جوزجان بیلیم یورتی لوحهسیده، ۲۰-عقرب/۱۱-نومبر، سهشنبه کونی اۉزبېک تیلی اوچیریلیشی، مملکت تورلی خلقی اینیقسه اۉزبېکلرنینگ کېنگ مقیاسده مناسبتی بیلن یوزمه یوز بولگن.
افغانستان اۉزبېکلرینینگ سابق دولتدهگی ییریک عملدارلری، بیلیم یورت استادلری، شاعرلر، یازووچیلر، ژورنالیستلر و مدنی فعاللری، جوزجان بیلیم یورتی لوحهسیدن اۉزبېک تیلی آلیب تشلهنیشینی بو قومنینگ حکومت تامانیدن کمسیتیلیشی، افغانستانده تیل خیلمه-خیللیگیگه اعتبار بیرمسلیک و اۉزبېک تیلینی برچه ساحهلردن حذف قیلیش دیب بهالهگنلر.
شو مناسبت بیلن جمهوریت تیزیمیده ولسی جرگه وکیلی محمدعالم ساعی، ۲۱-عصرده ملتلر اۉز ارا همجهتلیک، مدنی عدالت، تیل همده ایتنیک خیلمه-خیللیگیگه حرمت تامان قدم تشلهیاتگن بیر پیتده، افغانستان افسوس کی ېنه اۉز تاریخینینگ اېنگ قرانغو صحیفهلرینینگ بیریگه گواه بولماقده دیگن.
ساعی جنابلری، بو تیل انسانیت تاریخیدهگی اېنگ قدیمی و جانلی تیللردن بیری بولیب، مرکزی آسیا، هندوستان، چین و قدیمگی خراسان تورک خلقلرینینگ مینگ ییللیک مدنیتی، شعری، تفکری و تاریخینی سقلب کېلگنینی قوشیمچه قیلگن. شونینگدیک او، حاضرگی کونده افغانستانده بو تیلنی تاریخی میراثینی یوق قیلیش و اوشبو تیلنینگ موقعینی ضعیفلشتیریش اوچون سعی-حرکت قیلینهیاتگنیدن تنقید قیلگن.
شو بیلن بیرگه، اۉزبېک خلقینینگ تانیقلی سیاسی سیمالریدن سردارمحمد رحمان اوغلی، جوزجان بیلیم یورتی دروازهسی لوحهسیدن اۉزبېک تیلی اوچیریلیشیدن تنقید قیلیب، اسلام امیرلیگی بلخ مرکزی مزارشریف شهریده امیر علیشیرنوایی یادگارلیگینی بوزیشدن سۉنگ، جوزجان بیلیم یورتی ایشیگیدهگی لوحهدن اۉزبېک تیلینی هم اوچیردی دیب یازگن.
رحمان اوغلی جنابلری، تورکلر جملهدن اۉزبېکلر افغانستاننینگ باشقه خلقلری کبی آچیقکونگیل و صمیمی انسانلر بولیب، کوپراق تشقی قیافه گه اعتبار بیریشهدی، آزگینه سۉز و تبسم بیلن خورسند بولهدیلر، بیراق کتته ظلم و قیینچلیکلر گه صبر قیلیشهدی دیگن.
سردارمحمد رحمان اوغلی، امیرتیمور، امیر علیشیرنوایی، ظهیرالدین محمدبابر، سلطانحسین بایقرا میراثداری دیب بیلگن اۉزبېکستان دولتیدن بوتوغریدهگی بیفرقلیگیدن تنقید قیلگن.
او، خلقنینگ مدنیتی و تیلینی بوزیش ظلم دیر، ظلم گه قرشی آواز چیقریش اېسه ثواب، هم توغری ایش دیر دیب مراجعت قیلگن.
