان ولایتی سرکلریدن بیرینینگ چیکهسیده قوریلگن بیر خیمه، ۱۲-عقرب زلزله یوز بیرمسدن آلدین بالهلری بیلن بیرگه تینچ بیر اویده حیات کیچیرهدیگن بیر عیالنینگ بوگون باشپنهسیگه اَیلنگن.
آلتی باله آنهسی و سمنگان ولایتی خُلم تومنی یشاوچیسی بولمیش زرغونه، بیر کونی یالغیز اوتیب-قیتیش یولی بولگن بیر سرک چیکهسیده، یاردم بیریلگن بیر خیمهده حیات کیچیرماقده. سرک چیکهسیده قورگن خیمه یانیده اوتیب-قیته دیگن کیشیلرگه قرهب اولتیرگن. کوزلرینینگ یاشینی سیریب و ایتیشیچه، بیر کونی قیته اویی گه باریشنی آرزو قیلهدی که حاضر او ییرده تاش-توپراقدن باشقه هیچ نرسه قالمهگن.
مذکور عیال، حیاتی وضعیتیدن خواطر بیلدیریب و ایتیشیچه: «سرک یانیده، کوچه ایچیده خیمه قورگنمیز و بو ییرده حیات کیچیرهمیز. کوپ قیین دیر، کیچه و کوندوزنی قورقوو بیلن اوتکزهمیز. بعضی کیچهلر بالهلریم قورقهدی، اهالی اوییگه باریب ایشیکلرینی تقیللتهمن و هیچ کیم ایشیگینی آچمهیدی.»
خیمه زرغونه و بالهلری اوچون بیر باشپنه بولگنی بیلن، بیراق کیچهنینگ قرانغولیگی و کوچهدهگی سیسلر، اوشبو آنه بیلن فرزندلرینینگ اویقو و آسایشتهلیگینی آلگن. زرغونهنینگ ایتیشیچه، شهر چراغلری اوچیریلیشی و اهالینینگ اوخلهشی بیلن او و بالهلرینینگ قورقووی باشلنهدی که آزگینه سیس بیلن هم اویقودن قورقیب تورهدیلر. «زلزلهدن بولگنیدن بیری کیچهدن ایرتنگگچه اویقومیز یوق. حاضرگچه زلزله دهشتی فکرمده. شمال بولگنی یا-ده بیران سیس کیلگیده، بالهلریمنی قوچاغیمگه آلهمن و خدایا ینه زلزله می بولدی دیهمن.»
زرغونهنینگ توقیز یاشر صفا اسمی قیزیگه کوره، ساووق هواده یشش جودهیم قیین دیر. «سرک یانیده خیمه آستیده حیات کیچیرهمیز. زلزلهده اوییمیز بوزیلدی. کیچهلر هوا ساووق بولهدی و قورقهمیز. بیر موتر اوتگنیده هم قورقهمیز که بیزلرنی باسمهسین دیب. بیزلرگه بیران اوی قوریب بیرسینلر که آرام فکر بیلن اوخلهیلیک.»
لیکن اویی بوزیلگنی و خیمهده حیات کیچیریش زرغونهنینگ اذیت قیلمهیدی؛ بلکیم او یاردم بیریلیشده نابرابرلیک شکایت قیلیب و بو یاردملرنینگ درست شکلده ترقهتیلیشینی سورهگن. «بیزلرگه بیر باشپنه قوریلیشینی سورهیمیز. فقط سینگیللریمیز، ایناغهلریمیز و آنهلرجانلریمیزدن بیزلرگه بیر باشپنه قوریب بیریشلرینی ایستهیمیز. یاردم بیرسینلرکه حیاتیمیز وضعیتی و اقتصادیمیز یخشیراق بولسین. اوچ ته اتاقیمیز بوزیلدی، کمیده ایکی اتاق قوریب بیرسینلر.»
سمنگان ولایتی خُلم تومنی اورینباسری زینالله بخارینینگ ایتیشیچه، امکانیتلر آزلیگی سبب، جبرلنگن عایلهلردن قطاریگه آزراق توجه قرهتیلگن. «ولایت و تومنلر بویلب کمیتهلر قورگنمیز که برچه نیازمندلرگه یاردم بیریلسه. بیر قطار منطقهده یاردم بیریلمهگن کیشیلرنینگ قالگنینی تصدیق قیلهمیز. تورلیخیل نهادلر آرقهلی اوشبو عایلهلرگه یاردم قولگه کیلتیریب و اولرگه ترقهتیلیشی اوچون سعیوحرکت قیلهمیز.»
سمنگان و مملکت شمالیدهگی نیچه ولایتده ۱۲-عقرب ده یوز بیرگن زلزله نتیجهسیده، یوزلب اوی ویران بولیب و عایلهلردن قطاری حاضرگچه خیمهلرده حیات کیچیرماقده.
