کنر دهگی شفاکارلردن قطارینینگ ایتیشلریچه، تنهده کلسیم کملیگی سویک ضعیفلیگی، تیشلرنینگ بوزیلیشی، ساچ توکیلیشی و باشقه بیر قطار ساغلیق قیینچیلیکلرگه سبب بولهدی. اولرگه کوره، کلسیم و ویتامین دی کملیگی اینیقسه عیاللرده بیر قطار ساغلیق قیینچیلیکلرنی اورته کیلتیرهدی.
مذکور ولایتدهگی ارتوپیدی بولیمی متخصصی سمیعاللهنینگ ایتیشیچه، کلسیم کملیگی سویکلر ضعیف بولیشیگه سبب بولهدی و اونینگ آلدینی آلیش اوچون ساغلام شکلده آوقتلنیش، قویاش نوریدن فایدهلنیش و سپورت قیلیش مهم دیر. اونینگ کوپهیتیریشیچه: «کلسیم کملیگی جودهیم خوفلی دیر. سوت، پنیر، قتیق همده سبزهواتدن کوپ فایدهلنیش کیرهک. شونینگدیک یانغاق، بادام و انجیر کبی قوریق میوهلردن فایدهلنیش و قویاش نوریده اولتیریب و ویتامین دی آلیش مهم دیر.»
بیزلرنینگ «ایکس» ترماغی ده هم تعقیب قیلینگ!
شونینگدیک عیال شفاکارلردن عاطفه صافینینگ ایتیشیچه، ایرککلرگه نسبت عیاللر کوپراق کلسیم کملیگی بیلن روپهره بولهدی. او، عیاللرده کلسیم کملیگی اثرلری توغریسیده شوندهی دیدی: «عیاللرده کلسیم کملیگی، حیاتنینگ تورلی دورهلری جملهدن حیض کوریش پیتیده قان کیتیش و هورمون اوزگریشلری سبب کوپهیهدی. حاملهدارلیک دورهسیده جنین سویک و تیشلری اوچون کلسیمگه نیازی بولهدی و سوت بیریش دورهسیده هم آنه سوتیدهگی کلسیم چقهلاقنینگ کته بولیشی اوچون کیرهک دیر. عیاللر ۴۰ یاشدن کیین اینیقسه حیض کوریشلری کیسیلگنیدن سونگ اولرنینگ تنهسیده استروجن هورمونی کمهیهدی که بو ایش کلسیم جذب بولیشی کمهیشی و نتیجهده سویکلرنینگ نازک بولیشیگه سبب بولهدی. انه شوو سبب، عیاللر کوپراق سویک سینیشی، بیل آغری و باشقه ساغلیق خوفلر بیلن کوپراق روپهره بولهدیلر.»
کنر ولایتیدهگی عیاللردن بیری نفیسه، بیش ییلدن بیری کلسیم کملیگی قیینچیلیگیدن اذیت چیکیشینی بیان قیلیب و ایتیشیچه، شفاکارلر ساغلام شکلده آوقتلنیش و دارودن فایدهلنیش یانیده، ساغلیق وضعیتی یخشیلنیشی اوچون باله کیلتیریشی آرهسیده وقفه قوییشینی توصیه قیلگن. «جودهیم چرچهگنمین. سویکلریم آغریدی، هر کون ساچلریم توکیلهدی و شفاکارلر ساغهیشیم اوچون دارولریمنی درست ییشیمنی توصیه قیلدیلر. شونینگدیک اولر تنهمده کلسیمنینگ درست بولیشیگه قدر بالهلریم آرهسیده وقفه قوییشیمنی ایتدیلر.»
اوچ ییلدن بیری کلسیم و ویتامین دی کملیگی بیلن روپهره بولگن کنر ولایتیدهگی عیاللردن باشقه بیری شگوفهنینگ ایتیشیچه، تنه آغریق، ساچ توکیلیشی و چرچهش، حیاتنی اونینگ اوچون قیینلشتیرگن. «تنهم آغریدی، چرچهیمن، تیریم قوریدی و ساچیم توکیلهدی. دوالنیش اوچون شفاکار گه باردیم. شفاکار دارولریمنی درست شکلده ییب و قویاش نوریدن فایدهلنیشیمنی ایستهدی. بو قیینچیلیک ایکینچی بالهمنینگ دنیا گه کیلتیرگنیمدن کیین تاپیلدی. بعضا کوپ چرچهب قالهمن و حتا اوی ایشلرینی قیله آلمهیمن.»
بیزلرنینگ فیسبوک صحیفهمیزگه باش اورینگ!
شونینگدیک اوچ باله آنهسی بولمیش گل بشرانینگ ایتیشیچه، ایکینچی بالهسینی دنیا گه کیلتیریشدن کیین کلسیم کملیگی بیلن روپهره بولگن. «ساچلریم توکیلهدی، دایم چرچهگنمین و تیرناقلریم سینهدی. شفاکارلر کلسیمی بولگن نرسهلر جملهدن لبنیات و سبزهواتدن فایدهلنیشیم، قویاش نوریده اولتیریشیم و شونینگدیک تنهمنینگ کوچلنیشی اوچون پیاده یوریشیمنی ایستهیدی.»
ایتیش کیرهک که، عیاللر تنهسیده کلسیم و ویتامین دی کملیگی نهفقط سویک و تیش قیینچیلیکلریگه سبب بولهدی، بلکیم بوتون وجودنینگ ساغلیگیگه تاثیر قویهدی. اوشبو قیینچیلیک آلدی آلینیشی اوچون ساغلام آوقتلنیش، منظم شکلده فزیکی فعالیت و شفاکار مصلحتی بیلن کلسیم و ویتامین دی گه ایگه بولگن دارولردن فایدهلنیش، ییچیم یوللردن دیر.
