کابل شهری بادامباغیده یولگه قوییلگن ایچکی تولیدلر، چاروه‌چیلیک و ایکینچیلیک محصولاتی نینگ ۳۱-کورگزمه‌سیده تدبیرکار عیاللردن قطاری نینگ ایتیشلریچه، کورگزمه‌لر نینگ یولگه قوییلیشی اولر گه بازار تاپیش زمینهسینی یره‌تگن و بو توغریده کوپراق توجه قره‌تیلیشی کیره‌ک.
مذکور کورگزمه‌ده قول صناعتی نی نمایش گه قوییب و ساتیلیشینی کوتیب تورگن «فوزیه تیکووچیلیک و گل‌دوزلیک» ایش‌خانه مسئولی فوزیه سخی‌زاده ایتیشیچه، بو کورگزمه نینگ یولگه قوییلگنی و محصولاتی ساتیلیشی خصوصیده قولگه کیلتیرگن فرصت، اونینگ اوچون کوپ اونملی دیر. «کورگزمه‌لر تورلی نهادلر و مالی حمایت قیلووچیلر بیلن تانیشیمیز و شونینگدیک کوپینچه مشتری تاپیشیمیز خصوصیده یاردم بیره‌دی.»
«اکتید» نهادی حمایتی بیلن بدخشان دن بو ییرگه کیلگن فوزیه نینگ کوپه‌یتیریشیچه، مذکور ایش‌خانه‌ده تیکووچیلیک،گل‌دوزلیک، مهره‌دوزلیک و یونگ ییگیریش بولیمی‌ده، ۵۰ عیال گه ایش زمینه‌سی نی یره‌تگن.
بادام‌باغ‌‌ده ایکینچیلیک و قول صناعتی خصوصیده‌گی تدبیرکار عیاللردن باشقه بیری آنیتا سخی‌زاده نینگ ایتیشیچه: «بیرینچی مرته دیر که اکتید دفتری حمایتی بیلن هرات دن بو کورگزمه گه شرکت قیلگن‌مین؛ کوپ خورسند‌مین؛ عیاللر نینگ حمایت قیله‌دیگن نهادلردن عیاللر نینگ کوپراق حمایت قیلینیشینی ایسته‌یمیز که اوزلری مستقل بولسینلر.»
بیزلرنینگ «ایکس» ترماغی ده هم تعقیب قیلینگ!
او، سرپرست حکومت و یاردم بیرووچی نهادلردن، کورگزمه‌لر گه تدبیرکار عیاللر اشتراک قیلیشلری زمینه‌سی نینگ کوپه‌یتیریلیشینی ایسته‌گن.
قول صناعتی بولیمی‌ده فعالیت قیله‌دیگن ۵۸ یاشر حبیبه سادات نینگ ایتیشیچه، اوشبو کورگزمه‌لرده قرص، یقه، بیک و هزارگی کییم‌لر توغریسیده نیچه قرارداد نی قولگه کیلتیره آلگن.
«آنگبین» شرکت مسئولی و کابل شهری بادامباغیده یولگه قوییلگن ایچکی تولیدلر، چاروه‌چیلیک و ایکینچیلیک محصولاتی نینگ ۳۱-کورگزمه‌سی گه شرکت قیلگن مسعوده عثمانی نینگ ایتیشیچه: «کورگزمه‌لر گه شرکت قیلیش فایده‌لی دی. کورگزمه‌لر نینگ یولگه قوییلیشی بیلن اهالی اوز اولکه‌لری محصولاتی خصوصیده‌گی آگاهی‌لیک تاپه‌دی و شونینگدیک محصوللریمیز گه بازار تاپیلیشی و ساتیلیشی اوچون یخشی دیر.»
«تلاش» قول صناعتی و تیکووچیلیک مسئولی خاطره نوری نینگ ایتیشیچه، شخصی شکلده ایکینچیلیک، سووغاریش و چاروه‌چیلیک وزیرلیگی‌دن غرفه آلیب و بو کورگزمه گه شرکت قیلگن. «کورگزمه گه شرکت قیلگنیم‌دن رضایتیم بار؛ شرکت قیلگنیم سوداگر عیاللر نینگ کوریشیم گه سبب بولگن، اهالی حضوری کوپ و ساتیشلریمیز یخشی دیر.»
