پکتیا ده باغلری گه یانغاق ایککن باغ‌دارلردن قطاری نینگ ایتیشلریچه، اوشبو میوه ییغیلیشی نینگ ستندرد اصوللرینی بیلمه‌گنلری سبب باغلری نینگ حاصلاتی کمه‌یگن.
پکتیا ولایتی لجه‌منگل تومنی‌ده‌گی باغ‌دارلردن عبدالرشید نینگ ایتیشیچه، باغی‌ده یالغیز ۱۵ یانغاق درختی بار و ییلده اونینگ محصولی نی ساتیش بیلن ۵۰ مینگ افغانی درآمد قولگه کیلتیره‌دی. مذکور باغ‌دار گه کوره، یانغاق ییغیلیشی نینگ ستندرد اصوللرینی بیلمه‌گنی سبب، حاصلاتی میزانی کمه‌یگن.
اونینگ کوپه‌یتیریشیچه: «برچه اهالی ستندردسیز شکلده یانغاق نی ییغه‌دیلر و بو ایش درخت گه زیان ییتیشتیره‌دی، انه شوو سبب هر ییل بو درختلر حاصلاتی کمه‌یه‌دی. اهالی گه بو توغریده آگاهی‌لیک بیریلمه‌گن.»
بیزلرنینگ «ایکس» ترماغی ده هم تعقیب قیلینگ!
عبدالرشید نینگ ایتیشیچه، اولر نینگ منطقه‌لریده تورلی‌خیل یانغاق اینیقسه قاغازی یانغاق یخشی حاصل بیره‌دی و ییغیم-تیریم پیتده اونینگ بیر کیلوگرامی ۱۲۰-۱۵۰ افغانی ساتیله‌دی.
شونینگدیک باغ‌دارلردن باشقه بیری محمد نینگ ایتیشیچه، باغدارلر یانغاق حاصلاتی ییغیلیشی چاغیده یاغاچ آرقه‌لی درختلرنی سیلکه‌دیلر که بو ایش یانغاق درختی و اونینگ میوه‌سیگه زیان ییتیشتیره‌دی.
اونینگ کوپه‌یتیریشیچه: «یاغاق بیلن درخت شاخچه‌لرینی اورگنیمیزده، درخت شاخچه‌لری سینه‌دی. درخت‌ده قالگن یانغاق نی آلیش اوچون یاغاچ بیلن اوریلگنی‌ده درخت شاخه‌لری سینه‌دی. هیچ کیم بیزلر گه اوسکونه بیرمه‌گن که بو نرسه‌لردن قوللنیله‌دی و قوله‌ی دیر.»
باغدارلر پکتیا ایکینچیلیک، سووغاریش و چاروه‌چیلیک ریاستی‌دن اولرگه یانغاق محصولی ییغیلیشی نینگ ستندرد اصوللری اورگه‌تیلیشی اوچون زمینه یره‌تیلیشی و بو محصول نینگ ییغیلیشی اوچون اوسکونه‌لر ترقه‌تیلیشینی ایسته‌گنلر.
باشقه بیر تاماندن، پکتیا ده یانغاق سوداگرلری نینگ ایتیشلریچه، اوتگن ییل گه قره‌گنده جاری ییل اوشبو ولایت بازارلریده یانغاق قیمتی کمه‌یگن. یانغاق سوداگرلریدن علی‌احمد نینگ ایتیشیچه: «بو ییل قیمتلر کمه‌یگن؛ چونکه ساتیب آله‌دیگن یوق. اهالی یانیده یانغاق قالگن. بیزلر یانغاق نی سیر گه ساتمه‌یمیز؛ بلکیم بیر مینگ کیلو یانغاق نی ایکی یا-ده ۲۵۰۰ افغانی ساته‌میز، بیراق بیر مینگ ۵۰۰ افغانی‌دن آزراق ساتمه‌یمیز.»
پکتیا ایکینچیلیک، سووغاریش وچاروه‌چیلیک ریاستی مسئوللری نینگ ایتیشلریچه، یانغاق نینگ ییغیلیشی اوچون اوسکونه بولمه‌گنی سبب، حاضر هم بو محصول سنتی شکلده ییغیله‌دی.
پکتیا ایکینچیلیک، سووغاریش و چاروه‌چیلیک ریاستی نینگ طبیعی منبع‌لر و اورمانلر عمومی مدیری آصف‌الرحمان نینگ ایتیشیچه، قریب توقیز مینگ هکتار ییر یانغاق درختلری اوچون اختصاص بیریلگن که ییلده، ۵۰ مینگ کیلوگرام یانغاق قولگه کیله‌دی. «یانغاق تولیدی خصوصیده‌گی برنامه‌لریمیز اوتگن ییل‌دن بیری دوام قیلماقده؛ بیراق ۱۳۹۸-ییلده برچه تومنلرده ۳۶۰ قوریه قورگن‌میز که هر بیر قوریه‌دن ۳۰۰۰ یانغاق کوچتی تولید بوله‌دی. مذکور کوچتلردن بیر قطاری ساحه گه انتقال تاپگن.»
باغ‌دارلیک ایشلری بوییچه ایش بیلرمانلر نینگ ایتیشلریچه، ستندردسیز شکلده یانغاق محصولی نینگ ییغیلیشی، اوشبو میوه حاصلاتی کمه‌یشی گه سبب بولیشی ممکن.
بیزلرنینگ فیسبوک صحیفه‌میزگه باش اورینگ!
پکتیا بیلیم یورتی ایکینچیلیک فاکولته‌سی استادی سیف‌الله منگل نینگ ایتیشیچه، حکومت ایکینچیلیک حاصلاتی جمله‌دن یانغاق ییغیلیشی نینگ ستندرد اصوللرینی ایکینچیلرگه تعلیم بیریشی کیره‌ک.
اونینگ کوپه‌یتیریشیچه: «میوه نی یاغاچ، تاش و باشقه نرسه‌لر بیلن اورگنلریده یا-ده باشقه ستندردسیز شکلده ییغگنلریده، یانغاق درختی گه کوپ زیان ییتیشتیره‌دی؛ درختلر شاخه‌لری سینه‌دی و درختلر شاخه‌لری سینگنی‌ده حاصل کمه‌یه‌دی و پیشگن میوه‌لر توکیله‌دی.»
یانغاق پکتیا ده‌گی اینگ اونملی میوه‌لردن دیر که اوشبو ولایت ۱۲ تومنی نینگ تاغلری یان بغریگه ستندردسیز شکلده ایکیله‌دی و حاضرگچه یانغاق باغلری نینگ ستندرد بولیشی اوچون مذکور ولایت ایکینچیلیک، سووغاریش و چاروه‌چیلیک ریاستی تامانیدن هیچ بیر اقدام صورت تاپمه‌گن.
