غزنی ده تعلیم‌دن محروم قالگن قیزلردن قطاری نینگ ایتیشلریچه، تعلیم خصوصیده یره‌تیلگن چیکلاولردن کیین، اولر ایش‌سیزلیک و روحی قیین‌چیلیک‌لردن قاچیش اوچون قالین توقیش گه یوز کیلتیرگنلر.
۱۲-صنف نی بیتیره آلمه‌گن غزنی یشاوچیسی بولمیش شریفه نینگ ایتیشیچه، قیزلر یوزیگه مکتب‌لر ایشیگی یاپیلگنی‌دن کیین افسرده‌لیک‌دن اوزاق بولیش و اوزیگه ایش فرصتی نی یره‌تیش مقصد، قالین توقیش گه یوز کیلتیرگن. اونینگ کوپه‌یتیریشیچه: «مکتب‌لر نینگ یاپیلگنی‌دن کیین نیچه مدت اوی‌ده ایش‌سیز ایدیم؛ حاضر قالین توقیمن؛ بو ایش نی اورگندیم؛ هم مصروف بولدم و هم آی‌ده ایکی-اوچ مینگ افغانی بوله‌دی مینگه.»
بیزلرنینگ «ایکس» ترماغی ده هم تعقیب قیلینگ!
غزنی یشاوچیلریدن باشقه بیری مدینه نینگ ایتیشیچه، عایله اقتصادی وضعیتی یخشی‌لنیشی مقصد، قالین توقیش گه یوز کیلتیرگن. «مکتب‌لر و کورسلر نینگ یاپیلگنی‌دن کیین، مین قالین توقیش گه یوز کیلتیردم. درس اوقه آلمه‌گنیمیز شرایط‌ده، قالین توقیش هم یخشی بیر ایش و هم عایله اقتصادی گه یاردم بیره آله‌من.»
شونینگدیک غزنی نینگ قالین توقیش کارخانه‌لریدن بیریده المه‌ی اوریش بیلن شغللنگن خاتمه نینگ ایتیشیچه: «مکتب‌لر باشلنگنی صورت‌‌ده، قیته مکتب گه باره‌میز؛ قالین توقیش یخشی بیر ایش، لیکن کوپ قیین. فکریمیز نی توتمسه‌ک، کوپ جنجللی بیر ایش.»
باشقه بیرتاماندن، غزنی ده قالین توقیش کارخانه‌لردن بیری نینگ ایگه‌سی حسین‌داد رضایی گه کوره، اوتگن اوچ ییل‌ده اوشبو ولایت‌ده‌گی عیاللر و قیزلردن کوپ قطاری قالین توقیش بولیمی‌ده ایشلش گه یوز کیلتیرگنلر. عین حالده، او قالین ساتیلیشی اوچون بازار یوقلیگیدن ناراض‌لیک بیلدیریب و ایتیشیچه: «قالین مملکت ایچیده آز ساتیله‌دی؛ بلکیم اوچ فایز ساتیلسه؛ تشقی مملکتلر گه صادر بولیش نقطه‌ی نظری‌دن هم وضعیت یخشی ایمس و بو صناعت صادراتی کسادلیککه یوز توتگن.»
بیزلرنینگ فیسبوک صحیفه‌میزگه باش اورینگ!
غزنی صناعت و سوداگرلیک ریاستی نینگ صنعتی پارک‌لر عمومی مدیری احمد‌شاه لعلی نینگ ایتیشیچه، اولر صناعتچیلردن حمایت و اولر نینگ محصوللری گه بازار تاپیش خصوصیده سعی‌وحرکت قیلماقده‌لر. «اوشبو ولایت‌ده گنجینه‌ی افغانستان اسمی آستیده یولگه قوییلگن اوچ کون‌لیک بویوک بیر کورگزمه‌ده قالین و باشقه تولیدلر نمایش گه قوییلگن که بو رقم غزنی ولایتی‌ده قالین صناعتی رواجلنسین.»
قالین صناعتی اوزاق مدت‌دن بویان، افغانستان ده قیزیق بازار گه ایگه بولیب و سونگی اوچ ییل‌ده عیاللر ایشی و تعلیمی خصوصیده یره‌تیلگن چیکلاولر و قشاق‌لیک میزانی کوپه‌یگنی سبب، کابل و بیر قطار ولایت‌لرده عیاللردن کوپ قطاری قالین توقیشگه یوز کیلتیرگن.
