مملکت جمهوررئیسی محمد اشرف غنی قطر پایتختی دوحه‌ده، افغانستان تینچلیگی بوییچه آمریکا خاص نماینده‌سی زلمی خلیلزاد بیلن اوچره‌شگن.
جمهوررئیس‌لیک سرایی بیر اعلامیه ترقه‌تیب ایتیشیچه، مذکور اوچره‌شوو دوشنبه کیچه ۱۴- میزان صورت تاپگن.
ارگ نینگ معلوماتی اساسیده، بو اوچره‌شووده آمریکا ملی خوفسیزلیک کینگش نماینده‌سی، کیسکین حمایوی کوچلر عمومی قومندانی و شونینگدیک ملی مدافعه وزیرلیگی نماینده‌سی موجود ایکن.
اعلامیه نینگ کوپه‌یتیریشیچه، ایکی تامان آتیش کیسین اوستیگه اورغوله‌ب و شونینگدیک یقیین پیتده یولگه قوییله‌دیگن جینوا ییغینی خصوصیده بحث و سوزلشگن.
ارگ نینگ اعلامیه‌سیده کیلیشیچه، خلیلزاد افغانستان دولتی و طالبان گروهی آره‌سیده افغانستان‌لیکلر رهبرلیگیده باشلنگن تینچلیک سوزلشوولری نینگ ایکینچی باسقیچی نی جمهوررئیس گه تبریکله‌گن.
اعلامیه‌دن نقل قیلینیشیچه، افغانستان تینچلیگی بوییچه آمریکا خاص نماینده‌سی زوروانلیکلر کوپه‌یگنیدن خواطر بیلدیریب و افغانستان دن حمایت قیلیش خصوصیده آمریکا نینگ موقفی اوستیگه اورغوله‌گن.
اوتگن کون (دوشنبه ۱۴- میزان) ایرته‌لب مملکت جمهوررئیسی محمداشرف غنی، یوقاری مرتبه‌لی بیر هیأت نینگ ییتکچیلیگیده کویت و قطر مقصدی گه کابل نی ترک قیلگن.
اوتگن کون جمهوررئیس‌لیک سرایی تامانیدن ترقه‌تیلگن بیر خبرنامه‌ده کیلیشیچه، جناب غنی و اونینگ همراه‌لیک قیله‌دیگن هیأت کویت سابق امیری شیخ صباح الاحمد الجابر الصباح نینگ فاتحه مراسمی ده اشتراک قیلیب و مذکور مملکت حکومت و اهالیسی بیلن غم‌شریک‌لیک قیلگنیدن کیین قطر پایتختی دوحه کیته‌دی.
جمهوررئیس غنی دوحه‌ده، قطر امیری شیخ تمیم حمد بن آل ثانی، قطر باش وزیری شیخ خالد بن خلیفه بن عبدالعزیز آل ثانی، افغانستان تینچلیگی بوییچه آمریکا خاص نماینده‌سی زلمی خلیلزاد، افغانستان ده ناتو و آمریکا حربی‌لری نینگ قومندانی جنرال اسکات میلر و وافغانستان مذاکره‌چی هیأت اعضالری بیلن اوچره‌شی ممکن دییلگن ایدی.
جمهوررئیس قطر مملکتی تامان سفر قیلگن بیرحالده، مذکور مملکت پایتختی دوحه ده افغانستان‌لیکلرارا سوزلشوولر باشلنگنیدن کمیده بیر آی اوتیشی بیلن، طالبان و افغانستان دولتی نینگ تماس گروه‌لری سوزلشوولرنینگ برابریده‌گی قیینچیلیک‌لرنی حل قیله آلمه‌گن.
