مین آیدا محبی من، ارتباطات یونهلیشی بوییچه تحصیل آلگن من و حاضرده ایرکین ژورنالیست صفتیده فعالیت یوریته من. ینگی تکنالوژیلر چیقیشی دستلبکی دورلریدن باشلب مین اولر گه احتیاطکارانه مناسبتده بولیب کیلگن من.
صنعی هوشدن فایدهلنیش بوگون یاشلر آرهسیده کېنگ ترقهلیب، اوندن فایدهلنمهیدیگن آدم دیېرلی قالمهگن بولسهده، بو تکنالوژی اېندیگینه پیدا بولگن پیتلرده مین اونگه سلبی قرهشده اېدیم. دوستلریم و عایله اعضالریم بو واسطهدن تورلی مقصدلرده فایدهلنیشر اېدی، اما مین کوپراق اولر گه صنعی هوشدن فایدهلنیشده ضرور احتیاط چارهلریگه عمل قیلیشنی توصیه قیلردیم.
وقت اوتیشی بیلن ایریم سواللر و احتیاجلر مینی صنعی هوشدن فایدهلنیشگه اوندهدی. دوستلریم و قرینداشلریم آرقهلی صنعی هوش بیلن تنیشدیم. دستلب، اوندن فایدهلنیشنی باشلهگنیمده اساساً عمومی و معلومات بیروچی سواللر بیرردیم. البته، بو تکنالوژی تقدیم ایتگن معلوماتلرنی تېکشیرو و تحلیلدن اۉتکزگچ اوندن فایدهلنگن من.
اوشبو پلتفرمه بیلن تنیشیش و اوندن فایدهلنیش مینگه کوپلب قولهیلیکلر یرهتدی. مین اوندن دایما قول اوستیده بولگن یاردمچی صفتیده فایدهلنه من. بیراق، برچه مسئلهلرنی تولیق اونگه تاپشیریب بولمهیدی؛ اوندن تولیق احتیاطکارلیک و موازنتنی سقلهگن حالده، فایدهلنیش لازم. حاضرده بو تکنالوژیدن اېنگ کوپ فایدهلنهیاتگن ساحهم – طبی مصلحتلر و یول-یوروقلر آلیش دیر.
مینینگ طبی مصلحتچیم
صنعی هوش بیلن تنیشیش و اوندن فایدهلنیش مین اوچون قیزیقرلی واقعه بیلن همراه بولدی. طبی تېکشیرولردن سۉنگ مین حاملهدارلیک باسقیچیگه کیردیم. شفاکارلر گه مراجعت قیلیشدن اول، دستلبکی برچه طبی سواللریم و احتیاجلریمنی صنعی هوش بیلن محاکمه قیلر، او بیرگن معلوماتلرنی شفاکارلرنینگ توصیهلری و تشخیصلری بیلن تقاسلب کورردیم. کوپ حاللرده بو تکنالوژی بیرگن معلوماتلر شفاکارلر ایتگن گپلرگه نسبتن ایشانچلیراق و ثمرهلیراق بولیب چیقدی.
عینن شو حالت صنعی هوش گه نسبتن دستلبکی سلبی قرهشیمنی اۉزگرتیریب، موازنتلی یاندهشو گه ایگه بولیشیمگه سبب بولدی. حاضر، توغروق عرفهسیده تورگن پیتیمده، ساغلیغیمنی اسرهش و حاملهنی پرورشلشگه دایر سِیرلرنینگ کتته قسمی صنعی هوش تقدیم ایتگن معلومات و توصیهلر گه تیهنگن. شفاکار گه هر کونی یا کی هر هفته باریش امکانیم بولمهگن شرایطده، ساغلیق بیلن باغلیق معلوماتلرنی محاکمه قیلیش و صنعی هوش توصیهلرینی عملده قولش مینگه کتته قولهیلیک یرهتدی.
حاضر مین تکنالوژی دن فقط طبی مصلحتچی صفتیده فایدهلنه من خلاص. حتا ایریم حالتلرده صنعی هوشنینگ کسللیک سببلرینی انیقلشی و طبی یول-یوروقلری مین اوچون انسان شفاکارلرنیکیدن هم ثمرهلیراق بولگن پیتلر هم بولدی.
یشیرین شخص بیلن فعالیت یوریتیش
صنعی هوشدن فایدهلنیش کېنگهیب بارر اېکن، شخصی معلوماتلرنینگ سیزیب چیقیشی و مخصوص معلوماتلرنینگ عامهلشووی بارهسیده هم کوپلب خواطرلر تاپیلهدی. عینن شو حالت مینی اوزاق وقت بو تکنالوژی دن فایدهلنمسلیککه و اونگه سلبی مناسبتده بولیشگه اوندهگن. شو سببلی، صنعی هوش بیلن تنیشگنیم و اوندن فایدهلنه باشلهگنیمدن بویان یشیرین شخص اساسیده ایشلهی من.
بو جهتنی یاشلر و صنعی هوشدن اېندی فایدهلنیشنی باشلهگن فایدهلنوچیلر انابت گه آلیشلری لازم؛ اۉز حقیقی شخصی و شخصی معلوماتلرینی بو تکنالوژی بیلن بولیشمسلیک کېرهک. صنعی هوشدن فایدهلنیشده احتیاطکارلیک و موازنتنی سقلش حیاتی اهمیت گه ایگه، چونکی بعضاً بو معلوماتلر فایدهلنوچیلرنینگ اوزیگه قرشی هم ایشلهتیلیشی ممکن.
مین اساساً چتجیپیتی پلتفرمهسیدن اخبارات ایزلش واسطهسی صفتیده فایدهلنه من، ضرور سواللریمنی بیرهمن، خلاص. خلاصه قیلیب ایتگنده، صنعی هوشدن تیزیملی و مقصدلی فایدهلنیش بوگونگی کونده جدی احتیاج گه ایلنگن. یاش فایدهلنوچیلر بو تکنالوژی گه قرهم بولیب قالمسدن، بیلیم دایرهسینی کېنگهیتیریش، تیل اورگهنیش و زمانهوی بیلیملرنی ایگللش یولیده صنعی هوشدن فایدهلنیش جریانینی آنگلی روشده باشقریشلری لازم.
