بواسیر یا-ده هموروئید، لغمان ده حاملهدار عیاللر آرهسیده کینگ ترقهلگن کسللیکلردن بیری دیر. اوشبو کسللیک کوپراق حاملهدارلیکنینگ سونگی آیلریده اورته گه کیلهدی، گرچند توغری شکلده جنین گه زیان ییتیشتیرمهیدی؛ لیکن آنه گه روحی و جدی فیزیکی باسیم، خارش و آغریققه سبب بولهدی.
شفاکارلرنینگ ایتیشلریچه، تورلی عامللر حاملهدار عیاللرده بواسیرنینگ اورته گه کیلیشیگه سبب بولهدی. نسایی-ولادی شفاکاری صالحه، بواسیرنینگ اورته گه کیلیشی عامللری توغریسیده ایتیشیچه: «رگلرگه بچهداننینگ باسیم کیلتیریشی، هورمونی تغییرلر، قان حجمی آشیشی و اوزون مدتلی توختهش یا-ده اولتیریش، حاملهدارلیک دورهسیده بواسیرنینگ اورته گه کیلیشی عامللریدن دیر. بو قیینچیلیک کوپراق حاملهدارلیکنینگ سونگی اوچ آی آیی یا-ده توغیش جریانیده اورته گه کیلهدی. مذکور کسللیک چقهلاققه مستقیم شکلده زیان ییتیشتیرمهیدی؛ لیکن آنهنی جدی آغریق و باسیم بیلن روپهره قیلهدی.»
بیزلرنینگ فیسبوک صحیفهمیزگه باش اورینگ
کونده کوپینچه عیال بو کسللیگی دوالنیشی مقصد، مهترلام شهریده لغمان ولایتی کسلخانهسینینگ نسایی-ولادی بولیمیگه، مراجعت قیلهدی. مذکور کسلخانهدهگی قابله زینب احمدی، مراجعت قیلهدیگن کسللر سانی توغریسیده ایتیشیچه: «هر هفته معاینه قیلهدیگنیمیز حاملهدار عیاللردن، قریب ۵-۶ تهسی بواسیر قیینچیلیگی بیلن روپهره دیر.»
شونینگدیک لغمان ساغلیقنی سقلش ریاستیده عمومی جراحلیک متخصصی هاجره، اوشبو کسللیک عامللری و دوالنیشی یوللری خصوصیده ایتیشیچه: «رگلرگه بچهدان باسیمی کوپهیشی، هورمونی اوزگریشلری، اوزون مدتلی توختهش یا-ده اولتیریش و حاجت قیلیش چاغیده زور اوریش، حاملهدارلیکده بواسیرنینگ اصلی عامللریدن دیر. دوالنیشی ایسه درست آوقتلنیش، دارو آلیش و قبض بولمسلیک دیر. جدی موردلرده شفاکار بیلن مصلحت قیلیش ضرور دیر؛ لیکن جراحلیک توغیشدن کیینگه کیچیکتیریلهدی.»
دوالنیشده زمانهوی طب یانیده، بیر قطار منطقهلرده حاضرگچه سنتی طب هم اوز اورنیگه ایگه دیر. لغمان ده سنتی طب حکیمی روحالله امینی، بو کسللیک توغریسیده ایتیشیچه: «اوچ تورلی بواسیر بار: تکمی، بادی و قانلی که هر اوچینینگ دوالنیشی ممکن؛ بیراق حاملهدار عیاللر اوچون بواسیر داروسینی بیره آلمهیمیز؛ چونکه بالهلریگه یامان تاثیر قویهدی.»
سکیزینچی آییده اوشبو کسللیک تجربهسیگه ایگه بولگن لغمان یشاوچیسی بولمیش ۲۰ یاشر نجیبهنینگ ایتیشیچه: «ایکینچی حاملهدارلیکده، سکیزینچی آیده بواسیر بولدم. جدی شکلده آغریق و قان کیتیشیم بار ایدی. شفاکار مینگه مرهم بیردی و ملایم نرسهلرنی اییشیمنی ایستهدی. ایسیق سوو بیلن حمام قیلیش آغریقنی کمهیتیرهر ایدی. بالهم دنیا گه کیلگنیدن کیین یخشی بولدیم. حاضر قتیقراق نرسه ایسیم، آغریق تاپیلهدی.»
بیزلرنینگ «ایکس» ترماغی ده هم تعقیب قیلینگ!
بو کبی بیر تجربهگه ایگه بولگن، تورت باله آنهسی ۲۵ یاشر شبانهنینگ ایتیشیچه، ساغلیق توصیهلردن فایدهلنیش بیلن کیینگی حاملهدارلیکده بو قیینچیلیکنی مدیریت قیله آلگن. «اوچینچی حاملهدارلیکده، آلتینچی آیده بواسیر بولدم. آغریق بار ایدی و قان کیتهر ایدی. اولتیرماق مینی اوچون قیین بولگن ایدی. شفاکار مرهم بیردی، کوپ سوو ایچیشیم، مهییز، انجیر و باشقه میوهلر بیلن سبزهواتلردن فایدهلنیشیمنی ایتدی. آلتی هفتهدن کیین ساغهیدیم. تورتینچی حاملهدارلیکده توصیهلرنی رعایت قیلدیم و هیچ بواسیر بولمهدیم.»
بولرگه علاوه، متخصصلرنینگ اورغولشیچه، ییترلی سوو ایچیش، توغری آوقتلنیش، یوریش و اوزون مدتلی اولتیرمسلیک و توختهمسلیک کبی ساده موضوعلرنی رعایت قیلیش، حاملهدارلیک جریانیده بواسیرنینگ اورتهگه کیلیشینینگ آلدینی آلیش یا-ده کوچهیشینینگ کمهیتیریش ممکن.
