امتحان‌لر ملی اداره‌سی، دوشنبه کونی، ۱۳ سنبله، یالغیز ییگیت‌لر حضوری بولگن اوشبو ییل کانکور سیناوی نتیجه‌سینی اعلام قیلدی.
اوشبو ییل کانکور سیناوی، قانیقرلی نتیجه آلگن ییگیت‌لر تامانیدن خوش قرشی‌لنگن بولسه ده؛ بیراق ییل‌لر بویلب کانکور سیناوی اوچون تیارگرلیک کورگن قیزلر اوچون ناخوش خبر بولگن.
مکتب ده ۱۲-صنف گچه عالی درجه ده بیرینچی بولیب و شفاکار بولیشنی آرزو قیلگن اوقووچی قیزلردن نبیلا ملک‌زاده نینگ ایتیشیچه، اوشبو ییل کانکور سیناوی گه قتنه‌شیش اوچون تیارگرلیک کورگن بولسه ده، اما اشتراک ایتیش دن محروم بولگن. نبیلا گه کوره، تقدیرسیزلیگیدن عذاب چیکماقده.
او نینگ سلام‌وطندار گه ایتیشیچه: «قیزلر حقیده بولگن پیام‌لر و تقدیرسیزلیک دن عذاب چیکه‌من، جمعیت ده قیزلر و ییگیت‌لر آره‌سیده تبعیض بوتکول یوق بولیشنی ایسته‌ی من.»
بیزلرنینگ فیسبوک صحیفه‌میزگه باش اورینگ!
۱۴۰۲-ییل ده کانکور سیناوی دن محروم بولگن قیزلردن باشقه بیری مدینه محمدی گه کوره، حاضرگی وضعیت و تقدیرسیزلیک اونی روحی قیینچیلیککه روپه‌ره قیلگن.
او نینگ کوپه‌یتیریشیچه: «مین و باشقه اوقووچی قیزلر نینگ پیام‌لریمیز حکومت مسئوللری گه ییتکیزیلیشنی ایسته‌ی من، سیزلر بو قرارلرینگیز بیلن سینگیل‌لرینگیز و کیله‌جک‌لرینی قیینچیلیک بیلن روپه‌ره قیله‌سیزلر.»
کانکور نتیجه‌سی اعلامی دن کیین، حاضر کابل ده بولگن اسلامی همکارلیک‌لر تشکیلاتی هیئتی، ایچکی ایشلر وزیرلیگی سرپرستی سراج‌الدین حقانی بیلن ملاقاتی ده ایتیشیچه، افغانستان ترقیاتی قیزلر نینگ اوقیشی گه باغلیق دیر. اسلامی همکارلیک‌لر تشکیلاتی نینگ اوشبو هیئتی، قیزلر گه تحصیل زمینه‌سینی یره‌تیلیشینی طلب قیلگن.
اسلام امیرلیگی ایچکی ایشلر وزیرلیگی نینگ سرپرستی اوشبو خواست گه جواب، مذکور تشکیلات نینگ صبر قیلیشینی سوره‌گن. یشاوچیلر ایکی ییل دن بویان صبر قیلیب کیلماقده و سرپرست حکومت اوقووچی قیزلر یوزی گه حاضرگچه مکتب و بیلیم‌لر ایشیگینی آچیش اوچون اقدام قیلمه‌گن.
بیزلرنینگ توییترده هم تعقیب قیلینگ!
عیال حقوقی فعالی سوسن خالق‌یار، اسلام امیرلیگی نینگ اوشبو حرکتیدن تنقید قیلیب ایتیشیچه: «کوپ سانده اوقووچی قیزلر جنسیت‌لری طفیلی کانکور سیناوی گه قتنشه آلمه‌دیلر، قیزلر نینگ استعدادی و چیککن زحمت‌لری برابری ده قنده‌ی قیلیب بی فرق بولیش ممکن.»
شو بیلن بیرگه، جمعیت‌شناس ضیاءالحق شمس، افغانستان ترقیاتی و کیله‌جگی اوچون قیزلر نینگ تحصیل دن محروم قیلیش یامان عاقبت‌لریدن آگاه‌لنتیره‌دی.
او نینگ کوپه‌یتیریشیچه: «تأسف بیلن بو کبی نامعقول قرارلر بیلن آیدین کیله‌جک نی کورمه‌ی من، کیله‌جک ده آنه‌لر اوز باله‌لرینی قنده‌ی قیلیب سرپرست‌لیک قیلیش‌لری ممکن، حیات‌لرینی قنده‌ی قیلیب باشقره‌دیلر، عایله اقتصادینی قنده‌ی قیلیب ریجه‌لشتیریش‌لری ممکن.»
ایتیش کیره‌ک که، بیلیم یورت‌لر ایشیگی طلبه قیزلر یوزی گه یاپیلیشی بیلن، مملکت بیلیم یورت‌لری طلبه‌لر آزلیگی بیلن روپه‌ره بولیشی ممکن.
