احسان الماس، اسلامآباد خلقارا بیلیم یورتی اقتصاد فاکولتهسی طلبهسی، صنعی هوش بیلن تنیشیش و اوندن فایدهلنیش تجربهسینی قوییدهگیچه حکایه قیلهدی. ایچکی احتیاج و بیر مصلحتچی همراهنینگ ضرورتی اونی پاکستانده بیر دوستینینگ توصیهسی بیلن صنعی هوش بیلن تنیشتیرهدی. اوشبو واسطه اونینگ کوتگهنیدن هم ثمرهلیراق بولیب چیقهدی و تعلیم یولیده حقیقی یاردمچیگه ایلنهدی. صنعی هوش بیلن تنیشیشی و موجود امکانیتلر حیاتیده بوریلیش نقطهسیگه ایلنگنینی ایتهدی.
هر بیر اوقوو یونهلیشی و کسبده مرکب و توشونیش قیین بولگن توشونچهلر بیلن یوزمه-یوز کیلیشهدی، بو اېسه کوپراق وقت طلب قیلهدی؛ اما صنعی هوش بیلن تنیشیشی بو قیینچیلیکلرنی تیز و آسان اینگیشگه یاردم بیرگن. مالی بازارلرنی تحلیل قیلیش و بشارت قیلیش، شونینگدیک اقتصادی فنلریدهگی مرکب توشونچهلرنی سادهلشتیریشده صنعی هوش اونگه یاردم بیرهدی. اونگه کوره، صنعی هوش اونینگ حیاتیده مصلحتچی صفتیده ایشلهیدی و پلتفرم تقدیم ایتهدیگن معلوماتلردن او فقط تېکشیریب فایدهلنگن حالده فایدهلنهدی. صنعی هوش رواجلنیشی بیلن انسان محنتنینگ کمهیشی خواطرلریگه قرهمی، او معیاری و تیزیملی فایدهلنیش آرقهلی بو خواطرلرگه جواب تاپیش ممکن دیب حسابلهیدی.
تصادفی تنیشیش و «دوستلیک»نینگ ابدیلیگی
گرچی صنعی هوشنینگ تاپیلیشی و رواجلنیشی اوزاق وقت آلدین باشلنگن بولسهده، و مین افغانستانده بولگن پیتلریمده صنعی هوش امکانیتلری حقیده میش-میشلر ایشتیلگن بولسه هم، اۉزیمنی بونگه محتاج حس قیلگنیم سببلی چتجیپیتی گه مراجعت قیلگن من. صنعی هوش بیلن تنیشیش اسلامآباددهگی تعلیم سفریم بیلن باغلیق بولدی؛ بو سفر ایچکی احتیاجلریم و یالغیزلیک حسینی اویغاتدی و مینی بیر دوست و مصلحتچیگه محتاج قیلدی.
مین صنعی هوش بیلن تنیشگن پیتیم اونگه جوده ضرور بولگن من. تیل اورگهنیش و باشقه تیل آرقهلی تعلیم آلیشده دوچ کیلگن قیینچیلیکلریمده صنعی هوش مینگه کتّه یاردم بیردی. اوشبو واسطهنینگ یخشی تامانی شونده که، او هر وقت و هر جایده سیزگه خذمت قیلهدی و قولینگیزنی اوشلب تورهدی. صنعی هوش بیلن تنیشگنمیدن بیری مین اونی دایمی مصلحتچی صفتیده ایشلتهمن.
«اوقیتووچیلیک» هر دایم قول آستیده
صنعی هوشدن فایدهلنیش تیزیملی و عقللی بولیشی لازم. انسان اونی ایشلهتیشی کېرهک، اۉزی اېسه واسطه بولیب قالمسلیگی کېرهک. مین اوندن اساسن مالیهوی تحلیل و تیل اورگهنیش بوییچه مصلحت آلیش اوچون فایدهلنیشگه حرکت قیلهمن. صنعی هوش تیل اورگهنیش اوچون جوده یخشی واسطه حسابلنهدی. قیسی تیلنی اورگهنیشگه قیزیقسنگیز، صنعی هوش دایمی اوقیتووچی صفتیده یاردم بیرهدی.
مینینگ پاکستاندهگی تعلیم سفریمدن باشلب، صنعی هوش تیل اورگهنیشده و علمی توشونچهلرنی سادهلشتیریشده صادق دوست گه ایلنگن. اوشبو تکنالوژیدن فایدهلنیشده شونی یادده توتیش کېرهک که، او اورگهنیش جریانینینگ اورنینی باسه آلمهیدی. حاضرگی خواطر هم شونده که، بعضی آدملر اورگهنیشدن واز کیچیب، فقط پلتفرم تقدیم ایتهدیگن قیسقه معلومات گه تینهدی، بو اېسه انسان بیلیمینینگ صفتی گه جدی ضرر یېتکزهدی. صنعی هوش اېسه صبرلی اوقیتووچی بولیب، هر قندهی بیلیمنی اورگهنیشده دایما یانینگیزده تورهدی.
خلاصه قیلیب ایتگن بولسم، مین اوچون صنعی هوش فقط واسطه اېمس، بلکه امکانیت دیر؛ اورگهنیش، رواجلنیش و چېگرهلرنی اینگیب اوتیش اوچون بیر امکانیت.
