سمنگان ولایتی فیروزنخچیر تومنینینگ فقیرآباد قیشلاغیده یوز بیرگن زلزلهدن ۲۰ کون اوتگنی بیلن، بیراق حاضرگچه بوزیلگن اویلرنی توپراق هیدی تولدیرگن. مذکور ویرانهلر آرهسیده ۲۱ یاشر فهیم اسملی بیر ییگیت، اوزی بیلن بیر حکایهنی تاشیدی که بو، نهفقط بیر کیچهنینگ حکایهسی؛ بلکیم ینگی باشلنه یاتگن بیر حیاتدهگی برچه آرزولرنینگ اورتهدن کیتیش حکایهسی دیر.
فهیمنینگ قوشمه حیاتی باشلنگنیدن یالغیز ایکی کون اوتگن ایکن؛ خوشلیک و سیوگیدن توله بولیشی کیرهک بولگن کونلر، امیدسیزلیککه اوزگریب و اولرنینگ اویلری توپراق و ویرانهلر آستیده قالگن. عایلهسی نیچه دقیقهدن کیین او و تازه کیلیننی ویرانهلر آستیدن چیقرگنلر.
اونینگ ایتیشیچه: «توی قیلگنیمیزدن ایکی کون بولگن ایدی. کیچه زلزله بولدی و قیامت بولگن کبی ایدی. اویده ایدیک و تام قولهب توشدی، بیر چاره قیلیب اویدن چیقه آلدیک. برچه جاینی تاش و توپراق آلگن ایدی. نیچه کونگچه وضعیتیمیز یخشی ایمس ایدی، حاضر ساغهیگنمیز.»
ییللر ایشچیلیک قیلیب و ینگی حیاتی اوچون کیچیک ایکی اوی تشلهگن فهیم، حاضر اوندن هیچ بیر اثر قالمهگن مذکور ایکی اوی قرشیسیده توختهگن. نیچه ییللیک محنتی، جهیزیه اوسکونهلری و قوشمه بیر حیاتنینگ باشلهنیش نشانهلری… برچهسی بیر نیچه ثانیهده ویرانهلر آستیده کومیلیب قالگن.
اونینگ کوپهیتیریشیچه، حاضرگچه خاتینی آز بیر سیسنی ایشیتگنیده قورقیب تورهدی و خواطرلنهدی. «بو کیچهلر بیراز سیس بولگنیده هم خاتینیم قورقیب تورهدی. بیراز سیس بولگنیده قاچیب چیقهمیز.»
حاضر ایسه فهیم خاتینی بیلن بیرگه اوشبو ساووق هواده خیمهدن حیات کیچیرهدیلر. مذکور یاش کییاو و کیلین، حیات کیچیریش اوچون نه تینچ بیر اویلری بار و نه هم یرهلری دوالنیشی اوچون آسایشتهلیکلری بار. زلزله تکرارلنیشی قورقووی، اولرنی کیچهوکوندوز آغیر سایه کبی ایگهلب آلگن. حاضرگچه قولگه کیلتیرگنلری یاردملر، یالغیز اولرنینگ تیریک قالیشی اوچون ییترلی بولگن، نه باشپنه قورلیشی.
فهیمنینگ کوپهیتیریشیچه: «اوییمیز ۱۰۰ فایز بوزیلگن. اوشبو یاردملر آز دیر و اوییمیزنی قیته قوره آلمهیمیز. مذکور یاردم اوییمیزنینگ ۱۰ فایزینی هم قوره آلمهیدی. دولتدن بیزلرگه یاردم بیریشلرینی ایستهیمیز که اوییمیزنی قورهیلیک. هوا ساووق بولگن و خیمهده تیریکچیلیک بولمهیدی. بو ییرگه کیلگنیمیزدن کوپ ییل بولگن و یالغیز بو ایکی اوینی قوره آلدیک. باشقه ۳۰ ییلده ایکی اوی قوره آلمهیمیز.»
زلزله، نهفقط فهیمنینگ اویینی ویران قیلگن؛ بلکیم تینچلیگی، امنیت و اولرنینگ قوشمه حیات توغریسیدهگی آرزولرنی هم بوزگن. هدفلی و دایمی حمایت بولمسدن، فهیم کبی عایلهلر کیلهجگی باشپنهسیزلیک و خواطر آرهسیده قالیشی ممکن؛ هوا ساووق بولیشی بیلن، هر کونی قیینراق، قیغولنتیرووچی و انیقسیز بولهدیگن کیلهجک.
