قندوز شهری یشاوچیلریدن قطارینینگ ایتیشلریچه، سرکلر اوستیگه ینگی قوریلهدیگن بنالرنینگ قوریلیش موادی تشلهنیشی، اولرنینگ کوندهلیک اوتیب-قیتیشینی قیینچیلیک بیلن روپهره قیلگن.
قندوز شهری یشاوچیلریدن عتیقاللهنینگ ایتیشیچه، قوریلهدیگن اویلر و بنالردن قطارینینگ ایگهلری آرقهلی، قوریلیش مادهلرنینگ سرکلرگه تشلهنیشی، ترافیکی قیینچیلیکلر و اهالینینگ اذیت بولیشیگه سبب بولهدی. «اهالی کوپ اذیت بولهدی. یشاوچیلر سرک اوستیگه لای و سمنتنی تشلهیدیلر و حتا قالیننی سرک اوستیده قاقهدیلر. بو قندهی بیر فرهنگ دیر.»
اوشبو شهر یشاوچیلریدن بیری سلیمنینگ ایتیشیچه، بعضا قوریلهدیگن بنالردن بیر قطارینینگ قوریلیش مادهلری کونلرچه سرکلر اورتهسیده قالیب و یاغینگرچیلیک بولگنی پیت، سرکلرنینگ افلاسلنیشی و اوتیب-قیتیلهدیگن یوللرنینگ بند بولیشیگه سبب بولهدی. «قوریلیش مادهلرنینگ سرکگه تشلهنیشی و اوندن کیین یاغینگرچیلیک بولیشی، کوپراق قیینچیلیک یرهتهدی. کاش بو ایشلرنی قیلمسهلر. حداقل قوریلیش مادهلرنی اویلری یا-ده بیر چیت گه قویسهلر که بو رقم سرکلر و کوچهلر پاک و منظم قالسه.»
قندوز شهری یشاوچیلریدن باشقه بیری ذبیحالله گه کوره: «شهرده یشش فرهنگی اورگهتیلیشی اوچون دولتدن ایستهیمیز که اولرگه ایتیلسین، مسجدلرده اعلام بولسین که بو رقم اهالی اذیت بولمهسین. بو جودهیم کوپینچه قیینچیلیککه سبب بولهدی. سرکلرده لای قیلگنلریده کوچهدن اوتیشده کییمگه لای اوچسه، نماز بولمهی. شونینگدیک جویچهلر لایدن تولهدی.»
شوندهی بیرحالده، قندوز بلدیه مطبوعات مسئولی تاجالدین سحاکنینگ ایتیشیچه، بو شهردهگی ۹ ناحیه مسئوللریگه، عمومی سرکلرده قوریلیش مادهلری تشلنگنی و توپلهنیب قالگنی کوریلگنی صورتده، متخلفلر بیلن قانونی یاندهشیشی توغریسیده بویروغ بیریلگن.
جناب سحاکنینگ کوپهیتیریشیچه: «بو کبی ایشلر یعنی شهر ترتیبینی رعایت قیلمهگن کیشیلر گه ناحیه توسیق بولهدی و قانونی یاندهشیشی ممکن، چونکه اولرگه ایتیلگن و بیر ییل ایمس، اوچ ییلدن بیری بو پروسهنینگ دوامی بار. یشاوچیلردن قطاری حقیقتا شهرده یشش فرهنگیگه اعتبار قرهتهدیلر، بیراق بیر قطار کیشی توجه قیلمهیدی. قندوز بلدیهسی و ناحیه آرقهلی توجه قیلهیدیگن کیشیلر بیلن قانونی یاندهشیلیشی ممکن.»
نهفقط قندوز، بلکیم شهرلردن کوپ قطاریده اوی و بنالرنینگ قوریلیش مادهلری سرکلر و پیاده یوللرگه تشلنهدی که بو ایش، یوللر بند بولیشی و یشاوچیلرنینگ کوندهلیک اوتیب-قیتیشینی قیینچیلیک بیلن روپهره قیلهدی.
