تخار ده عیاللردن قطاری اوچون بیپشتلیک جدی خواطرلردن بولگنی بیلن، بیراق آگاهیسیزلیک، عایلهوی باسیملر و ناتوغری ایشانچلر سبب، عیاللر شفاکار گه مراجعت قیلمهیدیلر. مذکور عیاللر حاملهدار بولیش اوچون کیندیکنی تاولش، سنتی شکلده دوالنیش و باشقه اصوللر گه یوز کیلتیرهدیلر که بو اصوللر فایدهلی بولمهگنی یانیده بعضا ایسه جسمی و روحی قیینچیلیکلرگه هم سبب بولگن.
توی قیلگنیدن بیش ییل بولیب و حاضرگچه باله صاحبی بولمهگن تخار مرکزی تالقان شهری یشاوچیسی بولمیش ۳۰ یاشر شکیلا احمدینینگ ایتیشیچه، حاملهدار بولیش اوچون سنتی دوالنیشدن فایدهلنگن، بیراق فایده قیلمهگنی یانیده، اونینگ ساغلیگیگه هم زیان ییتیشتیرگن.
بیزلرنینگ «ایکس» ترماغی ده هم تعقیب قیلینگ!
بانو احمدینینگ کوپهیتیریشیچه: «عایلهم عیاللر بو ایشنی قیلیب و باله صاحبی بولهر ایدی دیب مینی کیندیگیمنی تاولش اوچون کمپیرلر یانیگه آلیب باردی. نیچه مرته کیندیگیمنی تاولهدیلر و شونینگدیک نیچه مرته چلپک داغ قیلیب و کیندیگیمگه قویدیلر که فایده قیلمهگنی یانیده، قرنیم تیریسی کویدی و وضعیتم یامان هم بولگن ایدی. شفاکارلرگه باریشگه مجبور بولدیم. شفاکار هورمونی قیینچیلیگیم بولگنینی و یاشیمنینگ یوقاری کیتگنینی ایتدی. حاضر دوالنیش آستیدهمین، بیراق روحی قیینچیلیککه چلینگنیمنی حس قیلهمن.»
باله صاحبی بولمهگن عیاللردن باشقه بیری اوشبو ولایت آقمسجد قیشلاغی یشاوچیسی بولمیش مهسا یوسفینینگ ایتیشیچه، تورموش اورتاغینینگ عایلهسی اونینگ شفاکارگه باریش اورنیده علمی بولمهگن اصوللردن فایدهلنیشگه تاکید قیلگن. «توی قیلگنیمدن آلتی ییل بولگن، بیراق بالهم بولمهدی. تورموش اورتاغیمنینگ عایلهسی شفاکارلر سوزلریگه ایشانچلری یوق و مینی ملا و فالچیگه یوبارهر ایدی. شفاکار تخمدانلریمنینگ ضعیف بولگنینی ایتگن ایدی، بیراق تورموش اورتاغیمنینگ عایلهسی شفاکار دارولریدن فایدهلنیشگه رخصت بیرمهدیلر و هر تورلی نرسه بیریب و بچهدانیمنینگ خراب بولیب و بیر هفته بستری بولیشیمگه سبب بولدیلر که حاضر شفاکارلر حاملهدار بولیشیم امکانینی جوده آز دیدیلر.»
شونینگدیک حاملهدار بولیش اوچون سنتی اصوللردن فایدهلنیش سبب تورلیخیل ساغلیق قیینچیلیکلرگه چلینگن تخارنینگ پوستخور قیشلاغی یشاوچیسی ستایش واحیدینینگ ایتیشیچه: «بیرینچی مرته شفاکار گه بارگنیمده بچهدانده قیینچیلیک بارلیگینی ایتدی، بیراق اوزیم و تورموش اورتاغیم عایلهسی شفاکارلرگه ایشانچیمیز یوق ایدی. مینی ملا گه آلیب باردیلر. نیچه اوسیملیک بیردی و بیرته دارونینگ بچهدانیمگه قوییلیشینی ایتدی. نیچه آی اوتگنیده بچهدانیمگه یره تاپیلدی و معدهم هم آغریدی. فایده قیلمهی و کوپ ضرر هم قیلدی. حاضر کوپ پشیمانمین که نیگه شفاکاردن دارو آلمهدیم دیب.»
