کابل شهری یکهتوت منطقهسیده جایلشگن قدیمی بیر اوی چیکهسیده، قوللریگه اجین توشگن و سیماسیده غم کوریلهدیگن بیر عیال، تندیر یاقیشگه مشغول. تندیر ایچیدهگی یانیب-یاتگن قاغازلر توتهسی و ایسکیرگن تختهلر آرهسیدن آلاولر چیقماقده و اوشبو عیال بالهلرینینگ نیازلرینی تامینلش اوچون باشقهلرگه نان پیشیریشگه مجبور دیر.
۴۵ یاشر گلغتی، اوییدهگی آلتی بالهسیگه بیر لقمه نان تاپیش اوچون قولیدن کیلگن ایشنی قیلیب و او بوینیگه توشگن یوکنی تاشیشگه مجبور. گلغتی جمهوریت توزیمیده، حکومتی ادارهلردن بیریده ایشلهر ایکن و حاضر ایسه ایشینی قولدن بیریب و ایشسیز بولگنی یانیده، تورت ییلدن بیری آتهلیک مسئولیتیدن قاچقیب و حیات کیچیریش اوچون ایران گه کیتگن تورموش اورتاغی اورنیده، بالهلری اوچون هم آنه همده آته صفتیده بولیب، آتهلری یوقلیگینی حس قیلمسلیکلری مقصد، بالهلری اوچون قولیدن کیلگن ایشنی قیلیشگه سعیوحرکت قیلهدی. «هم اهالینینگ کییم-کیچگینی یووهمن همده نان پیشیرهمن. حاضرگی کونلرده جودهیم چرچهیمن، لیکن تسلیم بولمهدیم و بالهلریمگه یاردم بیریش اوچون حرکت قیلدیم.»
گلغتی، هر ایرتنگ حیات قیینچیلیکلریگه تسلیم بولمهی و بیر دقیقهلیک بولسهده فکرینی باسیملردن اوزاقلشتیریش مقصد، حیات یوزیگه تبسم قیلیش بیلن کونینی باشلهیدی. لیکن او حسرت بیلن حربی تعلیمی مرکزیده صفاکار صفتیده ایشلهگنی ییللرنی ایلسهیدی که هرچند، ایشی آسان ایمس ایدی؛ بیراق بیللی درآمدی بولگنی اونینگ اوچون حیات کیچیریشنی قولیراق قیلگن ایکن.
بیزلرنینگ «ایکس» ترماغی ده هم تعقیب قیلینگ!
گلغتی اوچون کوننی باشلش، امید و تشویش بیلن توله دیر. او کون بویی بیران کیشی نیچه زغاله نان کیلتیریب و قولیده نیچه افغانی قالیشیگه امید قیلهدی. «ایرتنگلر دعا قیلهمن که بیران کیشی خمیر کیلتیرسین و روزگاریمیز اوتسین. درست بیر درآمدیم یوق. لیکن ینه هم بالهلریمگه بیر لقمه قوروق نان تاپیش اوچون مجبورلیکدن توختهگنمین.»
مذکور عیال هر کونی ۱۲-۱۳ عایلهگه نان پیشیرهدی، بیراق هر کونی بو رقم ثابت ایمس؛ او برچه قیینچیلیکلر بیلن آغیز و کوزیگه کیرهدیگن دودلر اچیغینی چیدهب، کونده ۲۰۰ دن ۲۵۰ افغانی قولگه کیلتیرهدی که بو پول، ییتی کیشیلیک بیر عایله نیازلری تامینلنیشیده ییترلی ایمس. «بعضا ۱۰ دن ۱۵ ته خمیر هم آلیب کیلهدیلر و بعضا ایسه هیچ کیم خمیر هم آلیب کیلمهیدی. اقتصادیمیز یخشی ایمس.»
قشاقلیک و کمبغللیک نه فقط گلغتینی زیریکتیرگن، بلکیم حیات قیینچیلیکلری بالهلریگه تاثیر قیلیب و اولر ییللردن بیری تعلیمدن محروم قالگن. گلغتی اوزی سوادسیزلیکدن اذیت چیکیشی و حاضرگی وضعیتینینگ سببینی سوادسیزلیک دیگنی بیرحالده؛ لیکن ییترلی درآمدی بولمهگنی سبب، بالهلرینینگ تعلیم خرهجتینی تامین قیله آلمهیدی. «اقتصادی وضعیتیمیز یخشی بولمهگنی اوچون بالهلریم درس اوقه آلمهیدی، چونکه اولرگه کییم، کتابچه و قلم آلالمهیمن. شونچه قیلهمن که هیچ کیم گه قوللری اوزهلمهسین.ّ»
ییللردن بویان قیینچیلیکلر برابریده توختهش، گلغتینی ضعیف قیلگن؛ لیکن اوزیگه آلمهیدی و اونینگ اوچون کسل بولگنی اونملی ایمس، اونگه مهم بولگن نرسه یالغیز بالهلرینینگ آچ قالمسلیگی دیر. او ییللردن بیری آغیر ایشلرینی انجام بیریش بیلن بیل آغریق تاپگن؛ لیکن شفاکار گه باره آلمهیدی. اونگه کوره، قولگه کیلتیرهدیگن درآمد نان اوچون صرفلنیشی کیرهک، نه دارو. «شفاکار گه قندهی باره، شونچه تاپهمن که حیات نی کیچرسهک و بالهلریمگه بیر آغیز نان آلیب کیلسم.»
بیزلرنینگ فیسبوک صحیفهمیزگه باش اورینگ!
گلغتی، تورموش اورتاغی یا امکانیتسیزلیک یا-ده باشقه هر قندهی موضوع اوچون، ایر و آته مسئولیتینی قبول قیلمهی و حیات قیینچیلیکلری بیلن قرشی کورهشده گلغتینی یالغیز قویگنی بیرحالده، بو قیینچیلیکلر بیلن روپهره بولگن. «تورت ییلدن بیری ایران کیتگن و ایشسیز دیر. او ییرده سینگلیسینینگ اوییگه حیات کیچیرهدی. مین قالدیم و حیات قیینچیلیکلری. تورموش اورتاغیم مسئولیتسیز بیر کیشی ایدی. مسئولیتسیزلیک قیلمسه ایدی، حیاتیمیز بو رقم بولمس ایدی.»
آنهلیک و بالهلرینینگ نیازلرینی تامینلش مسئولیتینی بجره آلمسلیک توغریسیده قورقیش سبب، گلغتی آخشملر ایشینینگ یکونلنیشی بیلن هم، ینه تشویش قیلهدی. او ایرتهسی کون ایش قیله آلمهی و کیچه دسترخوان اوستیگه هیچ نرسه آلیب باره آلمسلیکدن خواطرلنهدی. «بیر کونی تندیر قیله آلمهی و اهالی اوییده ایش تاپه آلمسلیگیمدن قورقهمن. او پیت مین و بالهلریم وضعیتی قندهی بولهر ایکن دیب. کوپ تشویش قیلهمن، کیچهلر باشیمنی قویگنیمده شو فکر گه توشهمن که قندهی قیلهی، نیمه قیلهی.»
گلغتینی ایچیگه آلیب، گویا بیر قاغاز کبی ایزیب یوبارگن قیینچیلیکلر، اونینگ حیاتیگه باشقه بیر معنانی بیرگن؛ حیات ایسه او اوچون کمبغللیک، مجبورلیک و یالغیزلیککه چیدهم دیر.
