مملکت تورلی ولایت‌لریده عیاللردن بیرقطاری‌نینگ ایتیشلریچه، قرینداش‌لری‌نینگ دقتینی کوپراق تارتیش اوچون، کوپراق کییم-کیچیک آلیب و اوی بویوملرینی المشتیریش گه سعی-حرکت قیله‌دیلر.
بو گزارش‌ده، مملکت تورلی ولایت‌لریدن ۱۳ عیال بیلن صحبت قیلینگن و اولرنینگ کوپینچه‌سی قرینداش‌لری بیلن رقابت قیلیش، باشقه‌لر بیلن تېنگ بولیش، زمانه‌وی بولیش و جمعیت‌ده اۉزلرینی کورسه‌تیش اوچون، هردایم احتیاجلری گه نسبتن کوپ کییم-کیچک ساتیب آله‌دیلر.
کابل‌لیک ۲۸ یاشر مروه، قرینداش‌لریگه قره‌ب هر بیر مراسم گه ینگی کییم-کیچک آلیب و کوپراق حرمت بولیش اوچون سعی-حرکت قیلیشینی اېته‌دی. اونگه کوره: «اجتماعی باسیملر طفیلی احتیاجلریمگه نسبتن کوپراق کییم-کیچک آله‌من. توی مراسملریده کهنه یعنی تکرار بولگن کییمنی کییش گه قیزیقمه‌ی من، قوم و قرینداش‌لر بار، تکرار کییم-کییب بولمه‌یدی؛ ینگی کییم آلیش گه مجبور بوله‌من. کییم اجتماعی اورین اوچون مهم دیر؛ ینگی کییمی بولگن کیشی کوپراق حرمت قیلینه‌دی.»
بو گزارش‌ده صحبت قیلگنلردن کاپیسالیک ۲۷ یاشر کامله‌نینگ ایتیشیچه، هر آی احتیاجلری گه نسبتن کوپ کییم ساتیب آله‌دی؛ چونکه ایش جایی‌ده، اورتاق و قرینداش‌لری اورته‌سیده تکراری و مُدی اوتگن کییم بیلن باریشنی اېستمه‌یدی. «بعضی وقت‌لر احتیاجلریم گه نسبتن کوپراق کییم ساتیب آله‌من، استایل، وظیفه، قرینداش‌لر، اورتاق‌لر بیلن تشقری چیقیش، قییرده و نیمه ایش قیلیش، استایل و زمانه‌وی بولیش اوچون ینگی کییم آله‌من.»
بیزلرنینگ فیسبوک صحیفه‌میزگه باش اورینگ!
اوشبو گزارش‌ده صحبت قیلگنلرنینگ عالی و یریم عالی تحصیلاتی بولیب و اولرنینگ کوپینچه‌سی بویداق دیر و بیرقطاری هم تورموش قوریب و باله‌لری بار. بو عیاللرنینگ ایشانچی گه کوره، زمانه‌وی و شیک کییم-کییش و اوی بویوملرینی ینگی‌لشتیریش، اورتاق و قرینداش‌لری اورته‌سیده علیحده اورینلری بولیش گه سبب بوله‌دی؛ بو ایش عیاللردن بیرقطاری‌نینگ ینگی کییم و اوی بویوملرینی ساتیب آلیش اوچون کوپ مصرف قیلیش‌لری گه سبب بولگن.
کابل یشاوچیلریدن ۲۴ یاشر تبسم و ۲۹ یاشر صدف، ایکیله‌سی تورموش قورگن، یشش اوی بویوملری که اوزگرمه‌گن المشتیریش گه سعی-حرکت قیله‌دیلر؛ چونکه بو ایش بیلن زمانه‌وی بولیشنی اېسته‌یدیلر.
