غور ده عایلهلردن قطارینینگ ایتیشلریچه، اوتگن ایکی ییلده ایشسیزلیک و کمبغللیک کوپهیشی و انسانسیورلیک یاردملر کمهیشی بیلن، بو ولایتده بالهلرنینگ توییب آوقتلنمسلیککه چلینیشی کوپهیگن.
غور مرکزی فیروزکوه شهریده توییب آوقتلنمسلیککه چلینگن بالهلرگه مخصوص توییملی آوقتلر ترقهتیلهدیگن مرکزلردن بیریگه یاردم قولگه کیلتیریش اوچون بارگن تورت باله آنهسی بولمیش ۳۴ یاشر خراماننینگ ایتیشیچه، ایکی بالهسی توییب آوقتلنمسلیککه چلینیب و اولرگه توییملی آوقتلرنی تامین قیله آلمهیدی.
خراماننینگ کوپهیتیریشیچه، تورموش اورتاغی دایمی ایشگه ایگه بولمهی و قولگه کیلتیرهدیگن درآمدی هم عایلهسینینگ دستلبکی نیازلرینی تامینلش اوچون ییترلی ایمس. «بالهلریم بیلن بیرگه، بو ییرگه یاردم قولگه کیلتیریش اوچون کیلگنمیز. بعضا بیر یا-ده ایکی آیگچه یاردم کیلمهیدی. یاردملرنینگ کوپهیشی و بیزلرگه کوپراق آوقت ترقهتیلیشینی ایستهیمیز، چونکه قیینچیلیکلریمیز کوپ و بالهلریمیز هم توییب آوقتلنمسلیککه چلینگن.»
توییب آوقتلنمسلیککه چلینگن بالهسینی دوالش اوچون غور ولایتی کسلخانهسیگه بارگن بو ولایت یشاوچیسی فضلاحمدنینگ ایتیشیچه، ایشسیزلیک سبب دارو ساتیب آلیش امکانیتیگه ایگه ایمس دیر. «بالهم جودهیم ضعیف بولیب و توییب آوقتلنمسلیککه چلینگن. اونی بو ییرگه کوپ ضعیف بولگنی اوچون کیلتیردیم. بستری بولدی و شفاکارلر اونی معاینه قیلدی، بیراق دارولر رایگان ایمس.»
شونینگدیک غور ولایتی کسلخانهسیگه توییب آوقتلنمهگن بالهسینینگ دوالش اوچون کیلتیرگن حلیمه گه کوره: «بالهم جودهیم ضعیف دیر و سوتیم هم یوق. شفاکارلر قرهیدیلر و دارو بیرهدیلر. بالهمنینگ بوتونلی ساغلام بولیشیگچه، بیزلر بوییرده بولهمیز.»
شوندهی بیرحالده، غور ولایتی کسلخانهسی شفاکارلرینینگ ایتیشلریچه، جاری قویاش ییلنینگ ۱۰ آییده، یالغیز بو کسلخانهگه توییب آوقتلنمهگن بیر مینگدن آرتیق باله مراجعت قیلیب و چلینگن بالهلر سانی کوپهیماقده دیر.
بو کسلخانه شفاکارلریدن بیری فضلالحق فرجادنینگ ایتیشیچه: «۱۰ آیده غور ولایتی کسلخانهسیگه ۱۰۵۳ باله بستری بولیب و بو رقم کوپهیماقده. اونینگ سببی ایسه قیشده موسومی کسللیکلر کوپهیشی دیر. حاضر آغیر توییب آوقتلنمسلیک بولیمیده ۲۵ دن آرتیق باله بار.»
غور ده توییب آوقتلنمسلیککه چلینگن عیاللر و بالهلر گه توییملی مادهلر ترقهتیلهدیگن مرکزلردن بیرینینگ مسئوللریگه کوره، کونده توییب آوقتلنمهگن ۳۰۰ دن آرتیق باله و عیال گه، توییملی مادهلرنی ترقتهدیلر.
توییملی آوقتلر ترقهتیلهدیگن مرکزلردن بیرینینگ ایشلاوچیسی بولمیش انارگل احمدی، بو ولایتده توییب آوقتلنمهگن کیشیلر سانی آشیشی همده توییملی آوقتلر کملیگیدن خواطر بیلدیریب و ایتیشیچه: «برنامهده ۳۰۴ کیشی ثبت بولگنی بیرحالده، آیده قریب ۱۸۰ کیشینی دوالهیمیز. اهالی اقتصادی ضعیف دیر و توییب آوقتلنمسلیک کوپهیماقده. بو مرکزده ییتی ییلدن بیری ایشلهیمن، هیچ قچان مادهلر کملیگی بیلن روپهره بولمهگن ایدیک، لیکن قریب ایکی ییلدن بیری مادهلر کملیگی بیلن روپهرهمیز. امید قیلهمیز که آلدیندن کوپراق خلقارا آزیق-آوقت دستوری بو مرکزگه یاردم بیرسه.»
شوندهی بیرحالده، غور ساغلیقنی سقلش ریاستی مسئوللرینینگ ایتیشلریچه، قشاقلیک و کمبغللیک بو ولایتده توییب آوقتلنمسلیککه چلینگن بالهلر سانی کوپهیشی اصلی عامللریدن دیر. اولرنینگ معلوماتی اساسیده، ییل باشیدن حاضرگچه، اوشبو ولایتده توییب آوقتلنمسلیککه چلینگن ۵۰ مینگدن آرتیق کسل قیینچیلیگی حل بولگن.
غور ساغلیقنی سقلش باشلیغی عبدالواحد حماسگه کوره، اولرنینگ گروهلری ساغلیقنی سقلش مرکزلریده برچهسیده درست شکلده خذمت کورستماقدهلر. «منظم برنامهمیز بار و ساغلیقنی سقلش مرکزلریده مسئوللریمیز آرقهلی آگاهیلیک بیریلیشنینگ فعال سقلهنیشی اوچون سعیوحرکت قیلهمیز. بالهلرده توییب آوقتلنمسلیک نشانهلری کوریلگنی و بالهنینگ ضعیف بولگنی پیتده، عایلهلر وقتیده ساغلیقنی سقلش مرکزلریگه باریشی کیرهک. شونینگدیک ساغلیقنی سقلش مرکزلریدن برچهسیده آغیر توییب آوقتلنمسلیک اوچون دوالنیش مادهلر بار و بالهلرگه بیریلهدی.»
ینگیلیکده خلقارا آزیق-آوقت دستوری بیر گزارش آرقهلی، افغانستان ده توییب آوقتلنمسلیککه چلینگن کسللر وضعیتی توغریسیده خواطر بیلدیریب، بو مملکتده تورت میلیون بالهنینگ آغیر توییب آوقتلنمسلیکدن اذیت چیکیشینی معلوم قیلگن.
خلقارا آزیق-آوقت دستوری باشلیغیگه کوره، بودجه کملیگی سبب بو نهاد حاضر ایسه توییب آوقتلنمهگن هر تورت بالهدن یالغیز بیرتهسیگه یاردم بیره آلهدی.
