ننگرهار ده ییر آستی سوولر سطحی پس توشگنی، اوشبو ولایت یشاوچیلرینینگ جدی قیینچیلیکلر بیلن روپهره قیلگن. ننگرهار مرکزی جلالآباد شهرینینگ آلتینچی ناحیه یشاوچیسی بولمیش عبدالشکورنینگ ایتیشیچه، حویلیلریدهگی سوو قودوغی قوریب و عایلهلرینینگ نیازی بولگن سوونی تامینلش اوچون قیینچیلیک بیلن روپهرهلر. اونگه کوره، دهقانلر آرقهلی چقور قودوقلر قازیلیشی سبب، بو شهرده ییر آستی سوولر سطحی کمهیگن.
عبدالشکور، مسئوللردن یشاوچیلرنینگ ایچیملیک سوو کملیگی توغریسیدهگی قیینچیلیکلریگه جدی شکلده توجه قیلیشلرینی ایستهگن. «بو ییرده چقور قودوقلر قازیلیب و ایرتنگدن آخشمگچه سولردن فایدهلنیش بیلن سوو چیقریلهدی که نتیجهده، قودوقلر هر آلتی آیده قوریدی. بو مدتده قودوقنی بیر مرته تازهلهیمیز یا-ده ترمیم قیلهمیز، بیراق ینه هم قوریدی. منطقه اهالیسی زراعتگه بو سوودن فایدهلنهدی. بو موضوع قیینچیلیکنی اورته گه کیلتیرگن. اولرگه دریا سووی بیریلیشی کیرهک.»
شونینگدیک جلالآباد شهری ییتینچی ناحیه یشاوچیسی بولمیش منهاجالدین، ییر آستی سوولر سطحی قویی کیلگنیدن خواطر بیلدیریب و ایتیشیچه، موتر یوویلهدیگن جایلر آرقهلی سوولرنینگ حددن تشقری صرفلنیشی، بو شهرده ییر آستی سوولر سطحی کمهیشی اصلی عامللریدن بیری دیر. «بو ییرده کوپینچه موتر یوویلهدیگن جای بار و سوو کوپ مصرف بولهدی. بو ایش ییر آستی سوولر سطحینی پس توشیریب و اهالیگه قیینچیلیک یرهتهدی. باشقه بیر تاماندن، اقلیم اوزگریشلری بیلن سوو کملیگی قیینچیلیگی کوپهیب و سوونینگ حددن تشقی فایدهلنیشی هم قیینچیلیک کوپهیتیرگن. انه شوو سبب بو توغریده حکومتنینگ جدی شکلده توجه قیلیشی کیرهک.»
شونینگدیک سوو حوزهسی بیلرمانلرینینگ ایتیشلریچه، موتر یوویلهدیگن جایلر و ایکینچیلیکده ییر آستی سوولردن فایدهلنیش سبب، کیلهسی نیچه ییلگچه ییر آستی سوولر سطحینینگ کوپ پس توشیشی یا-ده اونینگ منبعلری قوریشی ممکن.
بیزلرنینگ فیسبوک صحیفهمیزگه باش اورینگ!
سوو حوزهسی بیلرمانی وحید اسلامنینگ ایتیشیچه، جلالآباد شهریده ییر آستی سوو منبعلری قوریشی آلدی آلینیشی اوچون، موتر یوویلهدیگن جایلرده دریا سوویدن فایدهلنیب و شونینگدیک ایکینچیلیک اوچون یامغیر سووی سقلهنیب و صرفلنیشی کیرهک. «شیرین سوو بیخی کمهیگن. طبیعتده بولگن سوولردن یالغیز ایکی یریم فایزی شیرین دیر که یالغیز ۳۰ فایزی اختیاریمیزگه بولیب و افغانستاننینگ تورلی حدودلریده موجود دیر. لیکن بو سوولرنی اوز باشیمچهلیک شکلده زراعت اوچون حددن تشقری مصرف قیلهمیز. یخشی ایش ایمس و اقلیم خراب بولیشیگه سبب بولهدی.»
ننگرهار ده محلی مسئوللرینینگ ایتیشلریچه، ایکینچیلیک ییرلر سووغاریلیشی اوچون برچه سووغاریش کاناللرینی فعال قیلیب و شونینگدیک موتر یوویلهدیگن جایلر اوچون هم دریا اطرافیده مناسب جایلرنینگ نظرگه آلینیشی ممکن.
ننگرهار سوو و برق ریاستی سوزلاوچیسی جهانزیب غنینینگ ایتیشیچه، مذکور ریاستده قریب ۲۰۰ موتر یووچیلیک ثبت بولیب و بو فعالیتلرده ییر آستی سوولر اورنیده دریا سوویدن فایدهلنیلیشی مقصد سعیوحرکت بولهدی. «موتر یوویلیشی اوچون جلالآباد دریاسی یقینیده مناسب ساحهنی تاپیش اوچون سعیوحرکت قیلماقدهمیز که شهردهگی برچه موتر یووهدیگلر او ییرگه بارسهلر. بو ایش بولگنیده، هم مصرف قیلهدیگن سوولری دریا سوویدن تامینلنهدی و همده ییر آستی سوولرگه سلبی تاثیری بولمهیدی.»
پایتخت شامل ننگرهار و باشقه بیر قطار ولایتلرده ییر آستی سوولر سطحی کمهیگنی، یشاوچیلر برابریدهگی جدی قیینچیلیکلردن بیری بولیب و میلیونلب کیشی اوچون کوندهلیک حیاتنینگ دوام ایتّیریشنی قیینلشتیرگن.
