حاملهدارلیک دوریدهگی طبی پرورش هم آنه و هم جنین سلامتلیگی اوچون مستقیم تأثیری بار؛ بیراق سلاموطندار ینگی توققن ۱۵ عیال بیلن صحبتی شونی کورستهدی کی، بو عیاللر حاملهدارلیک دوریده طبی خذمتلردن اساسی شکلده فایدهلنه آلمسلیگی سببلی، حاملهدارلیک و توغیشدن سونگ جسمی ضعیفلیک و توییب آوقتلنمسلیککه چلینگنلر.
اوشبو عیاللردن بعضیلری، حاملهدارلیک دوریده فقط ایکی-اوچ مراتبه متخصص شفاکار آلدیگه بارگن بیراق احتیاجلری بولگن دارونی ساتیب آلیشگه قوربلری ییتمهگنینی ایتهدیلر، اوشبو عیاللردن باشقه بیرقطاری، حاملهدارلیک دوریده ییترلیچه توییب آوقتلنمهگنلرینی معلوم قیلگنلر.
کابل یشاوچیسی ۳۵ یاشلی عادله، بیش مراتبه کیتمه-کیت توققن شوندهی دییدی: «شفاکار آلدیگه هیچ بارگنیم یوق، کم قان ایدیم هیچ حرکت قیله آلمسدیم فقط بیر-ایکی مرته قانیمنی چیک قیلیش اوچون باردیم. قشاقلیک سببلی حتا ییردهی نان تاپه آلمسدیک یکه سوو بیلن کوننی اوتکزردیک، ینگیلیکده چقهلاغیم بولگن فقط ۱۰ افغانی گه تشقریدن یخنی ساتیب آلدیم.»
پروانلیک ۲۰ یاشلی حسیبا، ینگیلیکده ایکینچی چقهلاغینی دنیا گه کیلتیرگن ایتیشیچه: «آز فایدهلنردیک، ایریم گه ۷ مینگ افغانی معاش بیریشهدی، ۲ مینگ اوی اجارهسی بیرهمیز، قندهی توییملی آوقت استعمال قیلهیدیک، توقیزینچی حاملهدارلیک آییده ایکی مراتبه شفاکار آلدیگه باردیم، کوپ آز دارو دن فایدهلنه آلهمن.»
گزارش معلوماتلریگه کوره، دولت ساغلیک مرکزلریگه عیاللر اوچون تیکین شکلده طبی خذمت کورسهتیلیب و دارو بیریلسه-ده؛ بیراق گزارشده صحبت قیلگن عیاللر، بوندهی خذمتلردن خبرلری یوقلیگینی ایتهدیلر.
کابللیک ۳۶ یاشلی مریم شوندهی دییدی: «آلتینچی حاملهدارلیگیم، اقتصادی احوالیمیز یخشی ایمس و ایریم ایشسیز، حاملهدارلیک دوریده ایکی مراتبه شفاکار آلدیگه باردیم و شفاکار بیرهدیگن دارونی ساتیب آلیشگه قوربیمیز ییتمهدی. دولت کلینیکلرده تیکین طبی خذمت کورسهتیلیب و دارو بیریلیشیدن اصلا خبریم یوق.»
شو بیلن بیرگه، فاریاب یشاوچیسی ۴۰ یاشلی مسعودهنینگ ایتیشیچه: «کمبغلمیز، ۹ آی ایچیده آغریق و ضعیفلیکدن قورقیب فقط ایکی مرته شفاکار آلدیگه باردیم، کلینیک قییرده و عیاللر گه قندهی خذمت کورستهدی اصلا خبریمیز یوق. دارو ساتیب آلیشگه هیچ قوربیمیز ییتمهیدی هم اوزیم و هم چقهلاغیم ضعیف.»
گزارشده صحبت قیلگن عیاللردن ۷ نفری، اقتصادی باسیملر، طبی خذمت و دارودن فایدهلنه آلمسلیک یانیده، ضعیفلیک، کمقانلیک، حالده تاییش، ساچ توکیلیش، کیلو یوقاتیش و توغیشدن سونگ چرچاقلیک بیلن روپهره بولیشگن.
