ایش تاپیش و یخشی کیلهجک توزهتیش آرزوسی، بلخ ولایتی چمتال تومنی یشاوچیلری بولمیش بیش یاش اوچون قیتیب کیلمس بیر سفر گه اَیلندی. نیچه کون آلدین چمتال تومنی «قاسم جان» قیشلاغیده ییگیتلرینی امید بیلن یوبارگنلری اویلر، بوگون ایسه ماتم مراسمینی اوتکزماقده.
مذکور بیش یاش اوتگن هفته ایران گه کیتیش مقصد، یولگه چیقیب و نیمروز چوللریدن اوتیش جریانیده، سووسیز و هوا ایسیقلیگی نتیجهسیده وفات ایتدیلر؛ حاضر ایسه توغیلگن جایلریگه انتقال بیریلیشدن کیین توپراققه تاپشیریلگنلر.
قربانلردن بیرتهسینینگ آتهسی عبدالخبیرنینگ ایتیشیچه، ۱۹ یاشر اوغلی نیچه مرته سعیوحرکتدن کیین، سفر قیلیش اوچون عایلهسینینگ رضایتینی قولگه کیلتیره آلگن. «نیچه مرته رخصت بیریشیمیز اوچون اصرار قیلدی. نیمروزدن یکشنبه کونی حرکت قیلگن ایدیلر. دوشنبه کونی هر قنچه علاقه قورماقچین بولدیک، نمبرلری اوچیریلگن ایدی. آخشم بولیشی پیتلرده جواب بیریب و ایکی موتر بولگنلری و بیرتهسی چولده بوزیلگنینی ایتدیلر. اوندن کیین نیمروز مسئوللرینینگ خبر بیرگونگه قدر هیچ بیر خبر یوق ایدی.»
اوشبو واقعه قربانلریدن بیرتهسی محمدشکیبنینگ یقینلریدن بولمیش محمد (مستعار آت) گه کوره، مذکور ییگیتلر یالغیز ایش تاپیش و عایلهلرینینگ صرف-خرهجتینی تامینلش مقصد مهاجرت یولیگه چیققن ایدیلر. «اوشبو یاشلر بیر لقمه نان تاپیش اوچون کیتدیلر که آته و آنهلریگه بیر لقمه حلال نان تاپسهلر؛ تقدیر بو رقم ایکن و یولده جان بیردیلر.»
ییغی و ماتم آرهسیده، قربانلرنینگ صنفداشلری هم بار. نیچه کون آلدین بیر صنفگه اولتیریب درس اوقهدیگن یاشلر، بیراق حاضر ایسه دوستلری بیلن آخرین مرته وداعلشماقدهلر.
اولر، یاشلرنینگ یخشی بیر کیلهجک توزهته آلیشی و ناقانونی خوفلی مهاجرت یولی گه چیقیش اوچون هیچ کیمنینگ مجبور بولمسلیگی مقصد، اسلام امیرلیگیدن یاشلر گه ایش و تعلیم امکانیتی یرهتیلیشینی سورهیدیلر.
قربانلر دوستلریدن بیری معین گه کوره: «اولر ایش اوچون کیتدیلر. مینی صنفداشلریم ایدی. متین و شکیب کیلهجکلرینی توزهتیش اوچون بو یولگه چیققن ایدیلر.»
شونینگدیک قربانلر دوستلریدن باشقه بیری محمدصابرنینگ ایتیشیچه، یاشلردن قطاری ایش و تعلیم امکانیتلری یوقلیگی سبب، ناقانونی مهاجرتگه مجبور بولهدیلر. «حکومتدن یاشلرگه ایش و تحصیل امکانیتی یرهتیلیشینی سورهیمیز که مملکتنی ترک قیلیشگه مجبور بولمهسینلر و جانلرینی قاچاق یولیده قولدن بیرمهسینلر.»
بلخ ولایتی قاسمجان قیشلاغی یشاوچیلریدن بیری محمد یونس، اوشبو واقعهنی بو قیشلاق یشاوچیلری اوچون کته بیر فاجعه بیلهدی. «بو قیشلاغیمیز اوچون کته بیر فاجعه دیر. یاشلریمیزدن بیش تهسی ایشسیزلیک و نابیللی بیر کیلهجک اوچون مهاجرت یولیگه چیقدیلر، بیراق هیچ قچان ییتیشه آلمهدیلر و ریگلر و چوللر آرهسیده اولدیلر.»
محل آقسقاللریدن بیری محمدفتح رشیدینینگ ایتیشیچه، قربانلردن کوپینچهسی ۱۷ دن ۱۹ یاش آرهسیده بولیب و اولردن قطاری ۱۱ صنف اوقووچیلریگه ایکن.
او مسئول نهادلردن، بو واقعه بیللی بولیشی اوچون مذکور دوسیهنینگ جدی شکلده تیکشیریلیشی سورهگن. «مذکور یاشلر ایش اوچون ایران گه کیتگن ایدیلر، بیراق یولده بو حادثه بیلن روپهره بولدیلر. بوگون اولرنینگ توپراققه تاپشیریلیش مراسمی اوتکزیلدی. قریب بیر هفته آلدین کیتگن ایدیلر. ۳-۴ کون آلدین عایلهلریگه خبر بیریلدی. بیزلرگه ییتیشگن معلومات اساسیده، قاچاقچیلر اولرنی یوللرگه تشلهب کیتگن. حکومتدن بو موضوعنینگ جدی شکلده تیکشیریلیشینی سورهیمیز.»
شوندهی بیرحالده، نیمروز امنیه قوماندانلیگی سوزلاوچیسی گلمحمد قدرتنینگ ایتیشیچه، بو واقعهده اولگن بیش کیشی بلخ ولایتی یشاوچیسی بولیب و اوشبو گروه اعضالریدن باشقهلرینینگ تاپیش اوچون اختریش عملیاتی دوام قیلماقده. «۱۴ کیشی حاضرگچه لادرک دیر. منطقهده کوچلریمیز تیکشیرماقده، بیراق حاضرگچه هیچ بیر ینگی مورد تاپیلمهگن. جسدی تاپیلگن بیش کیشیدن برچهسی مزارشریف یشاوچیشی دیر. اختریش و قوتقریش عملیاتی دوام قیلماقده.»
بوندن آلدین، نیمروز ده محلی مسئوللر، اوشبو بیش کیشینینگ ایران گه ناقانونی روشده بارماقچین بولگن ۱۹ کیشیلیک بیر گروه اعضالریدن بولگنینی تصدیقلهگن ایدی. شونینگدیک بو گروهدهگی باشقه ۱۴ کیشینینگ تقدیری حاضرگچه بیللی ایمس.
