نسایی-ولادی شفاکارلرینینگ ایتیشلریچه، ساغلام حاملهدارلیک اوچون حاملهدارلیکدن آلدین و حاملهدارلیک دوریده معاینهلر اوتکزیشی، حاملهدار عیاللرنینگ منظم روشده شفاکار گه مراجعت قیلیشی و ساغلام آوقتلنیشی ضرور بولیب و بولر ساغلام حاملهدارلیکنینگ اساسی معیارلریدن حسابلنهدی. مملکتنینگ اَیریم ولایتلریدهگی حاملهدار آلتی عیالنینگ تجربهسی گه کوره، عیاللردن کوپ قطاری عایلهلریدهگی فرهنگی قرهشلر و شفاکارگه باریشدن شرم قیلیش سبب معاینه اوچون کیچ یا-ده جوده آز، عیال شفاکارلرگه مراجعت قیلهدیلر.
شوندهی بیرحالده، اوشبو عیاللردن قطاری کم قانلیک و سلبی قان گروهیگه اوخشش کسللیکلرگه هم چلینگنلر. مذکور عیاللردن بیر قطارینینگ ایتیشلریچه، تورموش اورتاقلری حمایتیگه ایگه بولگنلری بیرحالده، بیراق تورموش اورتاقلرینینگ عایلهسی آرقهلی بو توغریده قوللب-قوتلنمهیدیلر.
نسایی-ولادی متخصص شفاکاری صحیفه میرزایی، حاملهدارلیک اوچون مناسب یاشنی ۲۰ دن ۳۵ یاش دیب و ایتیشیچه، ۳۵ یاشرلیکدن کیین ساغلام حاملهدارلیککه ایگه بولیش میزانی کمهیب و حاملهدارلیک عیاللر اوچون جدی خوفلرگه سبب بولیشی ممکن.
بیزلرنینگ فیسبوک صحیفهمیزگه باش اورینگ!
اونینگ کوپهیتیریشیچه: «شکر، جاغور، ایدز و HIV کسللیکلری حاملهدارلیکدن آلدین تست بولیشی کیرهک، بیراق آگاهیلیک آز بولگنی و منبعلر کملیگی سبب، عیاللردن کوپ قطاری حاملهدارلیکدن آلدین بو تستلرنی قیلدیرمهیدیلر. ناساغلام حاملهدارلیک سببی ایسه توییب آوقتلنمسلیک، حاملهدارلیک دورهسیدهگی مراقبتلرگه اعتبار بیرمسلیک، کیچیک یاشده توی قیلیش، وزننینگ آزلیگی، استرس و عایلهوی قیینچیلیکلر دیر.»
باشقه بیر تاماندن، نسایی-ولادی شفاکارلریدن باشقه بیری مدینه ارسلان امانی، حاملهدار عیالنینگ عمومی شکلده معاینه بولیشی کیرهک دیب و ایتیشیچه، حاملهدار عیال تیفوس یا-ده محرقه ایسیتمهسیگه چلینگنی صورتده، بو کسللیک جنین توشیشی، چقهلاقنینگ وقتدن آلدین توغیلیشی و باشقه بیر قطار قیینچیلیکلرگه سبب بولیشی ممکن. «حاملهدار بیر عیال شفاکار گه بارگنیده، عمومی معاینه بولیشی کیرهک. عیاللرنینگ وزنی، فشاری، قانی و شکری معاینه بولیشی کیرهک، چونکه جنیننینگ توشیشی، چقهلاقنینگ وقتدن آلدین دنیا گه کیلیشی و چقهلاقنینگ درست رشد قیله آلمسلیگیگه سبب بوله آلهدی.»
عمومی ایچکی بولیم شفاکاری سرور خالدنینگ ایتیشیچه، ساغلام حاملهدارلیک درست آوقتلنیش، فولیک اسید، آهن و کلسیم تابلیتلریدن فایدهلنیش، بنگیوار مادهلر و ناساغلام آوقتلردن اوزاق بولیشگه نیازی بار. اونینگ اورغولب و کوپهیتیریشیچه، عیاللر حاملهدارلیک دورهسیده منظم شکلده شفاکارلری بیلن علاقهده بولیشلری کیرهک. ییترلی اوخلش، استرسنی کمهیتیریش و حاملهدارلر عیاللردن اجتماعی و عایلهوی حمایت، ساغلام بیر چقهلاقنینگ دنیا گه کیلیشیده مهم اورینگه ایگه دیر.
سرور خالدگه کوره: «شفاکارلری بیلن علاقهده بولیشلری کیرهک؛ یخشی اوخلهسینلر؛ استرس، تشویش و روحی ناراحتلیکلرنی کمهیتیرسینلر. ییترلیچه سویوقلیک ایچسینلر و عایلهوی درست حیات کیچیریش شرایطیگه ایگه بولسینلر. آنه گه یخشی بیر حیات کچیریش شرایطی یامینلنگنیده، بو وضعیت ساغلام چقهلاقنینگ توغیلیشیگه سبب بولهدی.»
عیاللردن قطارینینگ صحبتلریگه کوره، اولر حاملهدارلیک دورهلریده کم قانلیک، سلبی قان گروهیگه ایگه بولیش و مناسب آوقتلنمسلیک کبی قیینچیلیکلرگه چلینگنلر.
