اسلام امیرلیگی رسمیلریگه کوره، بیر آیدن کوپراقده پاکستان حربی کوچلرینینگ افغانستان گه هجوملری عاقبتیده چمهسی ۷۶۱ تینچ اهالی شهید بولگن.
اسلام امیرلیگی سوزلاوچیسینینگ اورین باسری حمدالله فطرت، بوگون (۱۶ حمل/۵ اپریل، یکشنبه) ایکس صحیفهسیده بیر بیانیه ترقهتیب، میلادی ۲۰۲۶ ییل، ۲۲ فبروری کونیدن حاضرگه قدر، پاکستاننینگ افغانستان تورلی حدودلریده اویوشتیرگن هجوملریده، ۷۶۱ تینچ اهالی شهید بولیب و ۶۲۶ کیشی یرهلنگنینی بیلدیردی.
بیانیه گه کوره، پاکستان حربی کوچلری اوشبو مدت دوامیده ننگرهار، قندهار، پکتیا، پکتیکا، خوست، کابل، کنر، لغمان و نورستان ولایتلریگه هجوم اویوشتیریب انسانی و مالیهوی جدی ضرر ییتکزگن.
بیانیه اساسیده، پاکستان هجوملری نتیجهسیده بیر مینگ ۱۴۰ یشش اوی، ۲۵۶ دکان، ۳۴ مسجد، ۱۳ مکتب، ۱۳ دینی مدرسه، ۳ کلینیک و ۴۲ موتر یوق قیلینگن.
شونینگدیک بیانیهده، پاکستان هجوملریده ۶۶۱ چاروه تلف بولیب و ۲۷ مینگ ۴۰۷ عایله آواره بولگنی قید ایتیلگن.
پاکستان قویاش ۱۴۰۴ ییل، ۳ حوت کونی افغانستان ایریم حدودلری اینیقسه کابل و پکتیکانی بمباردمان قیلگندن سونگ اسلام امیرلیگی و پاکستان اورتهسیده اوروش باشلندی. بو هجوملر اسلام امیرلیگینینگ قرشیلیگی بیلن دوچ بولدی و تامانلر اورتهسیده اوروش همان دوام ایتماقده.
