ایران و امریکا اورتهسیده اعلان قیلینگن ایکی هفتهلیک صلحدن نیچه ساعت اوتیب، اسرائیل لبنان حدودی بویلب کینگ کولملی هوا هجوملرینی باشلهدی.
الجزیره بوگون (۲۰ حمل/۹ اپریل، پنجشنبه) ترقهتگن گزارشیده، اوشبو هجوملرده کمیده ۲۵۴ کیشی اولیب و بیر مینگ ۱۶۵ دن آرتیق کیشی یرهلنگنینی معلوم قیلگن.
اسرائیل اردوسی ایسه لبنان بویلب ۲ مارچ کونیدن بیری آلیب بارهیاتگن حربی عملیات دایرهسیدهگی اینگ ییریک موافقلشتیریلگن ضربه عملگه آشیریلگنینی معلوم قیلگن. بو هجوملر تینچ اهالی یشهیدیگن لبنان پایتختی بیروت، بیکوا وادیسی همده مملکت جنوبی حدودلرینی قمرهب آلگن.
اسرائیل مدافعه وزیری اسرائیل کیتس، ضربهلر حزبالله آست قورمهلریگه قرهتیلگنینی تأکیدلهگن. اونینگ سوزلریگه کوره، اسرائیل حربیلری لبنان بویلب قوماندانلیک مرکزیده جایلشگن یوزلب جنگریلر گه کوتیلمهگن ضربه بیرگن.
اسرائیل تامانی ضربه گه اوچرهگن آست قوریلمهلرنینگ اکثریتی تینچ اهالی یشهیدیگن حدودلرده جایلشگنینی تن آلیب، «بیگناه فقرالر» گه ضرر ییتکزمسلیک اوچون چارهلر کوریلگنینی بیلدیرگن.
گواهلرنینگ ایتیشیچه، بیروت و اونینگ اطرافیده کوچلی پارتلشلر یوز بیرگن، آسماننی توتون قاپلهگن.
شو بیلن بیرگه، ایران اسرائیلنینگ لبنان گه هجوملری امریکا قوشمه ایالتلری بیلن مذاکرهلرنی «منطقسیز» قیلیشینی بیلدیرگن.
امریکا جمهور باشلیغی دونالد ترامپ و اسرائیل باش وزیری بنیامین نتانیاهو، ایران بیلن ایکی هفتهلیک صلح کیلیشووی گه لبنان شامل ایمسلیگینی ایتگنلر.
بیش هفتهدن آرتیق ایچیده لبنانده بیر مینگ ۷۳۹ کیشی اولگن و بیش مینگ ۸۷۳ کیشی یرهلنگن.
