تورکستان ایللری اوقوو کلتور و یاردملشمه اویوشمهسی تامانیدن افغانستان تورکلری نینگ قدرلی شخصیتی محمد عالم کوهکن خاطرهسیگه بغیشلنگن تدبیر اۉتکزیلدی.
دستور قرآنکریم تلاوتی بیلن باشلندی. آچیلیش نطقینی سۉزلهگن تورکستان ایللری اوقوو کلتور و یاردملشمه اویوشمهسی باشلیغی محمد هاشم همدم، عالم کوهکن افغانستان تورکلری نینگ تیلی و مدنیتی اوچون ییللر دوامیده کورهشگن بویوک شاعر، یازووچی و ژورنالیست اېکنلیگینی تأکیدلب، شوندهی دېدی: «بیز افغانستان تورکلری بیلن دنیا تورکلری اۉرتهسیده کۉپریک بۉلهدیگن بوندهی تدبیرلرنی دوام اېتتیرهمیز.»
جناب همدم، شونینگدېک، اویوشمه باشقروو کېنگشی نینگ قراریگه کۉره، هر ییلی ۲۱-اکتوبر — اۉزبېک تیلی بیرهمی مناسبتی بیلن «محمد عالم کوهکن مکافاتی» تورک دنیاسیدن بیر شاعر، یازووچی و بیر ژورنالیست گه تاپشیریلیشینی اعلان قیلدی.
کوهکن نینگ اۉغلی تویغون کوهکن آتهسی نینگ حیاتی و فعالیتیدن سۉزلب، مرحوم نینگ توگللنمهی قالگن اثرلرینی چاپ اېتیشگه وعده بېردی. دستورده عالم کوهکن شعرلریدن نمونهلر اۉقیلدی.
تدبیر نینگ ایکّینچی قِسمی «کوهکن نینگ حیاتی و فعالیتی» ناملی پنېل بیلن دوام اېتدی. پنېل تیآرتی اۉزبېکچه خدمتی وکیلی عبدالرحیم معصومی مادېرهتارلیگیده، بلخ بیلیم یورتی تورک تیلی و ادبیاتی سابق رئیسی ضیاء قیصاری، قونیه نجم الدین اربکان بیلیم یورتی اۉقیتووچیسی دکتر رضوان اۉزتورک و تاشکېنت بیلیم یورتی اۉقیتووچیسی دکتر عزیزالله آرال نینگ معروضهلری بیلن بۉلیب اۉتدی.
دستور یکونیده تورکستان ایللری اوقوو کلتور و یاردملشمه اویوشمهسی نینگ کتابخانهسی «محمد عالم کوهکن کتبخانهسی» نامی بیلن آچیلدی.
