افغانستان استراتیژیک مطالعه‌لر انستیتیوتی «تینچلیک سوزلشوولری و افغانستان عیاللری نینگ حقوقی» آتی آستیده مجازی بیر ییغین یولگه قویگن.
مذکور ییغینده نطق سوزله‌یدیگنلر افغانستان تینچلیک پروسه‌سی و شونینگدیک اوتگن ایکی دهه‌ده انسان حقلری و عیاللرنینگ یوتوق‌لری خصوصیده بحث و سوزلشگن.
کابل ده بیرلشگن ملتلر تشکیلاتی نینگ اورین‌باسری الیسان دیوندر بو ییغینده ایتیشیچه، افغانستان دولتی و طالبان گروهی آره‌سیده تینچلیک سوزلشوولری دوام ایتیب کیله‌دیگن بیرحالده، مذکور سوزلشوو ناکام بولگن صورتده ایکینچی هیچ بیر برنامه یوق دیر.
خانم دیوندر نینگ ایتیشیچه، تینچلیک پروسه‌سی افغانستان ده برچه نرسه نینگ اوستیگه تأثیر قویه‌دی و هر کیم بو پروسه توغریسیده سوزله‌یدی، بیراق هیچ کیم بو برنامه نینگ ناکام‌لیگی حقیده هیچ نرسه دیمه‌گن و افغانستان حکومتی و طالبان گروهی آره‌سیده‌گی سوزلشوولر نتیجه بیرمه‌گنده عیاللر، انسان حقوقی و برچه ارزشلر و یوتوقلرنینگ وضعیتی قنده‌ی بولیشی بیللی ایمس.
خانم دیوندر نینگ ایتیشیچه، تینچلیک سوزلشوولریده عیاللر حقوقی توغریسیده کمراق سوزله‌شیلگن و بو خواطرلی دیر.
اونینگ ایتیشیچه، طالبان حکومت ده عیاللرنینگ حضوری خصوصیده توسیق ایمس‌لیکلرینی بیلدیرگن، بیراق اولر رهبرلیک و قضا مقام‌لریده عیاللرنینگ حضوری خصوصیده قرشی‌لیگی نی ایتگن کیم بو عیاللر و افغانستان حکومتی اوچون کتته بیر قیینچلیک دیر.
کابل ده بیرلشگن ملتلر تشکیلات دفتری اورین باسری الیسان دیوندر نینگ ایتیشیچه: «تینچلیک اوچون نیمه نرسه‌لرنی قربانی قیلشی‌میز و شونینگدیک بو پروسه نینگ دوامی اوچون قیسی قیزیل چیزیغی‌میز بارلیگی بیللی بولیب و اونینگ حقیده بحث قیلیش کیره‌ک.»
انسان حقوقی و عیاللر ایشلری بوییچه نماینده‌لر کینگش کمیسیونی باشلیغی ناهید فرید مذکور ییغینده ایتیشیچه، افغانستان اهالیسی نیچه ییل‌لیک یوتوق‌لری قربانی بولیشی گه هیچ قچان رخصت بیرمه‌یدی.
خانم فرید نینگ ایتیشیچه، افغانستان مذاکرچی هیأت اعضالری آره‌سیده عیاللر کم دیر و بو خواطرلی دیر.
خانم فرید نینگ ایتیشیچه، افغانستان نینگ حاضرگی یوتوق‌لری یالغیز عیاللرگه عاید ایمس، بلکیم افغانستان یشاوچی‌لریگه عاید و بوتون یشاوچی‌لرنینگ اوشبو یوتوق‌لرنی سقلش اوچون سعی و حرکت قیلیش‌لری کیره‌ک.
اونینگ ایتیشیچه، عیاللر خصوصیده طالبان نینگ فکریگه اوزگریش کیلگنی بیللی ایمس.
ناهید فرید نینگ کوپه‌یتیریشیچه، افغانستان یشاوچی‌لریدن ۶۵% نی یاش‌لر تشکیل بیره‌دی و افغانستان نینگ کیله‌جگی خصوصیده طالبان گروهی ایمس بلکیم اوشبو جمعیت قرار قیله‌دی.
خانم فریدگه کوره، افغانستان نینگ یاش جمعیتی هیچ‌بیر زمان طالبان نینگ ناتوغری سیاست‌لرینی قبول قیلمه‌دی و اوشبو سیاست برابریده توخته‌یدی.
عین‌حالده، انسان حقوقی ایرکین کمیسیونی باشلیغی شهرزاد اکبر نینگ ایتیشیچه، افغانستان تینچلیک جریانی‌نی هرتامانلمه بولیب و بوتون یشاوچی‌لرنینگ فکرلرینی اوشبو جریانده شامل قیلینیشی کیره‌ک.
مذکور ییغینده تانیقلی قاشیقچی‌لردن بیری آریانا سعید نینگ ایتیشیچه، طالبان و عیاللر خصوصیده دنیا نینگ فکری اوزگرگن، انسان حقوقی خصوصیده فعالیت قیله‌دیگن‌لر، افغانستان یشاوچی‌لری اینقسه عیاللری نینگ یوتوق‌لری و ایرکین‌لیگی قولدن کیتیشی اوچون رخصت بیرمه‌یدی.
خانم سعیدگه کوره، حاضرده وضعیت اوزگرگن، میدیالرگه قول تاپیش قولایی بولگن و بونده‌ی بیر وضعیتده ناتوغری سیاست‌لرینی کرسی‌گه جایلشتیریش اوچون افراطچی‌لر موفق بولمه‌یدی.
اوشبو ییغینده صحبت اوتکزگن‌لرنینگ تاکید قیلیش‌لریچه، تینچلیک سوزلشوولرنینگ نتیجه‌سی یالغیز عیاللر اوچون ایمس، بلکیم افغانستان یشاوچی‌لری اوچون اونملی دیر.
اولرنینگ کوپه‌یتیریش‌لریچه، تینچلیک سوزلشوولرده افغانستان اهالیسی نینگ فکرلرینی نظرگه آلینیشی کیره‌ک.
قطر باشکنتی دوحه‌ده افغانستان دولتی و طالبان گروهی آره‌سیده سوزلشوولر باشلنگنیدن سونگ، افغانستان یشاوچی‌لری اینقسه فعال عیاللر سونگی یوتوقلرنینگ سقله‌نیشی اوستیگه تاکید قیلیب کیلگن‌لر.