جوزجان بیلیم یورتی ایشیگیدهگی لوحهدن اۉزبېک تیلی آلیب تشلهنیشیگه مناسبتلر دوامیده، افغانستانده اۉزبېک خلقینینگ تانیقلی یازووچیسی محمدحلیم یارقین، جوزجان بیلیم یورتی لوحهسیدن اۉزبېک یازووینی آلیب تشلش، بو تیل و سۉزلاوچیلریگه آچیقچهسیگه یاووزلیک دیب یازگن.
یارقین جنابلری، اۉزبېک تیلی اۉز اوییده هم قرشیلیککه اوچرهدی دیب و مینگلرچه اولکهداشلر گه مراجعت قیلگن. او خلققه قیلگن اۉز مراجعتیده بو ناقانونی مسئله گه کېسکین اعتراض تاووشلرینی چیقریشلرینی سورهگن.
یازووچی محمدحلیم یارقین، اسلام امیرلیگی باش وزیرینینگ اداری اورین باسری عبدالسلام حنفی گه اعتراضلی عریضهلر تاپشیریش کېرهک دیگن.
شونینگدیک، تورکیهده بیلیم یورت استادی عالیه ییلماز، جوزجان تورکلر یورتی و اۉزبېک تیلی بو یورتنینگ اۉزلیگی حسابلنهدی دیب یازگن. بیلیم یورت دروازهلریدن اونی یوق قیلیش، تیلگه و ملی اۉزلیککه قرشی آچیق هجومدن باشقه نرسه اېمس و خلق تیلینی اوچیریش هېچ کیمنینگ حقی اېمس دیگن، خانم ییلماز.
او، اۉز سۉزلری دوامیده، اگر بوگون بو ظلم گه قرشی جیم تورسک، ایرته گه نه آواز چیقریش اوچون تیلیمیز قالهدی، نه اونی حمایه قیلیش اوچون اۉزلیگیمیز، اوشه کون سکوتیمیز تاریخده اېنگ کتته خیانت صفتیده قید اېتیلهدی دیب، اورغولهگن.
جوزجان ولایتی بیلیم یورتی استادلریدن بولمیش حسامالدین تویغون، اوشبو مناسبت بیلن، بو حرکتنی اۉزبېک تیلی رسمی شکلده یوق قیلیندی دیب یازگن.
انسان حقلری فعالی فرخلقا اونچیزاده، اسلام امیرلیگی جوزجان بیلیم یورتی ایشیگی لوحهسیدن اۉزبېک تیلینی آلیب تشلش بیلن ېنه بار افغانستاننینگ تیل و مدنی خیلمه-خیللیگیگه ایشانمسلیگینی کورستدی و بو حرکت تیلنی کمسیتیش و اۉزبېک خلقینینگ مدنی همده تیل حقوقلریگه حرمتسیزلیکنی بیلدیردی دیب یازگن.
او اۉزبېک یېتکچیلرینینگ، کمسیتووچی حرکتلر آلدیده سکوت سقلشینی افسوسلرنی حالت دیب تنقید قیلگن.
خانم اونچیزاده، افغانستان حاضرگی حکومتی تیزیمیده بولگن اۉزبېکلردن شخصی منفعت یا کی سیاسی مصلحت اوچون تیل و اۉزلیکنی قربان قیلمسلیگینی تأکیدلهگن.
بولردن تشقری، اۉزبېک ژورنالیستلری، مدنی فعاللری و عادی یشاوچیلر جوزجان بیلیم یورتی ایشیگی لوحهسیدن اۉزبېک تیلی یازووی آلیب تشلهنیشینی، افغانستانده اۉزبېک خلقینی کمسیتیش و اولرنینگ تیل و مدنیتی گه اعتبارسیزلیک دیب بهالهگنلر. شونینگدیک یشاوچیلر، بوندهی حرکتلر گه قرشی قوزغالان قیلیشلری حقیده آگاهلنتیریشگن.
بوندن ایلگری جوزجان بیلیم یورتی ایشیگی لوحهسی تورت تیل جملهدن اۉزبېک، فارس، پشتو و انگلیس تیلیده یازیلگن اېدی و حاضر اۉزبېک تیلی آلیب تشلنگن.
