بادغیس ده عیاللردن قطاری جنیننینگ چَله توشیشی، بچهدانده پارچه یا-ده پلاسنتا قالیشی، جدی شکلده قان کیتیش و آنه ساغلیگینینگ تهدید آستیده قالیشی کبی قیینچیلیکلر سبب، کورتاژ قیلدیریشگه مجبور بولهدیلر؛ بیراق آگاهیلیک کملیگی، ساغلیقنی سقلش خذمتلریدن آزراق فایدهلنه آلیش و عملیاتدن کیین مراقبت قیلیش امکانیتلری یوقلیگی، اولرگه بو جریاننی قیینلشتیرگن.
جنین توشیشی و بچهدان ده پلاسنتا قالگنی طفیلی کورتاژ قیلدیرگن بادغیس یشاوچیسی بولمیش ۲۸ یاشر فاطمهنینگ ایتیشیچه، بو قرارنی آلیش اونگه قولی بولمهی، کوپینچه خوف آلدی آلینیشی اوچون شفاکار توصیهسی بیلن عملگه آشیریلگن. «جدی ساغلیق قیینچیلیک سبب شفاکار توصیهسی بیلن بو قرار آلیشگه مجبور بولدیم. چقهلاغیم توشدی، بیراق بوتونلی توشگن ایمس ایکن. نسبتاً قیین و استرسلی بیر تجربه ایدی. حتا عملیات قیلیش پیتیده هم جوده آغریغی بار ایدی.»
شونینگدیک فاطمه، عملیاتدن کیینگی قیینچیلیکلرنی بیان قیلیب و کوپهیتیریشیچه، نیچه مدتگچه آغریق و روحی باسیملر دوام قیلگن. اونگه کوره، کورتاژدن کیین ییترلی مراقبتلر یوقلیگی، عیاللردن کوپ قطاری اوچون وضعیتنی قیینلشتیرهدی. «حقیقتا معلوماتیم یوق ایدی. هر کیم هر نرسه دیهردی. عملیاتدن کیین نیچه کونگچه قان کیتیش و آغریق بار ایدی، شکر اونچهلیک قیینچیلیک چیقمهدی. لیکن عیاللر اویگه بارگنلریدک ایشلش گه باشلهیدیلر و عملیاتدن کیین آغریق بار ایدی. روحی نقطهی نظریدن هم تاثیری بار ایدی و کوپ وقت آلدی که قیته یخشی بولدیم.»
شونینگدیک بادغیس ولایتی آبکمری تومنیدهگی ۳۵ یاشر صنمنینگ ایتیشیچه، بچهدانده پارچه قالگنی سبب، شفاکارلر کورتاژ بولیشیمگه قرار آلدیلر. اونگه کوره، مذکور عملیاتدن کیین قریب ایکی آی اوتگن، بیراق حاضرگچه بچهدان قسمیده آغریغی بولیب و مناسب ساغلیق خذمتلریدن فایدهلنه آلمهگن. اونینگ کوپهیتیریشیچه: «کورتاژ بولدیم. عملیاتدن آلدین بو توغریده هیچ نرسه بیلمس ایدیم. قارنیم آغریدی. اویگه کیلگنیمده هم درست مراقبت بولمهدیم. یامان بیر تاثیر بار ایدی و بیر مدتگچه یامان وضعیتنی کیچیردیم.»
صنمنینگ ایتیشیچه، کورتاژ بولگنیدن کیین امکانیت یوقلیگی سبب ییترلی شکلده مراقبت بولمهی و انه شوو سبب، ساغلیق قیینچیلیگی دوام قیلگن.
شوندهی بیرحالده، ساغلیقنی سقلش متخصصلرینینگ اورغولشیچه، کورتاژ انیق طبی اصول بولیب و یالغیز کیرهکلی موردلرده عملگه آشیریلهدی. بو توغریسیده قابلهلردن زرمینه مهمندنینگ ایتیشیچه، کورتاژ بچهدان ایچیدهگی نرسهلرنینگ بوتونلی چیقریلمهگنی یا-ده حاملهدارلیک دوامی آنه سلامتلیگینی تهدید قیلگنیده عملگه آشیریلهدی. «کورتاژده مخصوص بیر وسیله بچهدان ایچیگه کیریب و قالگن نرسهلر چیقریلهدی. بو عملیات کلینیک یا-ده کسلخانهلرده بولهدی. کورتاژ عیال گه حاملهدارلیک دوامی خوفلی بولگنی یا-ده پارچه قالگنیده همده جدی قان کیتیش بولگنیده عملگه آشیریلهدی. اینگ خوفلی حالت کوچلی قان کیتیش دیر، اینیقسه پاک وسیله بولمهگنی یا-ده عملیاتدن کیین درست مراقبت بولمسه.»
اونگه کوره، عیاللر آلدیندن ییترلی معلومات گه ایگه بولمهگنلری یا-ده عملیاتدن کیینگی مراقبتلرنی جدی آلمهگنلری صورتده، مکروبی بولیش، جدی قان کیتیش و حتا بچهدان گه زیان ییتیشیش کبی قیینچیلیکلر بیلن روپهره بولیشلری ممکن.
شونینگدیک نسایی-ولادی شفاکارلریدن نیلاب غنیزاده، کورتاژنی بچهدانتی پاکلش اوچون بیر اسلوب دیب و ایتیشیچه، آز وقتده عملگه آشیریلهدی، بیراق دقت و قرهلیشگه نیازی بار. «کوتارژ بچهداننینگ پاکلنیشی دیر. قریب ۵ یا-ده ۱۵ دقیقهده عملگه آشیریلهدی. دایم کورتاژ بولیشگه نیاز یوق، بعضا دارو بیلن هم حل بولهدی و شفاکارلر کسلنینگ وضعیتیگه قرهب قرار آلهدیلر.»
اونینگ اورغولشیچه، مذکور عملیات ایشانچلی و امکانیتلر بیلن جهازلنگن ساغلیقنی سقلش مرکزیلری بیلن عملگه آشیریلیشی همده اوندن کیین قیینچیلیکلر آلدی آلینیشی اوچون ساغلیقنی سقلش توصیهلرنی رعایت قیلیش جودهیم مهم دیر.
بادغیس دهگی عیاللر تجربهسی گه کوره، طبی توصیهلر و اولرنینگ حیاتی حقیقتی آرهسیده فاصله کوپ دیر. آگاهیلیک کملیگی، ساغلیقنی سقلش خذمتلریدن آزراق فایدهلنه آلیش و حیاتنینگ قیین وضعیتی سبب، عیاللردن قطاری ییترلی مراقبتلرنی آلمسدن، اوشبو حساس جریاننی باشدن کیچیرهدیلر.