خاطره نینگ کوپه‌یتیریشیچه، ایش‌خانه‌سیده ۱۱ کیشی ایش بیلن شغللنیب و قول صناعتی، توقووچیلیک اوسکونه‌لری، افغانی کییم‌لر و بیک کبی محصوللر تولید قیله‌دی. «کوپینچه محصوللر نی تولید قیلیب و ساتیش اوچون نهادلردن کیلیب و بیزلرنی حمایت قیلیشلرینی ایسته‌یمیز»
بیزلرنینگ فیسبوک صحیفه‌میزگه باش اورینگ!
«روپانی» شرکتی ایشلاوچیلریدن ۲۰ یاشر سویتا نینگ ایتیشیچه، مذکور شرکت‌ده زرگرلیک و اویمه‌کارلیک بولیم‌لریده ۶۰ کیشی ایش بیلن شغللنگن. اونینگ کوپه‌یتیریشیچه: «هر بیر صنف‌ده ۱۰-۲۰ کیشی زرگرلیک، اویمه‌کارلیک و سنگ‌تراشلیک بولیم‌لریده ایشله‌یدیر. بو کورگزمه گه شرکت قیلگنیم‌دن کوپ خوش‌مین. سونگی کونلر محصوللریمیز نینگ ساتیلیشی یخشی و کوریب چیققه‌دیگنلر سانی هم کوپ دیر.»
ایکی ییل آلدین قول صناعتی شرکتی نی ایجاد قیلیب و ۱۶ کیشی گه ایش زمینهسینی یره‌تگن دیانا نینگ ایتیشیچه، شرکتی‌ده افغانی کییم‌لر، مهره تیکیلگن بیک‌لر و باشقه قول صناعتی تولید و ایچکی و تشقی بازارلر گه عرضه بوله‌دی. اونینگ کوپه‌یتیریشیچه: «کورگزمه فرهنگی‌میز نی کورسته‌دی؛ کورگزمه عیاللر نینگ راحت بیر شکلده ایشلشی و محصوللری نینگ ساتیشلری اوچون یگانه بولیم دیر. اهالی و نهادلر کورگزمه‌لر گه باریب و محصوللریمیز گه بازار تاپیله‌دی.»
ایتیش کیره‌ک که، مذکور کورگزمه‌ده افغانستان نینگ ایکینچیلیک و چاروه‌چیلیک محصولاتی، پروسس بولگن تولیدلر، قول صناعتی، ایکینچیلیک ماشین‌لر و ایچکی تولیدلر دستگاه‌لری نمایش گه قوییلگن. سرپرست حکومت نینگ ایکینچیلیک، سووغاریش و چاروه‌چیلیک وزیرلیگی نینگ اعلامیه‌سی اساسیده، کابل شهری بادامباغیده یولگه قوییلگن ایچکی تولیدلر، چاروه‌چیلیک و ایکینچیلیک محصولاتی نینگ ۳۱-کورگزمه‌سیده، ۲۶۳ غرفه نمایش گه قوییلگن که، ۵۶ غرفه عیاللر گه اختصاص بیریلگن.
کابل شهری بادامباغیده یولگه قوییلگن ایچکی تولیدلر، چاروه‌چیلیک و ایکینچیلیک محصولاتی نینگ ۳۱-کورگزمه‌سی، اوتگن هفته چهارشنبه کونی سرپرست حکومت نینگ یوقاری مرتبه‌لی رسمی‌لری جمله‌‌دن اسلام امیرلیگی باش وزیری نینگ اقتصادی اورین باسری عبدالغنی برادر، ایکینچیلیک، سووغاریش و چاروه‌چیلیک وزیرلیگی مسئوللری و باشقه ملی و خلق‌ارا نهادلر مسئوللری نینگ حضوری بیلن کابل ده آچیلگن.