بازارنینگ قدیمی دکانلریدن بیریده، دادخدا وزیری یاغاچدن یسلگن چوکیده اولتیریب بوتنی تیکر ایکن، شاگردلریگه هم بوتنی تیارلش باسقیچلرینی اورگتماقده. او ۱۵ ییلدن بیری بوت تیکووچیلیک بیلن شغللنیب کیلگن ایتیشیچه، بو کسب اونینگ کوندهلیک حیاتی بیر قسمیگه ایلنگن.
دادخدا یانیده ینه تورت شاگرد هم ایشلهیدی، شاگردلر اونینگ نظارتی آستیده بو هنرنی اورگهنیب بوت تیارلش جریانینینگ هر بیر معلوم باسقیچینی بجرهدی. بیر جفت بوت تیارلش تخمیناً بیر ساعت وقت آلهدی و اولر بیر کون دوامیده، ۱۲ جفتگچه بوت تیارلشلری ممکن.
او شوندهی دییدی: «یخشی تامانی شوکی بیز اوز کسبیمیزدن ممنونمیز. امید قیلهمیز کی قندوزده فابریکهلر و کمپنیهلر تشکیل ایتیلسه و ایشیمیز رواجلنسه. اگر خام اشیا بیز اوچون آسانراق بولسه، محصولاتلریمیزنی کینگهیتیریب ینهده رواجلنتیره آلهمیز.»
بیر نیچه دکان نریده، سکیز ییلدن بیری بو کسب بیلن شغللنهیاتگن بوت تیکووچی محمدنذیر، بوت قالیپینینگ اولچمینی آلیش بیلن بند، اونینگ ایتیشیچه، ایشلریده بعضاً قیینچیلیکلر بولیشیگه قرهمی، او هنوز بو کسبنی اشتیاق بیلن دوام ایتتیرماقده.
اونینگ ایتیشیچه، سونگی آیلرده بازارده خام اشیا نرخلری آشگنیگه قرهمی، او حلی هم اوز کسبینی دوام ایتتیریشگه قیزیقیش بیلدیرهدی. اونگه کوره: «ساتوولر کمهیگن پیتده، ۵-۶ نفر شاگرد و دکان خرهجتلرینی تولدیریش قیین بولهدی. بیراق ایش یخشیلنسه، بیز کیچیک بازار تشکیل قیلهمیز و هنرنی رواجلنتیره آلهمیز.»
وطنی بوتلر حلی هم اوزیگه خاص مجازلر گه ایگه و اولرنینگ مجازلری بوتلرنینگ تشقی کورینیشیدن کوره، اونینگ مستحکملیگی و دوامیلیگینی افضل کوریشینی قوشیمچه قیلهدی، محمدنذیر.
بازارنینگ ینه بیر بورچهگیده فریدنینگ ایشخانهسی باشقچه محیط گه ایگه؛ او ییرده بالغهلرنینگ کیتمه-کیت آوازی و شاگردلرنینگ کیریب-چیقیشی تینمهی دوام ایتهدی.
فرید، ۱۷ ییلدن بیری بو هنر بیلن شغللنیب کیلماقده، حاضر اونینگ ینهده ۸ نفر شاگردی بار و اولرنینگ هر بیری ایشنینگ معلوم بیر قسمینی بجرهدی؛ بیری چرمنی اوچلهیدی، باشقهسی قالیپ قویهدی، ینه بیر شاگرد ایسه تیار بولگن بوتلرنی پردازلهیدی.
فریدنینگ ایتیشیچه، او ایشیدن ممنون گرچی بازار هر دایم بیر خیل بولمسه هم، او شوندهی کونلر بولیشینی ایتهدی کی، درآمد کمیهدی و شاگردلر خرهجتلری همده دکان اجارهسینی تأمینلش قیینلشهدی؛ بیراق ایشخانهدهگی چراغ یانیب تورگن و شاگردلر کیلهجک اوچون هنرنی اورگنهیاتگن بولسه، بو اونینگ ایشینی دوام ایتتیریشگه ارزیدی.
اونینگ فکریچه، اگر حکومت و مسئول ادارهلر تامانیدن قوللب-قوتلنسه، کیچیک ایشخانهلر یاشلر اوچون کونیکمه (مهارت) اورگهتیش مرکزیگه ایلنیشی ممکن و بو آرقهلی یاش اولاد اوچون ینگی ایش امکانیتلری هم یرهتیلهدی.
او شوندهی دییدی: «بیز حکومتدن ایستهیمیز کی محصولاتیمیزنی نمایش ایتیش و ساتیش اوچون بیر بازار تشکیل ایتسین، شونده بیز محصولاتلریمیزنی چیت ایلگه صادر قیلیب رواجلنیشیمیز ممکن. حکومت بیلن همکارلیک بو کسبنینگ رواجلنیشی و فراوانلیگینی تأمینلش یولینی یینگیللشتیرهدی.»
بازار اوزگریشیگه و تیار، ارزان بوتلرنینگ کینگ کیریب کیلیشیگه قرهمی، قندوزدهگی بوت تیکووچیلیک ایشخانهلری حلی هم فعالیت یوریتماقده و کوپلب کیچیک دکانلرنینگ چراغلری اوچمهگن. بالغه آوازی و چرم هیدی هنوز بو کسبنینگ بازار یورهگیدهگی برقرارلیگیدن دلالت بیرهدی.
