تخار مرکزی تالقان شهری ده یاشلردن بیرقطاری، کتاب اوقیش فرهنگینی رواجلنتیریش مقصدیده «نمایش‌گاه کتاب و روند مطالعه مؤثر» عنوانیده یول بویی کتاب کورگزمه‌سینی یولگه قویگنلر.
اولر نینگ ایشانچی گه کوره، انسان‌لر کتاب اوقیش اوچون وقت اجره‌تمه‌گن حالده، قیینچلیکلر گه دوچ بوله‌دی.
مذکور یاشلر، جامعه ده کتاب اوقیش فرهنگی رواج ایمسلیگیدن ناخوش‌لیک بیلدیریب ایتیشلریچه، کتاب اوقیش بیلن حاضرگی انقراضلی احوال دن قوتیلیش ممکن دیر.
بیزلرنینگ فیسبوک صحیفه‌میزگه باش اورینگ!
اوشبو برنامه تشکیلاتچیسی عبدالکریم غریب اوغلی گه کوره، حاضرگی یاشلر کتاب اوقیش اورنیده کوپراق اجتماعی ترماق‌لر بیلن مصروف دیر.
اونینگ کوپه‌یتیریشیچه: «اوشبو برنامه ده یاشلر، دین عالملری، اوقیتووچیلر اشتراک ایتگن ایدیلر، بو برنامه‌نی مؤفقیت‌لیک بیلن اوتکزدیک، کیله‌جکلرده اوشبو برنامه دوامی اوچون سعی و حرکت قیله‌میز، معلوماتیمیزنی کوپه‌یتیریش مقصدیده کتاب اوقیشیمیز کیره‌ک.»
عین‌حالده، مذکور برنامه ده اشتراک ایتگن دین عالملریدن بیرقطاری، کتاب اوقیش فرهنگی رواجلنیشی اوستیگه تأکیدلشگه قوشیمچه، مملکت بویلب آلتینچی صنف دن یوقاری قیزلر نینگ مکتب‌لری آچیلیشینی طلب قیله‌دیلر.
دین عالمی محمد یعقوب گه کوره: «حاضرگی شرایط ده ییگیت‌لرنی کتاب اوقیش علاقه‌سی کمه‌یگن، بیر تاماندن اوروش و باشقه تاماندن آلتینچی صنف دن یوقاری قیزلر نینگ مکتب‌لری یاپیق قالیشی، یاشلر اوستیگه تأثیر قیلگن. اسلام امیرلیگیدن کیله‌سی ینگی تعلیمی ییل ده آلتینچی صنف دن یوقاری قیزلر نینگ مکتب‌لرینی آچیشینی طلب قیله‌میز.»
بیزلرنینگ توییترده هم تعقیب قیلینگ!
شونینگدیک اوشبو کورگزمه ده اشتراک ایتگن عبدالباری غفوری نینگ ایتیشیچه: «هوشمند تیلیفون‌لر یاشلر نینگ کتاب اوقیش علاقه‌سینی کمه‌یتیرگن، یاشلر آره‌سیده کتاب اوقیش فرهنگی رواجلنیشی اوچون بو گَل برنامه‌لر اوتکزیلیشی اونملی دیر.»
عین‌حالده تخار ده‌گی فرهنگی یاشلر، جامعه ده کتاب اوقیش فرهنگینی رواجلنتیریش و یاشلرنی ترغیب قیلیش مقصدیده، اوشبو ولایتده انده-سنده کتاب کورگزمه‌لرینی یولگه قویه‌دیلر.