دنیا مقیاسیده سونگی ایکی دههده تکنالوژی رواجلنیشی بیلن، اکثریت مملکتلر اینیقسه افغانستانده بالهلرنینگ اویینلری اسلوبی سیزیلرلی درجهده اوزگرگن.
اوتمیشده توپ دنده، قاغاز پران اویینی، توشله اویینی، جزبازلیک و باشقه ایریم اویینلر اوغیل و قیز بالهلر همده اوسمیرلر آرهسیده جوده مشهور ایدی؛ بیراق حاضرده بو اویینلر اورنینی کمپیوتر اویینلری ایگللهگن.
مملکت یشاوچیلریدن بیرقطاری، اوتمیشده بالهلر اویینلری اسلوبی عنعنوی شکلده ایدی؛ بیراق حاضرده شهرلشگن حیات طرزی و تکنالوژی گه کیریش امکانیتی، بالهلر اویینلری توریگه هم اوزگریشلر آلیب کیلگنینی ایتهدیلر.
کابللیک ۵۰ یاشلی ورشمینه، اوز بالهلیگی حقیده حکایه قیلیب، اوتمیشده بالهلر اویینلری ساده و عادی ایدی، لای و متاع بولکلری ایلگری قیز بالهلرنینگ اساسی کونگیلچهلر مشغولاتلریدن بیرینی تشکیل ایتگنینی بیلدیرهدی.
اونینگ سوزلریگه کوره، لایدن اویلر، تندیرلر و قولده یسلگن قوغورچاقلر یسش کبی اویینلر، بالهلرنی ساعتلب مشغول قیلیب قوییردی. او شوندهی دییدی: «بالهلیکده بیز اوچ قیز لای قیلیب اوندن اوی توزهتردیک اطرافینی دیوار قیلردیک، تندیر یسردیک، شو لای بیلن هم قزان توزهتیب اونگه قاپقاق، قاشق و باشقه همه نرسهنی هم لایدن قیلردیک و شو بیلن بند بولیب وقت اوتکزردیک.»
پروان یشاوچیسی ۳۰ یاشلی باسط، بالهلیگیده گروهی اویینلر گه قیزیقیشینی ایسلب، فوتبال و توپ دنده اوغیل بالهلرنینگ بالهلیک اویینلریدن مهم قسمی بولگنینی و مکتبدن کیینگی کونلرنی تشکیل ایتگنینی ایتهدی؛ اونگه کوره، بو اویینلر دوستلر بیلن صمیمیلیک و بیرگه توپلنیش بیلن کیچردی. اونینگ ایتیشیچه: «بالهلیگیمده کوپلب اویینلر گه قیزیقردیم، بیراق کوپراق فوتبال اوینردیک. ایرتهلب مکتب گه بارردیک، توشدن کیین ایسه تخمیناً ساعت ۳:۰۰ یا کی ۴:۰۰ لرده بیر جایگه توپلنیب اوینردیک. هفتهده بیر یا کی ایکی کون توپ دنده اوینردیک. اوزارا صمیمیلیگیمیز سبب دایم بیرگه اوینشنی خواهلردیک.»
شهرلشونینگ رواجلنیشی همده آدملرنینگ مبایل تلفون و اینترنت کبی زمانهوی تکنالوژیلر گه کیریش امکانیتی کینگهیشی سببلی بالهلرنینگ اویین اسلوبی اوزگرگن و بعضی بالهلر اوتمیشدهگی اویینلر گه قیزیقمهیدی.
کابل یشاوچیسی ۶ یاشلی آیت، اجتماعی ترماقلرده بالهلر اویینلرینینگ کوریش گه قیزیقیشینی بیلدیرهدی. بیراق او کوپراق وقتینی اوی تشقریسیده اوز سینگیل و دوگانهلری بیلن اوینشنی هم یاقتیرهدی. او شوندهی دییدی: «یوتیوبده دیانانی کوریشگه قیزیقهمن، سینگیل و دوگانهلریم بیلن تشقریده اوینشنی یاقتیرهمن.»
فراهلیک ۹ یاشلی اسماعیل هم، یوتیوبیده اوزی یاقتیرهدیگن کونگیلچهلر اویینلر اسلوبی حقیده سوزلهیدی. اونینگ ایتیشیچه: «موبایل آرقهلی یوتیوبده کارتون کورهمن، موترک اویینی، فری فایت (اوروش اویینلری)نی یاقتیرهمن.»
شو بیلن بیرگه، جمعیتشناس شعیب احمدی، بو بارهده جمعیتلرنینگ رواجلنیشی جریانی و تکنالوژی ترقیاتی آدملرنینگ تورموش طرزی همده بالهلر اویینلری اسلوبی گه سیزیلرلی تأثیر کورستگنینی ایتهدی. او شوندهی دییدی: «اوتمیشده اجتماعی ترماقلر خلق آرهسیده کینگ ترقلمهگن و تکنالوژی هم اونچهلیک رواجلنمهگنی سببلی، اوشه دورده کوپچیلیک اویینلر حتا بالهلر اویینلری هم جسمانی و عادی شکلده ایدی، بیراق حاضرگی شرایطده تکنالوژی ترقیاتی و اجتماعی ترماقلرنینگ خلق آرهسیده جوده کینگ ترقهلیشی خصوصاً بالهلر حیاتیگه سیزیلرلی تأثیر کورستگن.»
آدملرنینگ تورموش طرزیده کینگ کولملی اوزگریشلر بولیشیگه قرهمی، هنوزگچه کوپلب یاشلر و اورته یاش دهگیلر خاطرهسیده اوتمیشدهگی اویینلر یادگارلیگی سقلنیب قالگن، بو خاطرهلر شونی کورستهدی کی اوتگن سادهلیک، بوگونگی کیملیک بیر قسمینی شکللنتیرهدی.