آرام بیر فضاده، تازه دملنگن قهوه هیدی سالون نی آلگن و الماریلرگه تیریلگن تورلیخیل کتابلر سالون گوزهلیگینی آشیرگن. تیریلگن کتابلر آرهسیدهگی تفکرلر و حکایهلر، کافهده مهمانلرنی کوتیب آلهدی.
کابل شهرینینگ اوچینچی ناحیهسیده جایلشگن عرفان کافهسی، کتاب گه قیزیققنلر و مطالعه فرهنگی رواجلنیشی اوچون سعیوحرکت قیلهدیگنلر گه تینچ و آرام بیر فضانی یرهتگن.
بهار موسومینینگ کونلریدن بیریده، یازووچی و ادبی حکایه بولیمی استادی بولمیش داکتر سیدمرتضا شاهترابی اوچون شکللنگن بیر برنامهده، یاشلردن کوپ قطاری کوزگه کوریلهدی.
بیزلرنینگ فیسبوک صحیفهمیزگه باش اورینگ!
۱۸ ییلدن سونگ ایران دن افغانستان گه قیتگن سید مرتضا شاهترابی، عرفان کتاب کافهسیده شکللنگن برنامهده، حکایه یازووچیلیک حقیده ایتیشیچه: «مین توشینچهلریمنی قلم گه کیلتیریب و کیلهسی نسللرگه حکایه قیلهمن.»
کافه گه باریش فرهنگی حقیده صورت تاپگن تدقیقاتلر اساسیده، کافهلر ادبی و فرهنگی انجمنلر و بیر قطار کیشینینگ بیر ییرگه ییغیلیشی اوچون اونملی اورینگه ایگه دیر.
کتاب گه قیزیققن و فعال یاشلردن قطاری، هر بیر شهرده کتاب کافهلرینینگ بولیشینی بیر نیاز بیلیب و ایتیشلریچه، کافهلرده فکرنینگ آرام بولیشی یانیده، کتاب اوقیش اوچون هم زمینه یرهتیلهدی.
مذکور یاشلردن بیری کاظم نویسانینگ ایتیشیچه: «کافهلر دم آلیش اوچون فایدهلنیلهدیگن بیر جای دیر، بیراق بو ییرلردن فایدهلی ایشلر اوچون هم قوللنیلسه بولهدی. بو جمعیتده بو کبی جایلرنینگ بولیشی کیرهک چونکه اهالینی کتاب اوقیش و ساغلام دم آلیشگه چقیرسین.»
اوزاق وقتلردن بویان فکرلرنی رواجلنتیریشده اونملی رول اوینهب، زمان اوتیشی همده کافهلرنینگ مشهور بولیشی بیلن، آز-آز مدنیتچیلر، شاعرلر و یازووچیلر توجهسینی اوزیگه قرهتگن.
عرفان نشریه موسسهسینینگ اداری بولیمی مسئولی علی افتخاری، تفکرلر رواجلنیشی توغریسیده کافهلر اورنی حقیده ایتیشیچه: «اوتگن ییللردن بیری کافهلر اهالینینگ ییغیلیب و فکرلرینی شریک قیلهدیگن بیر جای دیر. مثال صفتیده داداییسم، سوریالیسم، رمانتیسم و اگزیستانسیالیسمنی ایته آلهمیز که فرانسه، جرمنی، سوئیس و انگلستان کبی مملکتلرده کوپینچه صحبت و بحثدن کیین شکللنگن. مثلا پاریس دهگی کافهلر فکرلر شکللنهدیگن اورینگه ایگه دیر، چونکه او ییرگه نخبه کیشیلرنینگ ییغیلهدیگن جای ایکن.»
بیزلرنینگ «ایکس» ترماغی ده هم تعقیب قیلینگ!
کتاب و کافه یقین علاقه گه ایگه دیر. مدنیتچیلردن قطاری بو مناسبتنی مستقیم دیب و ایتیشلریچه، اوشبو ایکی نرسهدن بیری فعالیت کورستووچی و باشقه بیرتهسی ایسه تیزلشتیرووچی صفتیده رول اوینهیدی.
افتخاری اوشبو کافه توغریسیده هم خودی شوندهی بیر فکر گه ایگه دیر: «کافهلرده ادبی تفکرلر شکللنهدی و کتابلر بو تفکرلر نتیجهسی دیر. انه شوو سبب ایته آلهمیز که کافه و کتابنینگ مستقیم مناسبتی بار.»
اوتگن ییللردن بویان کافهلر ادبی و فرهنگی انجمنلر همده نخبه کیشیلرنینگ ییغیلهدیگن بیر ییر صفتیده بولیب، نخبه کیشیلر آرهسیده صحبتلر و معلوماتلرنی شریک قیلینیشینی کوپهیتیرگن که بو اوزی، یخشی مضمون گه ایگه بولگن کتابلرنینگ یازیلیشیگه سبب بولگن.
بو کافه آچیلیشی سببی توغریسیده عرفان نشریهسینینگ ساتوو بولیمی مسئولی شعبان اسکندری گه کوره: «انگیزه و مقصدیمیز، اسلامی تعلیملر توغریسیده، فرهنگی و اسلام دینی قدریتلرینی نظرگه آلیش بیلن جمعیت همده ادبی و فرهنگی نخبه قشر گه خذمت قیلیش دیر.»
کتاب کافهلری ایچکی تینچلیک و آسایشتهلیکنینگ رمزی بولیب، اونینگ رواجلنیشی اهالی ذهنی رواجلنیشیگه سبب بوله آلهدی.
عرفان کافهسی، یشاوچیلرگه کتاب اوقیش زمینهسینی یرهتیشی یانیده، هر هفته صناعتی، حکایه یازووچیلیک، شعر یازووچیلیک و صناعتی اثرلرنینگ تانیشتیریلیش بزملر میزبانی بولیب و یشاوچیلر توجهسینی کتاب تامان قرهتیشیگه سبب بولهدی.
