پایتخت کابل شهرنو حاجی یعقوب تورت یولیده، هر کونی کوندهلیک ایشلهیدیگن اونلب کیشی توپلنهدی. اولر ایرتهلبدن آخشم شام گه قدر ایش اوچون کوتهدیلر؛ بیراق اولرنینگ اکثریتی بوش قول بیلن اویگه قیتهدیلر.
بو ایشلاوچیلر آرهسیده، ینگیلیکده پاکستاندن مملکت گه مجبوری شکلده چیقریلگن بعضیلر کوریلهدی و ایندی ایش اوچون بو تورت یولده توپلنیشگن. اوشبو مهاجرلردن بیری رضوان ایش اوسکونهلرینی آلدیگه قوییب و ایرتهلبدن شام گه قدر ایش تاپیش اوچون اولتیرگن.
او، ایکی آی اول ۱۱ کیشیلیک عایلهسی بیلن تورخم چیگره یونهلیشی آرقهلی افغانستان گه کیلگن و ایندی ایشسیز ایکنینی ایتهدی. او شوندهی دییدی: «ایرتهلبدن حاضرگچه اوشبو تورت یولده ایش اوچون اولتیرگن من، تنیگنلرینی آلیب کیتیشهدی و تنیمهگنلرنی آلیب کیتیشمهیدی. حاجی یعقوب تورت یولیده اولتیریشدن زیریکتیک و اسلام امیرلیگیدن ایش فرصتینی یرهتیشنی ایستهیمیز.»
شو بیلن بیرگه، رضوان یانیده یونس هم اولتیرگن. او ایکی آی آلدین ۱۶ کیشیلیک عایلهسی بیلن قندهارده اسپینبولدک چیگرهسی آرقهلی افغانستان گه کیلگنینی بیلدیرهدی.
رضوان گه کوره، هفته دوامیده ایش قیدیرهدی؛ بیراق کون آخریده چرچاق و ناامیدلیک بیلن اوی گه قیتهدی. اونینگ ایتیشیچه: «بو ییرده ایش اوچون کیلدیم و ۷-۸ کوندن بیری شو ییرده من؛ بیراق ایش تاپه آلمهدیم. ایش اوچون کابل گه کیلدیک بیراق بو ییرده هم ایش یوق. آدملردن بیز گه یاردم بیریشلرینی و اسلام امیرلیگیدن ایسه ایش فرصتی یرهتیشنی ایستهیمیز.»
نصیبالله، اوچ آی آلدین ۸ کیشیلیک عایلهسی بیلن تورخم چیگره یولی آرقهلی مملکت گه قیتگن، اسلام امیرلیگیدن پاکستاندن مجبوری شکلده چیقریلگن مهاجرلر گه یاردم بیریشینی ایستهیدی.
شو بیلن بیرگه، مهاجرلر قیینچیلیکلرینی حل قیلیش بوییچه کمیسیون مسئوللری، مملکت گه قیتگن مهاجرلرنینگ احتیاجلرینی تأمینلش اوچون ایریم ریجهلری بارلیگینی معلوم قیلیشهدی.
اوشبو کمیسیون سوزلاوچیسی احمدالله وثیق شوندهی دییدی: «ینگیلیکده افغانستان گه کیلگن مهاجرلر گه ییر ترقهتیش جریانی باشلنگن و اولرنینگ اکثریتی گه ییر ترقهتیلگن. مهاجرلر قیینچیلیکلرینی حل قیلیش کمیسیونی مملکت گه قیتگن مهاجرلرنینگ احتیاجلرینی تأمینلش گه سعی-حرکت قیلماقده.»
بوندن آلدین، افغانستان اوچون مهاجرلر بوییچه بیرلشگن ملتلر تشکیلاتینینگ عالی کمیساری گه کوره، میلادی ۲۰۲۳ ییلدن حاضرگه قدر قریب ۵.۴ میلیون مهاجر ایران و پاکستاندن افغانستان گه قیتگن.
اوشبو تشکیلاتنینگ معلوماتیگه کوره، مملکت گه قیتگنلردن یریمی ایش تاپه آلمهی و اقتصادی قیینچیلیک بیلن دوچ دیر.
