اسلام امیرلیگی تشقی ایشلر وزیری امیرخان متقی، «فرمت مسکو» ییتینچی ییغیلیشیده نطق سۉزلب، افغانستان برقرارلیگی اوچون منطقهوی همکارلیک ضرورلیگینی و بو مملکت گه قرشی اقتصادی تحریملرنی بیکار قیلیش لازملیگینی تأکیدلهدی.
متقی گه کوره، اسلام امیرلیگی افغانستاننی منطقهنینگ اقتصادی باغلنیش و ترقیات مرکزیگه ایلنتیرماقچی.
تشقی ایشلر وزیری، روسیهدن اسلام امیرلیگینی تن آلگنی اوچون منتدارلیک بیلدیریب، منطقهدهگی باشقه مملکتلردن هم کابل بیلن مناسبتلرینی موجود واقعیتلر و اۉز ارا منفعتلر اساسیده قوریشلرینی اېستهدی.
او سۉزلری بیر قسمیده، اوتگن تورت ییل دوامیده، اسلام امیرلیگی امنیت، تشقی سیاست و اقتصاد ساحهلریده سیزیلرلی ترقیات گه قول تاپگن و اېندی افغانستان امنیتی تشویش بیر منبعدن «منطقهوی برقرار شریک و اقتصادی فرصت» گه ایلنگنینی بیلدیردی.
متقینینگ کوپهیتیریشیچه، منطقهدهگی امنیتی تهدیدلر اسلام امیرلیگی حاکمیت گه کیلیشیدن آلدین هم بار اېدی و حاضر اېسه بیقرارلیکه سبب بولگن عامللرنینگ کوپی برطرف ایتیلگن. او ېنه بیر بار، افغانستانده باشقه دولتلر گه قرشی بو مملکت حدودیدن فایدهلنهدیگن هېچ قندهی گروه یوقلیگیدن ایشانچ بیلدیردی.
تشقی ایشلر وزیری، نطقینینگ بیر قسمیده ییریک اقتصادی کورستکیچلر اوسهیاتگنی حقیده معلومات بیریب، افغانستاننینگ ایچکی ناخالص محصولاتی ۱۴.۴ میلیارد دالردن ۱۷.۴ میلیارد دالر گه آشگنینی ایتدی. اونگه کوره، صادرات هم ۷۰۰ میلیون دالردن ایکی میلیارد دالر گه یېتگن و مملکتده ۶ مینگدن آرتیق ایشخانه فعالیت یوریتماقده.
او شونینگدیک، اقتصادی تحریملر و افغانستاننینگ تخمیناً ۹ میلیارد دالر مبلغینینگ موزلهتیلیشی اقتصادی اوسیش گه توسقینلیک قیلماقده دیب تأکیدلهدی. متقی ییغیلیش اشتراکچیلرینی بو مبلغلرنی آزاد قیلیش و تحریملرنی بیکار قیلیش اوچون خلقارا ییغیلیشلرده حرکت قیلیشلرینی سورهدی.
فرمت مسکو ییغیلیشی، ۱۵-میزان، سهشنبه کونی ۱۰ مملکت وکیللری و مهمان اولهراق بلاروس هیئتی حضوری بیلن بیرینچی مرته اسلام امیرلیگی رسمی وکیلی اشتراکیده، مسکوده اوتکزیلدی.