شوندهی بیرحالده، تخار ده نسایی-ولادی متخصصی نودا ظاهری نینگ ایتیشیچه، سنتی اصوللردن فایدهلنیش جدی سلبی عاقبتلرگه ایگه بولیب و حاملهدارلیک شانسینی اورتهدن کیتگزهدی. «قیغو بیلن عیاللردن قطاری ساغلیق مرکزلرگه باریش اورنیده سنتی اصوللردن فایدهلنهدیلر که فایده قیلمهگنیگه علاوه، بچهداننینگ میکروبی بولیشی، لولهلرنینگ یاپیلیشی، همورمونی قیینچیلیکلر و حتا حاملهدارلیک بولیش شانتینینگ اورتهدن کیتیشی کبی جدی عاقبتلرگه سبب بوله آلهدی. عیاللردن میش-میشلرگه ایشانمهی و شفاکارلرگه مراجعت قیلیشلرینی ایستهیمن.»
بو ولایتدهگی شفاکارلردن باشقه بیری الهه محمدی، حاملهدارلیک قیینچیلیکلریدن کوپ قطارینینگ وقتیده ساغلیق مرکزلرگه مراجعت قیلیش بیلن دوالنیشی ممکن بولگنینی بیان قیلیب، بیپشتلیک عامللری و اونینگ دوالنیشی یوللری توغریسیده ایتیشیچه: «عیاللرده بیپشتلیک عامللری کوپراق هورمونی قیینچیلیکلر، تخمدان تنبللیگی، بچهدان میکروبی بولیشی و یاشنینگ یوقاری کیتیشی دیر. کسللردن کوپ قطاری ۳۰.۳۵ یاش آرهسیده دیر، بیراق کیچیکراق یاشلرده هم کوریلهدی. ملا گه باریش یا-ده اوسیملیک دارولردن فایدهلنیش فایدهلی ایمس.»
بیزلرنینگ فیسبوک صحیفهمیزگه باش اورینگ!
شوندهی بیرحالده، تخار ولایتیده دین عالملریدن عبدالقدوس تالقانینینگ ایتیشیچه، عیال حرمت، حجابی و شرعی اصول رعایت بولیش شرطی بیلن طبی یوللری آرقهلی باله صاحبی بولیش اوچون سعیوحرکت گه رخصت بیریلهدی. «اسلامده طبی یوللر آرقهلی حاملهدار بولیشگه رخصت بیریلگن دیر، شرط بو که حجاب مراعت بولیب و عیال حرمتی سقلنسه. دارو و پیچکاریدن فایدهلنیش و شفاکار گه باریشنینگ هیچ قیینچیلیگی یوق. شونینگیک دعا قیلیش و حاجت نمازی مشروع یوللردن دیر، بیراق فالچیلر، جادوگرلر و تعویذ آلیش ناروا دیر. اینگ یخشی یول علمی یوللر و دعا قیلیش دیر.»
بیپشتلیک دوالنیشی اوچون عملی بولمهگن اصوللردن فایدهلنیشنینگ دوام قیلیشی، نه فقط عیاللر ساغلیگینی خوف آستیده قویهدی، بلکیم دوالنیش جریانینی هم قیینچیلیک بیلن روپهره قیلهدی. آگاهیلیک آشیریلیشی، عایلهلر آرقهلی قوللب-قوتلنیش و ساغلیق مرکزلرگه باریشنینگ رواجلنتیریلیشی بیلن، حاملهدارلیک اوچون علمی یوللردن فایدهلنیشنینگ رواجلنتیریش ممکن.
