اسلام امیرلیگی سوزلاوچیسی ذبیحالله مجاهدنینگ اعلام قیلیشیچه، «پاکستاننینگ مخصوص حربی کوچلری» ینه بیر مرته افغانستان توپراغیگه تجاوز قیلگنلر.
مجاهد، بوگون ایرتهلب (۳-حوت، یکشنبه)، اکس صحیفهسیده یازیشیچه، اولر اوتگن کیچه ننگرهار و پکتیکا ده، افغانستانلیک تینچاهالینی بمباردمان قیلیب و اونلب کیشی جملهدن عیاللر و بالهلرنی «شهید» قیلیب و یرهلنتیرگن.
اسلام امیرلیگی سوزلاوچیسیگه کوره، پاکستانلیک جنراللر مملکتلریدهگی خوفسیزلیک ضعیفلیکلرنی انه شوندهی جنایتلر بیلن برطرف ایتیشگه اورینماقده.
بوندن آلدین پکتیکا ولایتی برمل تومنیدهگی منبعلرنینگ ایتیشیچه، ۲-حوت، شنبه کیچه ساعت ۱۱:۰۰ اطرافیده، پاکستان جنگریلری بو تومننینگ «مرغه» منطقهسینی هوا هجومی بیلن نشانگه آلگن.
منبعلرنینگ کوپهیتیریشیچه، مذکور هجوم «فاروقیه» اسملی دینی بیر مدرسهگه اویوشتیریلگن؛ بیراق اوشبو واقعهنینگ احتمالی تلفاتی حقیده هیچ بیر معلومات بیریلمهگن. منبعلرنینگ اورغولشیچه، ینه بیر هجوم ارگون تومنینینگ «سرخود» منطقهسیده جایلشگن بوش بیر اویگه اویوشتیریلگن.