تبسم‌نینگ ایتیشیچه: «هر ییلی اوی بویوملرینی اوزگرتیریشیم کېره‌ک. اونچه‌لیک ایسکیرمه‌گن بولسه‌هم، چونکه مُدی اوتگن یا-ده باشقه‌لرنینگ اوی‌ده بولگنلرنی اېستمه‌ی من. قنچه زمانه‌وی و ینگی بولسه شونچه‌لیک خورسند بوله‌من.»
شونینگدیک صدف گه کوره: «اوی بویوملری، اۉزیم و باله‌لریم‌نینگ کییم-کیچگی حقیده کوپ حساس من. هردایم اېنگ یخشی نرسه‌لریم بولیشنی اېسته‌ی من، یشش اوی‌نی کوچ، پرده، موکت‌لرینی تیز-تیز اوزگرتیریش گه عادت قیلگن من؛ چونکه اېنگ زمانه‌وی نرسه‌لریم بولیشنی اېسته‌ی من.»
بیزلرنینگ «ایکس» ترماغی ده هم تعقیب قیلینگ!
گزارش‌ده صحبت قیلگن عیاللرنینگ ایتیشلریگه قره‌گنده، اولردن بیرقطاری‌نینگ اۉزلرینی بیزه‌تیش نه‌فقط بیر عادت بولگن بلکه، جمعیت‌ده‌گی اورین و آبرو-عزت‌لرینی سقلش دیر.
کابل‌لیک ۲۳ یاشر مرسل و بلخ‌لیک ۳۰ یاشر ملالی‌نینگ ایتیشلریچه، ینگی کییم-کیچک ساتیب آلیش و اوی بویوملرینی المشتیریش، اولر گه اوستونلیک و ایشانچ‌لری آرتیشی گه سبب بوله‌دی.
مرسل گه کوره: «کییم-کیچک، اوی و آشخانه بویوملرینی هر ییلی اوزگرتیره‌من، زمانه‌وی و قیمت‌بها نرسه‌لرنی آله‌من، اورتاق و قرینداش‌لریمدن اوستون بولیب و یخشی حیاتیم بولیش حسینی قیله‌من.»
ملالی‌نینگ ایتیشیچه: «اوی بویوملری ایسکیرگن بولسه، اورتاق و قرینداش‌لریمدن آرتگه قالگنمن دیب اویله‌ی من. اوی و اۉزیم اوچون ینگی نرسه ساتیب آلسم ایشانچیم آرتیب و هېچ نرسه‌دن کمچیلیگیم یوق دیب اویله‌ی من.»
جمعیت‌شناس‌لرنینگ ایشانچی گه کوره، عیاللر اورته‌سیده تجمل‌گرایلیک، باشقه‌لردن اۉزینی اوستون قرار بیریش اوچون سعی-حرکت، عایله‌لر اورته‌سیده ناساغلام رقابت گه ایلنیشی ممکن.
جمعیت‌شناس احمدراشد صدیقی، افغانستان کوپینچه خلقی‌نینگ کمبغل بولیشی گه اشاره قیلیب ایتیشیچه، اۉزینی بیزه‌تیش سلبی عاقبتی بولیب و کېله‌جک نسل گه تأثیر قیله‌دی. «عایله‌لرنینگ اقتصادی قیینچیلیک بیلن دوچ بولگن بیر جمعیت‌ده، تجمل‌گرایلیک و رقابت‌نینگ سلبی عاقبتی بولیشی ممکن؛ کوپ مصرف، کېله‌سی نسل اوستیگه سلبی تأثیر قیلیب و ناساغلام رقابت گه ایلنیشی ممکن.»
جمعیت‌شناس‌لرنینگ ایشانچی گه کوره، تجمل‌گرایلیک‌نینگ اقتصادی، اجتماعی و روحی عاقبت‌لری حقیده عیاللر گه آگاهی‌لیک بیریش، اولرنی مصرف‌لرینی کمه‌یتیریش و ناساغلام رقابت‌لردن واز کیچیش‌لری گه سبب بوله‌دی.
