جرمنی تشقی ایشلر وزیرلیگی، اوشبو مملکت یشاوچیلریدن تیزلیک بیلن ایران نی ترک قیلیشلرینی و بو مملکت گه سفر قیلمسلیکلرینی ایستهگن.
برلیننینگ آگاهلنتیریشیچه، ایران دهگی یشاوچیلری و جرمنی منفعتلری، تهراننینگ قصاصکارانه حرکتلری نشانی بولیشی ممکن.
جرمنی تشقی ایشلر وزیرلیگی بیر بیانیه آرقهلی یازیشیچه: «چونکه ایران دولتی نمایندهلری نیچه مرته قرشی اقداملرگه تهدید قیلگن و ایران دهگی جرمنی منفعتلری و یشاوچیلریگه تاثیر ایتمسلیگینی انکار ایتیب بولمهیدی.»
بیزلرنینگ فیسبوک صحیفهمیزگه باش اورینگ!
بیانیهنینگ بیر بولیمیده کیلیشیچه، تهران ده جرمنی ایلچیخانهسی یالغیز چیکلنگن قنسوللیک خذمتلرینی کورستهدی.
بو آگاهلنتیریش، جرمنی، بریتانیا و فرانسه، اوتگن کون (۶-سنبله، پنجشنبه)، ایران گه نسبت خلقارا تحریملرنی اتوماتیک روشده تیکلش مکانیزمینی ایشگه توشیریش جریانینی باشلهگچ، صادر بولگن. اوشبو حرکتنی ایران تشقی ایشلر وزیری عباس عراقچی، قارهلب و اونی ناقانونی دیگن.
مذکور اروپایی اوچ مملکت، برجام گه موسوم «قوشمه حرکتلر بوییچه مکمل دستور» نینگ امضا قیلووچیلردن بولیب، بیرلشگن ملتلر تشکیلاتینینگ خوفسیزلیک کینگشیگه مکتوب باریش بیلن مکانیزمنی ایشگه توشیریش جریانینی باشلهگنلر.