توی قیلگنیدن ۱۲ ییل بولگن پنجشیر یشاوچیسی ۳۳ یاشر مرضیه سلیمنینگ ایتیشیچه، اقتصادی یامان وضعیت سبب شفاکار گه بارمهی و درست آوقتلنه آلمهگن که انه شوو سبب، چقهلاغی ضعیف توغیلگن. «اقتصادی وضعیتیمیز یامان ایدی، حتا ییترلی آوقتیمیز هم یوق ایدی. دایم ضعف قیلهمن دیب حس قیلیدیم و باشیم آغریدی؛ لیکن هیچ بیر ایش قیله آلمهیدیم. چقهلاغیم ضعیف دنیا گه کیلدی و توغیشدن کینی اوزیم هم جوده ضعیف بولگن ایدیم. حاضر حاملهدار هر بیر عیال گه ایتهمن که هر قنچه قیین وضعیتده هم بولسه، حداقل نیچه مرته شفاکارگه بارسین و ساغلیگیگه توجه قیلسین.»
پروان ولایتیدن ۲۷ یاشر پروانه احمدی، حاملهدارلیک دورهسیده شفاکارگه مراجعت قیلمهگنی سبب، تیفوس یا-ده محرفه ایسیتمهسیگه چلینگنینی بیان قیلیب و ایتیشیچه: «فقط توغیش پیتیده شفاکار گه باردیم. حاملهدارلیکدن چقهلاغیم دنیا گه کیلیشیگچه قابله گه باریدیم. حاملهدارلیکده بیراق محرقه گه چلیندیم.»
کابل یشاوچیسی بولمیش ۲۸ یاشر سمیه محمدینینگ ایتیشیچه: «چقهلاغیم توشدی؛ بیرینچی مرته حاملهدار بولگن ایدیم، جودهیم خوش ایدی، حاملهدار بولگنیمدن نیچه هفته اوتگچ، قارنیم آغریدی و قان کیتیش بار ایدی. کسلخانه گه بارگنیمده، شفاکار چقهلاغینگ توشدی و تیزراق مراجعت قیلگنیمده، آلدی آلینشی بلکیم ممکن بولهر ایدی دیدی. مین اصلا بیلمس ایدیم که آلدیندن معاینه قیلدیرسم یا-ده اوخلهسم.»
بیزلرنینگ «ایکس» ترماغی ده هم تعقیب قیلینگ!
شونینگدیک کابل یشاوچیلریدن باشقه بیری ۳۲ یاشر صدیقه سالارزینینگ ایتیشیچه، حاملهدارلیک و چقهلاغینینگ دنیا گه کیلیشی، قیینچیلیکلر و منفی قان گروهی گه ایگه بولیش کبی جدی کسللیکلرگه بیلن دوچ بولیب و بو چقهلاغی اوچون هم جدی قیینچیلیککه سبب بولگن. «قانیم منفی بولگنی اوچون حاملهدارلیک دورهسیده، اوچینچی و ییتینچی آیلرده پیچکاری قیلیشگه مجبور بولهمن. پیچکاری قیلدیرمهگنیمده، چقهلاغیم سریغلمه، قان کملیگی و قان میکروبی بولیشی کبی قیینچیلیگی بیلن روپهره بولهدی. بیرینچی چقهلاغیم اولدی و ایکینچی بالهم قیز دیر و او هم بو قیینچیلیک بیلن دنیا گه کیلدی. اوچ کیچه صحت طفل کسلخانهسیده بستر ایدی، قانینی تبدیل قیلدیلر و ییتی آیگچه رشد قیلمهیدی.»
حاملهدارلیک دورهسیده جسمی قیینچیلیکلرگه توجه قیلیشگه علاوه، بو دورهده روحی وضعیت گه توجه قیلیش هم جوده مهم دیر. روانشناسلردن شمسیه بهادرینینگ ایتیشیچه، حاملهدار عیاللرنینگ روحی ساغلیگی حاملهدارلیکده مستقیم شکلده تاثیری بار. اونگه کوره، حاملهدار عیال روحی قیین بیلن روپهره بولگنیده، کورتیزون یا-ده استرسنی آشیریش هورمونی سحطی کوپهیهدی که بو ایش، جفت یا پلاسنتا رشد قیلیشیده قیینچیلیک یرهتیلیشی و حاملهدار عیالنینگ اشتهاسیزلیگیگه سبب بولهدی.
ایتیش کیرهک که، ۲۰۲۴-ییل ۴-جولای ده بیرلشگن ملتلر تشکیلاتینینگ جمعیت صندیغی، افغانستان اوزاق بولیملریدهگی حاملهدار عیاللردن کوپ قطارینینگ توغیش جریانیده طبی خذمتلردن فایدهلنه آلمسلیک سبب وفات قیلیشلرینی معلوم قیلگن. بو نهادگه کوره، افغانستان ده هر ۱۰۰ مینگ توغیشدن ۶۳۸ عیال جان بیرهدی و قیشلاقلرده عیاللردن ۸۰ فایزی اویده چقهلاقلرینی دنیا گه کیلتیرهدیلر.