کاپیسالیک ۳۵ یاشلی عزیزه و کابل ولایتی دهسبز یشاوچیسی ۲۸ یاشلی نفیسهنینگ ایتیشیچه، احتیاجلری بولگن دارولرنی استعمال قیله آلمسلیک سببلی، اوزلری یانیده چقهلاقلری هم جسمی ضعیفلیک بیلن دوچ بولگن.
عزیزه شوندهی دییدی: «حاملهدارلیک پیتیده کمقانلیک، باش و ایاغیم آغریردی، حاضر هم اوزیم و هم چقهلاغیم ضعیف، شفاکار ویتامینلی دارولرنی استعمال قیلیشیمنی مصلحت بیرگن ایدی، بیراق اولرنی ساتیب آلالمهدیم.»
نفیسه گه کوره: «حاملهدارلیک پیتیمده قووتلی آوقتلرنی استعمال قیله آلمسدیم. نیچه قدم یوریگن حالده یورهگیم تیترهی باشلهیدی. جوده هم ضعیف من، شفاکار دارو استعمال قیلیشیمنی مصلحت بیردی بیراق اولرنی ساتیب آلیشگه قوربیم ییتمهیدی. شونینگ اوچون دارولرنی استعمال قیله آلمهدیم.»
برچهسی بیلن، نسایی-ولادی شفاکارلری عیاللرنینگ کوچلنتیروچی دارولرنی استعمال قیلیش و طبی خذمتلردن فایدهلنیشی مهملیگینی ایتسهلر-ده، بیراق بوندهی امکانیتلردن فایدهلنه آلمسلیک آنه و جنین سلامتلیگینی تهدید قیلیشی حقیده آگاهلنتیریشهدی.
نسایی-ولادی شفاکاری سونیتا بهرام شوندهی دییدی: «اقتصاد ضعیفلیگی اوچون جمعیتده کوچلنتیروچی دارولردن استعمال قیلینمهیدی، بولر عیاللر اوچون اوته مهم، بو دارولردن استعمال قیلمسلیک کمقانلیککه سبب بولهدی، آنه یوزیده لکه تاپیلهدی و بالهنینگ میهسی اوسیشیگه سلبی تأثیر قویهدی.»
شو بیلن بیرگه، ساغلیقنی سقلش مسئوللری حاملهدار عیاللر اوچون تیکین دارولر ترقهتیلیشی حقیده خبردارلیک ریجهلری بارلیگینی معلوم قیلهدیلر.
اوشبو وزیرلیک سوزلاوچیسی شرافت زمانامرخیل سلاموطندار بیلن صحبتده شوندهی دییدی: «حاملهدار عیاللر اوچون دایمی شکلده بعضی کمپاینلر اوتکزیلیشی اساسیده فولیک اسید و کوچلنتیروچی بعضی دارولرنی یوباردیک، بیراق بعضی قیینچیلیکلر سببلی بیرقطار کسلخانهلر گه دارو آلیب باریلمهگن، بیراق عموم آلگنده ساغلیق مرکزلریده دارومیز بار شونینگدیک کمپاین آرقهلی بو دارولر حاملهدار عیاللر گه ترقهتیلهدی.»
بیرلشگن ملتلر تشکیلاتی و افغانستان گه انسان سیورلیک یاردملرنی هماهنگ قیلوچی اداره (اوچا) معلوماتلریگه کوره، افغانستانده ۱۰۰ مینگ توغروقدن قریب ۶۰۰ آنه وفات ایتهدی؛ اوشبو نهادلر گه کوره، بو رقم دنیا باشقه مملکتلریگه قرهگنده اوچ برابر کوپ. مذکور نهادلر آگاهلنتیریشهدی – قیزلرنینگ اوقی آلمسلیگی، طبی پرورشلردهگی تینگسیزلیکنی آشیریب و بو وضعیت دوام تاپگن حالده، افغانستانده آنه و چقهلاقلرنینگ اولیم رقمینی ۵۰ فایز گچه کوپهیتیریشی ممکن.
