کیله‌جک چهارشنبه، پنج‌شنبه و جمعه کون‌لری جوزجان مرکزی شبرغان شهریده مذکور ولایت یشاوچی‌لری و مملکت ۳۴ ولایتی نینگ شاعرلری و یازووچی‌لری نینگ حضوری بیلن کتته بیر بیره‌م یولگه قوییلیشی ممکن.
جوزجان فرهنگی‌لریدن قطاری نینگ ایتیش‌لریچه، امیر علی شیرنوایی و ظهیرالدین محمد بابر تولدی نینگ نشانلش اوچون بوتون تیارگرلیکلر آلینگن. جوزجان فرهنگی‌لریدن بیری کرامت‌الله عزیزی نینگ ایتیشیچه، بو ولایتده نظیری بولمه‌گن کتته بیر فرهنگی بیره‌م یولگه قوییلیشی اوچون بوتون تیارگرلیکلر آلینگن و بو بیره‌م اوچ کون گچه دوام تاپیشی ممکن.
جناب عزیزی نینگ کوپه‌یتیریشیچه، اوزبیک و ترکمن تیل‌لری رسمیت گه تانیلگنیدن ۱۷ ییل اوتماقده و او زمان دن بویان اوشبو ایکی تیل کوچ‌لنیشی اوچون بیر قنچه اثرلر چاپ قیلگنلر و بو پروسه نی کوچ‌لنتیریش و کوپه‌یتیریش‌لری ممکن.
مذکور فرهنگی بیره‌م نی یولگه قویه‌دیگن کیشیلردن قطاری نینگ ایتیش‌لریچه، مذکور بیره‌م ده شعرلر و مقاله‌لرگه علاوه، امیر علی شیرنوایی و ظهیرالدین محمد بابر دن یادگار قالگن تاریخی بنالر، عتیقه اثرلر و قول صنعت‌لری کورگزمه گه قوییله‌دی.
بو بیره‌م نی یولگه قوییه‌دیگن کمیسیون باشلیغی عبدالمجید صمیم نینگ ایتیشیچه، مذکور مراسم ایرته (چهارشنبه کونی ۲۹- دلو) جمهورلیک ریاست سابق اورین‌باسری مارشال عبدالرشید دوستم و باشقه مینگ‌لرچه کیشی نینگ حضوری بیلن اوچ کون گچه یولگه قوییلیشی ممکن.
اونگه کوره، بو مراسم نی یولگه قوییشدن مقصد امیرعلی شیرنوایی و ظهیرالدین محمد بابر و شونینگدیک اوزبیک و ترکمن تیل‌لری رسمیت گه تانیلگنی گه حرمت قوییش دیر.
جناب صمیم نینگ کوپه‌یتیریشیچه، مذکور فرهنگی بیره‌م ده «مکتبم» ناملی اشرف عظیمی نینگ بیر اثری و «آنه تیل گا سوغا» ناملی سیدمحمد عابدی نینگ بیر اثری آچیلیشی ممکن.
امیر علی شیر نوایی قویاش ۸۴۴ نچی ییل هرات گه تولد و قویاش ۹۰۶ نچی ییل دنیا دن کوز یومگن.
شونینگدیک ظهیرالدین محمد بابر هند گورکانی‌لری و هند مغول امپراتورلیگی نینگ اساسچیسی ایدی. بابر، حکومتی ایشلرگه علاوه بویوک بیر شاعر ایدی و شونینگدیک اونینگ زمانیده قوریلگن بنالریدن قطاری نینگ اثری حاضرگچه هم موجود دیر.
