افغانستانده کرونا ویروسی‌گه چلینگن‌لرنینگ سانی کون اوتیش بیلن کوپه‌یگن بیرحالده، خلق ارا کیچیریم تشکیلاتی نینگ بیر اعلامیه آرقه‌لی ایتیشیچه، کرونا ویروسی نینگ اوچینچی تولقینی اوچون خلق ارا جماعه‌سی تامانیدن یاردم بیریلمه‌گن صورتده، وضعیت نینگ حکومت کنترلیدن چیقیشی ممکن دیر.
خلق ارا کیچیریم تشکیلاتی تامانیدن ترقه‌تیلگن اعلامیه‌ده ایتیلیشیچه، افغانستانده کرونا ویروسی‌گه قرشی حکومت تامانیدن آلینگن تیارگرلیکلر ییترلی ایمس.
اوشبو تشکیلات نینگ آکسیجن کم‌لیگی‌دن خواطر بیلدیریب ایتیشیچه، افغانستان حکومتی نینگ خلق ارا جماعه‌سی یاردمی بیلن اوشبو قیین‌چیلیکلرنی حل قیلیشی کیره‌ک.
خلق ارا کیچیریم تشکیلاتی تامانیدن نشر قیلینگن اعلامیه کوره، کون اوتیش بیلن کرونا ویروسی‌گه چلینگن‌لرنینگ سانی کوپه‌یب بارماقده.
عین‌حالده، ساغلیق‌نی سقلش وزیرلیگی نینگ ایتیشیچه، اهالی نینگ دقت‌سیزلیگی سبب، کرونا ویروسی‌گه چلینگن‌لرنینگ سانی کوپه‌یگن.
خلق ارا کیچیریم تشکیلاتی کرونا ویروسی‌گه قرشی کوره‌شیش خصوصیده حکومت نینگ دقت‌سیزلیگی‌دن تنقید قیلگن، بیراق ساغلیق‌نی سقلش وزیرلیگی سوزلاوچیسی دستگیر نظری نینگ سلام‌وطندارگه ایتیشیچه، کرونا ویروسی ترقه‌لیشی بیلن اوشبو ویروس‌نی کنترل قیلیش اوچون هماهنگ‌لیکلر اورته‌گه کیلگن.
وضعیت خواطرلنترووچی بولگنی سبب، ایکی هفته آلدین مملکت ۱۶ ولایتیده بیلیم یورت‌لر و مکتب‌لر تعطیل ایتیلگن ایدی، بیراق ساغلیق‌نی سقلش وزیرلیگی رسمی‌لری نینگ ایتیش‌لریچه، تیکشیریش‌لرگه کوره، مکتب‌لر و بیلیم یورت‌لر تعطیل بولمه‌گن ولایت‌لرده کرونا ویروسی سرعت بیلن ترقه‌لگن.
شونینگدیک، هرات ولایت مقامی نینگ اورین باسری نوراحمد حیدری نینگ خبری بیر ییغینده ایتیشیچه، کرونا ویروسی‌گه توسیق بولیش اوچون بوگون دن باشلب بوتون مکتب‌لر، بیلیم یورت‌لر و تعلیمی مرکزلر تعطیل بولگن.
ساغلیق‌نی سقلش وزیرلیگی نینگ اعلان قیلیشیچه، اوتگن بیر کیچه و کوندوز ده کرونا ویروسی گه چلینگنلردن ۶۷ ته‌سی دنیا دن اوتیب و باشقه ۹۷۳ کیشی بو ویروس گه چلینگن.